“Azərbaycanda yaşlılar: qayğı və rifah” analitik hesabatının-TƏQDİMATI OLDU

24 iyun 2020-ci il tarixində Sosial Tədqiqatlar Mərkəzi (STM) növbəti ümumölkə sorğusunun nəticələrini təqdim edib.

Etikxeber.az xəbər verir ki, təqdimat tədbirində STM-in əməkdaşları, Əmək və Əhalinin Sosial Müdafiəsi Nazirliyi və “Üçüncü bahar” İctimai birliyinin nümayəndələri iştirak ediblər.

Ölkədə ciddi karantin rejiminin şərtlərini nəzərə alaraq, “Azərbaycanda yaşlılar: qayğı və rifah” analitik hesabatının təqdimat konfransı Zoom-onlayn platformu vasitəsilə təşkil olunub.

Tədbiri açıq elan edən STM-in İdarə heyətinin sədr müavini, millət vəkili, siyasi elmlər doktoru Elşad Mirbəşiroğlu Azərbaycanda həyata keçirilən sosial tədqiqatların müasir dövrdə daşıdığı mühüm rolu xüsusilə vurğulayıb.

Daha sonra STM-in Sosial-iqtisadi təhlil departamentinin baş məsləhətçisi və hesabat müəllifi Humay Axundzadə layihəni təqdim etdi, əldə edilmiş tədqiqat nəticələri haqqında ətraflı danışıb.

Müəllif qeyd edib ki, sorğunun əsas məqsədi müasir qayğı konsepsiyalarını nəzərə alaraq, Azərbaycanda yaşlıların rifahının müxtəlif aspektlərinin öyrənilməsidir. Sorğu ölkənin doqquz iqtisadi-coğrafi ərazisini, 18 yaşda yuxarı 1212 respondenti əhatə edib. Tədqiqatda yaşlıların vəziyyətini yaxın və uzaq perspektivdə şərtləndirən övladlıq borcu ilə bağlı sosial normalar, ailənin və dövlətin yaşlılara qayğı sahəsində məsuliyyət balansına dair ictimai gözləntilər, yaşlılıq dövründə arzu olunan qayğı və yaşayış formaları, yaşlılara dair siyasət, ictimai şüurda yaşlılara aid stereotip və təsəvvürlər, yaşlılara münasibətdə ayrı-seçkilik halları, pensiya yığımları və yaşlılar üçün infrastruktur haqqında ictimai rəy məsələləri öz əksini tapıb.

Daha sonra Azərbaycan Respublikasının Əmək və Əhalinin Sosial müdafiəsi Nazirliyinin Sosial təminat siyasəti şöbəsinin müdiri Babək Hüseynov çıxış edib.

O, ölkədə yaşlı vətəndaşlara qayğı sahəsində aparılan işlərdən, son illərdə sosial-iqtisadi islahatlar çərçivəsində həyata keçirilən dövlət tədbirlərindən, habelə hazırki pandemiya şəraitində risk qrupuna daxil olan yaşlı vətəndaşlarımıza qayğı üçün sosial təminat siyasəti çərçivəsində görülmüş tədbirlərdən danışıb. Əmək və əhalinin sosial müdafiəsi naziri Sahil Babayevin konfrans iştirakçılarına salamlarını çatdıraraq, hesabata təmsil etdikləri qurum adından yüksək dəyər verib, onun gələcək dövlət proqramlarının tərtibində mühüm mənbə olduğunu vurğulayıb.

“Üçüncü bahar” İctimai Birliyinin sədri Nərmin Qəniyeva birliyin yaranma tarixi, gördüyü işlər, yenilikçi fəaliyyətindəki uğurlardan söz açdı. Həyata keçirilmiş tədbirlərin yaşlı insanların həyat keyfiyyətinə müsbət təsiri, onların təqaüd dövründə ömrünün daha maraqlı və rəngarəng keçməsi üçün olduğu söyləyib.

Qeyd edib ki, qayəsi Azərbaycan yaşlısını fəal və güclü görmək istəyən İctimai birliyin sədri olaraq, təqdim olunan hesabatda fəal yaşlanma strategiyası ilə həmahəng məqamlar vardır.

Sonra STM-in Sosial-iqtisadi təhlil departamentinin rəhbəri Seymur Əliyev tədqiqat çərçivəsində sözügedən istiqamətdə ictimai rəyin öyrənilməsinin əhəmiyyəti və onun dövlətin müvafiq siyasət sənədlərində nəzərə alınmasının zəruriliyindən, yaşlılara yönəlik sosial siyasət konseptləri üzrə beynəlxalq təcrübədən və cari dövrdə yaşlıların qarşılaşdıqları əsas problemlərlə bağlı dəstək alətlərinin müxtəlif kombinasiyaları ilə bağlı öz fikirlərini bölüşüb.

Eyni zamanda, Mərkəzin sosial-iqtisadi bolku təmsil edən dövlət institutları ilə həyata keçirilə biləcək potensial əməkdaşlıq istiqamətlərini diqqət mərkəzinə çatdırıb.

Sonda millət vəkili, siyasi elmlər doktoru E.Mirbəşiroğlu pandemiya şəraitində daha da aktuallaşan yaşlılara qayğı məsələlərinin tədqiqi, bu istiqamətdə dövlət və qeyri-hökümət qurumlarının, həmçinin sıravi vətəndaşların əməkdaşlığı, birgə fəaliyyətinin önəmini qeyd edib.

Etikxeber.az