Əli Vaqif oğlu İsmayılov…
Əslən Gədəbəyli, özü isə Goranboy doğumlu…
İkinci Vətən Müharibəsinin iştirakçısı…
İgid, Qəhrəman, Vətən, Azərbaycan sevdalısı…
Müharibədən, tarixi Zəfərimizdən 4 ay sonra Şəhidlik məqamına ucalan Vətən fədaimiz…
Nur üzlü Şəhidimiz…
Əli İsmayılov əslən Gədəbəy rayonunun Şınıx bölgəsindədir, valideynləri Şınıxlıdır…
1993-cü ildə ailə həyatı quran Vaqif və Arifə İsmayılovlar 1996-cı ildə Goranboy rayonunun Qaradağlı kəndinə köçüb, burada yurd salıblar…
Əli də Qaradağlıda, özü də Azərbaycan xalqının ən gözəl, ən əlamətdar günündə-Novruz bayramında, 2001-ci ilin mart ayının 21-də dünyaya gəlib…
Ailənin üç övladından biri, iki bacının tək qardaşı, evin sonbeşiyi olub…
Hər iki bacısı hazırda ailəli, övlad sahibidirlər…
Əlinin atası da müharibə-Birinci Qarabağ Savaşının iştirakçısı olub, 2-ci qrup müharibə, Qarabağ əlilidir…
Atası-Qazi Vaqif İsmayılov 1993-cü ildə, Birinci Vətən Müharibəsi zamanı Gədəbəy istiqamətində döyüşlər zamanı yaralanıb…
Əli 2007-2018-ci illərdə Goranboy rayon M. Səfərov adına Qaradağlı kənd tam orta məktəbində təhsil alıb…
Orta məktəbi qurtardıqdan sonra, 2018-ci ildə Bakı Biznes və Kooperasiya Kollecinə daxil olub…
Lakin 2019-cu ildə təhsilini dayandıraraq həqiqi hərbi xidmətə yollanıb…
Ağcabədi rayonu istiqamətində “N” saylı hərbi hissədə xidmət edib…
Əsgərliyinin başa çatmasına sayılı günlər qalmış isə İkinci Vətən Müharibəsinin başlaması ilə Azərbaycan Ordusunun Əsgəri kimi döyüşlərə atılıb…
Ağdam və Xocavənd istiqamətlərində döyüşlərdə iştirak edib…
Müharibədən sonra Ali Baş Komandan tərəfindən “Xocavəndin azad olunmasına görə” medalı ilə təltif olunub…
Eyni zamanda, müharibədən sonra Ağdam istiqamətində “N” saylı hərbi hissədə xidmətini davam etdirib…
Axırıncı dəfə isə ailəsi ilə 2021-ci ilin fevralın 26-sı-axşam saatlarında əlaqə saxlayıb…
Və 26-dan 27-nə keçən gecə isə Ağdamın Şelli kəndi istiqamətində bir neçə hərbi qulluqçumuzla birlikdə yaralanıb…
Bir aya yaxın Bakı şəhərində yerləşən Hərbi Hospitalda koma vəziyyətində qalıb…
Ancaq Onun həyatını xilas etmək mümkün olmayıb…
Və mart ayının 25-də Şəhidlik məqamına ucalıb…
Nəşi martın 25-də Qaradağlı kənd qəbiristanlığında Əbədiyyətə uğurlanıb…
O, həm də subay olub…
Hazırda ailəsinin yaşadığı küçə Onun adı daşıyır…
Amma ailəsi övladlarının “Cəsur döyüşü” və “Ağdamın azad olunmasına görə” medalları ilə də təltif olunmasını istəyir və həmin günü səbrsizliklə gözləyirlər…
***
Bu gün-4 iyul tarixində, günorta saatlarında Şəhidimizin Qaradağlıdakı ocağını, ailəsini-anası Arifə xanımı ziyarət etdim…
Şəhidimizin ailəsinə, övlad dərdindən saçları vaxtsız ağarmış anası Arifə xanıma Allahdan dözüm arzuladım…
“Şəhidimizin məkanı cənnətlik olsun!”-dedim…
Ruhu qarşısında baş əydiyimi bildirdim…
Şəhidimizin anası ilə söhbətləşdim, dərdləşdim…
Onunla birlikdə Şəhidimizin qısa, lakin şərəfli həyat və döyüş yoluna nəzər saldım…
Şəhimizin ocağında-muzeyində xatirə fotoları çəkdirdim…
Və bir daha Şəhidimizin ailəsinə-Arifə xanıma Böyük Yaradandan səbr dilədim və sağollaşıb, onlardan-Şəhid ocağından ayrıldım…
Məqamı Ucalardan-uca, dərgahı mübarək olsun!
Nur içində uyusun!
***
FOTOLAR:
Kamil HƏMZƏOĞLU (HƏMİDOV)
Etikxeber.az
