Ailənin üç övladından biri, ali təhsilli, Baş leytenant, üç övladı Vətənə əmanət qalan-CƏBRAYILDA DÜNYAYA GƏLƏN VƏ CƏBRAYILDA DA ŞƏHİD OLAN ELÇİN ƏZİZOVUN BU GÜN CƏNNƏTDƏKİ DÖRDÜNCÜ DOĞUM GÜNÜDÜR… – FOTOLAR – YENİLƏNİB

Cəbrayıl rayonunun İkinci Vətən Müharibəsi Şəhidlərindən olan Elçin Əvəz oğlu Əzizovun Cənnətdəki dördüncü doğum günü, 39 yaşının tamam olması ilə bağlı bu gün səhər saatlarında Bakı şəhərində yerləşən İkinci Fəxri Xiyabanda-İkinci Şəhidlər Xiyabanındakı məzarı ziyarət olunub.

Məzarı üzərinə gül dəstələri düzülüb, ruhuna dualar edilib.

Eyni zamanda, Şəhidin anası Mələk xanıma, həyat yoldaşına və övladlarına Allahdan səbr və dözüm arzulanıb, Cənnətdəki dördüncü doğum günü təbrik olunub.

Məzarını ziyarətdən sonra İkinci Şəhidlər Xiyabanında yerləşən mərasim zalında Şəhidin Cənnətdəki dördüncü doğum günü ilə bağlı adına ehsan süfrəsi açılıb.

Bir daha Şəhidin ruhuna dualar edilib, “Quran” oxunub.

Şəhidin məzarını ziyarətdə və Cənnətdəki dördüncü doğum günü ilə bağlı təşkil edilən süfrəsində ailə üzvləri, Şəhid ailələri, hərbçilər, Qazilər, din xadimləri, millət vəkili Ceyhun Məmmədovun köməkçisi və digər şəxslər iştirak ediblər.

Etikxeber.az xəbər verir ki, Cəbrayıl rayonunun Böyük Mərcanlı kəndindən olan Elçin Əzizov 1985-ci ilin mart ayının 30-da dünyaya gəlib.

Ailənin üç övladından, iki qardaşdan biri və evin böyük oğlu olub.

1993-cü ildə Cəbrayıl rayonun işğalı ilə bağlı məcburi köçkün düşüblər, Bakı şəhərində yaşayıblar.

2002-ci ildə Nizami rayonunda yerləşən Fizuli rayon 88 nömrəli məktəbi bitirib.

2002-2006-cı illərdə Azərbaycan Texniki Universitetində ali təhsil alıb.

Amma son 9 ilə yaxın müddətdə öz ixtisası üzrə deyil, hərbi sahədə, Dövlət Sərhəd Xidmətində (DSX) fəaliyyət göstərib.

Baş leytenant hərbi rütbəsini daşıyıb.

İkinci Vətən Müharibəsi zamanı şərəfli döyüş yolu 17 gün çəkib.

Oktyabr ayının 13-də elə doğulduğu Cəbrayıl rayonunda qəhrəmancasına Şəhidlik məqamına ucalıb.

Nəşi iki gün sonra, oktyabrın 15-də İkinci Fəxri Xiyabanda-İkinci Şəhidlər Xiyabanında Əbədiyyətə uğurlanıb.

İstər İkinci Qarabağ Savaşından əvvəl, istərsə də İkinci Vətən Müharibəsindən sonra bır sıra medallarla və 3-cü dərəcəli “Vətənə xidmətə görə” ordeni ilə təltif olunub.

O, həm də ailəli olub.

Üç övladı-bir qızı və iki oğlu ailəsinə, Vətənə əmanət qalıb.

Məkanı cənnətlik, Cənnətdəki dördüncü doğum günü mübarək olsun!

Nur içində yatsın!

***

FOTOLAR:

Kamil HƏMZƏOĞLU (HƏMİDOV)

Etikxeber.az