Beşqat çempion: ” Növbəti qızıl medalımı da xalqıma, ailəmə həsr edirəm”

Hər dəfə arenaya çıxanda qalib gəlib Vətənin idman şərəfini qorumağa çalışıram. Azərbaycan bayrağını beynəlxalq arenada ucaltmaq mənim üçün böyük şərəfdir.

Etikxeber.az xəbər verir ki, bu fikirləri mətbuata açıqlamasında Avstriyanın Lints şəhərində keçirilən karate üzrə dünya çempionatında beşinci dəfə çempionluğunu bayram edən Azərbaycan milli komandasının üzvü Rafael Ağayev səsləndirib. Beşqat Avropa çempionu keçirdiyi hissləri ifadə edərək deyib: “Fürsətdən istifadə edərək, bütün Azərbaycan xalqını təbrik etmək istərdim. Növbəti qızıl medalımı da xalqıma, ailəmə və sevdiklərimə həsr edirəm. Düşünürəm ki, Azərbaycan bayrağını ucaltmaq, himnimizi səsləndirmək hər bir idmançının borcudur. Hazırda sevincimin həddi-hüdudu yoxdur. Federasiya rəhbərliyinə, müəllimlərimə və eləcə də biz idmançılara dəstək olan hər kəsə minnətdaram”.

Xatırladaq ki, 75 kiloqram çəki dərəcəsində yarışan idmançımız finalda misirli karateçi Ömər Əbdül Rəhman ilə qarşılaşıb və rəqibinə 4:1 hesabı ilə qalib gələrək beşinci dəfə planetin ən güclü karateçisi adına yiyələnib. O, həm də 13 dəfə Avropa çempionu olub.

Etikxeber.az