Ailənin iki oğlan övladından biri, ali təhsilli, subay, Bərdəli İkinci Vətən Müharibəsi Şəhidi-BAXIŞ RƏHİMLİNİN CƏNNƏTDƏKİ BEŞİNCİ DOĞUM GÜNÜNDƏ, 29 YAŞININ TAMAMINDA MƏZARI ZİYARƏT EDİLDİ, MƏCLİS DÜZƏNLƏNDİ – FOTOLAR – YENİLƏNİB – (2)

Fevral 19, 2025

DÜNYA

3 minute read

Bərdə rayonunun İkinci Vətən Müharibəsi Şəhidlərindən olan Baxış İlqar oğlu Rəhimlinin doğum günüdür.

Bu gün-19 fevral 2025-ci il tarixində Baxış Rəhimlinin 29 yaşı tamam olur.

Bu, həm də Şəhidin Cənnətdəki beşinci doğum günü, mövlududur.

Cənnətdəki beşinci doğum günü ilə bağlı Şəhidin Bala Qacar kənd qəbiristanlığındakı məzarı ziyarət olunub, məzarı üzərinə gül dəstələri düzülüb.

Ruhuna dualar olunub, “Quran” oxunub.

Qısa çıxışlar edilib.

Çıxışlarda Şəhidin 24 illik qısa, lakin şərəfli ömür yolundan, Vətənsevərliyindən, İgidliyi və Qəhrəmanlığından bəhs olunub.

Ailəsinə-valideyinlərinə Allahdan səbr və dözüm arzulanıb, Şəhidin Cənnətdəki beşinci doğum günü təbrik olunub.

Sonra ailəsinin yaşadığı evdə mərasim düzənlənib, adına ehsan süfrəsi açılıb, ruhuna bir daha dualar olunub.

Etikxeber.az xəbər verir ki, Baxış Rəhimli 1996-cı ilin fevral ayının 19-da Bərdə rayonunun Bala Qacar kəndində-ziyalı ailəsində dünyaya gəlib.

Ailənin iki övladından, iki qardaşdan biri olub.

Ali təhsilli qardaşı hazırda ailəli, bir övlad atasıdır.

Orta məktəbi əla qiymətlərlə başa vurduqdan sonra Türkiyənin Kastamonu İqtisad Universitetində oxuyub, ali təhsilə yiyələnib.

Ali təhsilini başa vurduqdan sonra həqiqi hərbi xidmətə yollanıb və Əsgərliyinin başa çatmasına cəmi 4 gün qalmış İkinci Vətən Müharibəsi başlayıb.

Azərbaycan Ordusunun Əsgər kimi müharibəyə qatılıb, uzun və şərəfli döyüş yolu düz 43 gün çəkib.

Füzulidən Şuşayacan döyüş yolu keçib.

Axırıncı dəfə qardaşı ilə noyabrın 7-də, atası ilə noyabrın 9-da danışıb.

Və elə həmin gün-noyabrın 9-da, Şuşa şəhəri azad edildikdən bir gün sonra, Qələbəyə cəmi saatlar qalmış Şuşada qəhrəmancasına Şəhidlik məqamına ucalıb.

Nəşi noyabrın 10-da Bərdənin Bala Qacar kənd qəbiristanlığında Əbədiyyətə uğurlanıb.

Şəhidliyindən sonra ölkə Prezidenti tərəfindən 4 medal-“Vətən uğrunda”, “Laçının azad olunmasına görə”, “Füzulinin azad olunmasına görə”, “Şuşanın azad olunmasına görə” medalları və 3-cü dərəcəli “Vətənə xidmətə görə” ordeni ilə təltif olunub.

Baxış həm də subay olub.

Məkanı cənnətlik, Cənnətdəki beşinci doğum günü, 29 yaşı mübarək olsun!

Nur içində uyusun!

14:38

***

FOTOLAR: