“Bu tendensiya beynəlxalq münasibətlərin gələcəyi baxımından müsbət hal deyil…” – DEPUTAT

Regionun siyasi, iqtisadi və humanitar mərkəzi kimi çıxış edən Azərbaycan sivilizasiyalararası dialoqa əhəmiyyətli töhfələr verməklə yanaşı, mühüm beynəlxalq tədbirlərə uğurla ev sahibliyi edir. Digər tərəfdən, Azərbaycanın paytaxtı Bakıda Rusiya və NATO-nun ali hərbi rəhbərlərinin görüşlər keçirməsi ölkəmizin strateji dialoq platforması kimi çıxış etdiyini göstərir.

Etikxeber.az xəbər verir ki, bu fikirləri deputat Hikmət Babaoğlu deyib.

H. Babaoğlu bildirib ki, Rusiya Federasiyası Silahlı Qüvvələrinin Baş Qərargah rəisi ilə NATO-nun Hərbi Komitəsinin sədri arasında görüş məkanı kimi növbəti dəfə Bakının seçilməsi, hər şeydən əvvəl, Azərbaycanın beynəlxalq miqyasda rolunu və nüfuzunu daha da artıran amildir.

Onun sözlərinə görə, bu fakt bir daha Azərbaycanın tərəfdaşlıq və əməkdaşlıq platforması kimi özünü beynəlxalq münasibətlərdə təsdiq etməsinin ifadəsidir.

O, qeyd edib ki, hazırkı beynəlxalq nizamın xarakteristikasına və dünya siyasətində mövcud tendensiyalara nəzər salsaq, görəcəyik ki, qloballaşan dünyada hegemon güc mərkəzlərinin dialoq məkanı kimi seçəcəyi ünvanların sayı hər ötən gün bir qədər də azalır.

Millət vəkilinin dediyinə görə, çünki bəzi qlobal məsələlər ayrı-ayrı milli dövlətləri beynəlxalq münasibətlərin aktoru kimi mövcud siyasi reallıqların fonunda müxtəlif qütblərə doğru itələməyə başlayıb:

“Bu tendensiya beynəlxalq münasibətlərin gələcəyi baxımından müsbət hal deyil.

Belə bir situasiyada çox mürəkkəb geostrateji məkanda yerləşməsinə baxmayaraq, Azərbaycanın tərəfdaşlıq məkanı kimi çıxış etməyi bacarması, öz strateji mənafelərini müxtəlif güc mərkəzlərinin maraqları ilə uzlaşdırma qabiliyyətinin olması diplomatiya tarixində ekstraordinar hadisə kimi qiymətləndirilməlidir”.

Millət vəkili əlavə edib ki, Rusiya Federasiyası Silahlı Qüvvələrinin Baş Qərargah rəisi Valeri Gerasimovun rəhbərlik etdiyi nümayəndə heyətini qəbul edən Prezident İlham Əliyev bildirib ki, Rusiyanın və NATO-nun ali hərbi komandanlıqlarının Bakıda görüşlər keçirməsi yaxşı bir ənənəyə çevrilib.

Qeyd etmək lazımdır ki, ötən il Rusiyanın və NATO-nun ali hərbi komandanlıqlarının Bakıda üç dəfə görüşü olub:

“Bu, əlbəttə ki, təsadüfi xarakter daşımır. Bu fakt, hər şeydən əvvəl, Prezident İlham Əliyevin rəhbərliyi ilə həyata keçirilən praqmatik xarici siyasət kursunun qanunauyğun nəticəsidir”.

H. Babaoğlunun dediyinə görə, regional və beynəlxalq miqyasda əməkdaşlığa, təhlükəsizliyə fundamental töhfələr verən Azərbaycan çoxvektorlu, praqmatik xarici siyasət həyata keçirir ki, bu da həm ölkəmizin milli maraqlarının qorunmasında, həm də regional sabitliyin, təhlükəsizlik və inkişafın təmin olunmasında öz ifadəsini tapır.

“Bu isə həm beynəlxalq təşkilatlar, həm də ayrı-ayrı ölkələr, o cümlədən dünya siyasətində güc mərkəzi kimi çıxış edən milli dövlətlər tərəfindən yüksək qiymətləndirilir. Digər tərəfdən, bölgədə sabitləşdirici aktor kimi çıxış edən Azərbaycanın regional və qlobal təhlükəsizliyə müstəsna töhfələr verməsi ölkəmizin beynəlxalq dialoq məkanı olaraq seçilməsini şərtləndirib.

Prezident İlham Əliyev hər zaman qeyd edir ki, Azərbaycan qarşıdurma, rəqabət məkanı deyil, tərəfdaşlıq və əməkdaşlıq məkanıdır. Xarici siyasətimizin strateji əsaslarından biri olan bu ideya, onun konstruktiv məzmunu və real siyasi proseslərdə özünü doğrultması beynəlxalq münasibətlərin hazırkı mürəkkəb mərhələsində Azərbaycanı strateji tərəfdaşlıq üçün cazibə mərkəzinə çevirir” – deyə, millət vəkili vurğulayıb.

Deputat sonra  bildirib ki, Azərbaycanın cazibə mərkəzinə çevrilməsi Prezident İlham Əliyevin rəhbərliyi ilə həyata keçirilən müstəqil xarici siyasət kursunun dünyanın güc mərkəzləri tərəfindən hörmətlə qarşılanması və qəbul edilməsinin əyani təsdiqidir:

“Bütövlükdə, sözügedən görüşün növbəti dəfə Bakıda keçirilməsi sabitlik adası kimi xarakterizə edilən, Cənubi Qafqazın lider dövləti Azərbaycana olan yüksək etimadin göstəricisidir”.

Etikxeber.az

Read Previous

Prezident Xırdalana 3,9 milyon manat ayırdı – SƏRƏNCAM

Read Next

“Azərbaycan reallıqlarını Avropa çərçivəsinə salmaq yolverilməzdir” – DEPUTAT

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir


Warning: Unknown: write failed: No space left on device (28) in Unknown on line 0

Warning: Unknown: Failed to write session data (files). Please verify that the current setting of session.save_path is correct (/tmp) in Unknown on line 0