“Bu xüsusiyyət Yesenin kimi şairlərə xasdır” – RAFAEL HÜSEYNOV – FOTOLAR

Görkəmli rus şairi Sergey Yeseninin 121-ci ildönümü qeyd edilib.

Etikxeber.az xəbər verir ki, oktyabrın 4-də AMEA-nın Dendrologiya İnstitutunda böyük rus şairi S.Yeseninin anadan olmasının 121-ci ildönümünə və Nizami Gəncəvi adına Milli Azərbaycan Ədəbiyyatı Muzeyinin S.Yesenin adına Azərbaycan-Rusiya Ədəbi Əlaqələr Mərkəzinin yeni ekspozisiyasının açılışına həsr olunan elmi, ədəbi-musiqili tədbir keçirilib.

Öncə S.Yesenin adına Azərbaycan-Rusiya Ədəbi Əlaqələr Mərkəzinin yeni ekspozisiyasının açılışı baş tutub.

Tədbiri giriş sözü ilə AMEA-nın Milli Azərbaycan Ədəbiyyatı Muzeyinin direktoru, akademik Rafael Hüseynov açaraq öz əsərləri ilə dünya ədəbiyyatında əbədi iz qoymuş görkəmli rus şairi Sergey Yeseninin həyat və yaradıcılığından danışıb. O, Yeseninin ilk memorialının 1975-ci ildə ümummilli lider Heydər Əliyevin təşəbbüsü ilə, şairin anadan olmasının 80 illiyi münasibətilə açıldığını bildirib. Natiq Azərbaycan və Rusiya xalqları arasında dostluq və mədəni əlaqələrin gücləndirilməsində bu kimi tədbirlərin keçirilməsinin əhəmiyyətini önə çəkib.

R.Hüseynov hər il oktyabrın 3-ü Yeseninin doğum gününün Azərbaycanda da qeyd olunduğunu xatırladaraq onu “sadəliyin şair”i adlandırıb: “Bu xüsusiyyət Yesenin kimi şairlərə xasdır”.

AMEA-nın prezidenti, akademik Akif Əlizadə çıxış edərək böyük rus şairinin həyat və yaradıcılığına həsr olunmuş tədbiri yüksək qiymətləndirib. Alim Yeseninin dünyanın əvəzedilməz, özünəməxsus yazarlarından biri olduğunu vurğulayaraq bu tədbir vasitəsilə şairi bir daha xatırlamaqdan məmunuluq duyduğunu dilə gətirib. A.Əlizadə təqdim olunan ekspozisiyanın Yeseninin Azərbaycan və azərbaycanlılara olan sevgisinin əksi olduğunu bildirib: “Bu ekspozisiyanın yaradılmasında əsas məqsəd görkəmli şairin xatirəsini əbədiləşdirməkdir. Yesenin təkcə rus xalqının deyil, bizim də sevimli şairimizdir. Azərbaycana, xüsusən də Bakıya olan sevgisi şairin zəngin yaradıcılığında öz əksini tapıb”.

Tədbirdə çıxış edən Rusiyanın Azərbaycandakı səfiri Vladimir Doroxin S.Yeseninin 121 illiyinin Azərbaycanda qeyd edilməsini iki ölkə arasında ədəbi-mədəni əlaqələrin möhkəmləndirilməsi baxımından yüksək qiymətləndirib. Qeyd edib ki, Azərbaycanda rus ədəbiyyatına göstərilən diqqət və məhəbbət, rus yazıçı və şairlərinin yubileylərinin keçirilməsi ənənəsi olduqca təqdirəlayiq haldır.

Səfir təşkil edilmiş ekspozisiyanın şairin həyat və yaradıcılığını geniş şəkildə əks etdirdiyini vurğulayaraq, bütün yeseninşünasları bu guşə ilə tanış olmaq üçün Azərbaycana dəvət edib. Şairin keçdiyi çətin və keşməkeşli həyat yolundan söz açan səfir onun 50-dən çox şeiri və iki poemasını məhz Azərbaycanda qələmə aldığını xatırladıb. Bu əsərlərin ərsəyə gəlməsində Şərqin, xüsusilə Azərbaycanın xidmətləri olduğunu diqqətə çatdırıb. Bildirib ki, Yeseninin Azərbaycanda yazdığı şeirlər onun poeziyasının ən qiymətli əsərlərindəndir.

AMEA-nın vitse-prezidenti, akademik İsa Həbibbəyli Yeseninin rus romantikası və lirikasının öndə gedən nümayəndələrindən biri olduğunu deyib. Ədəbiyyatın bu növünün Yeseninin doğumundan əsrlər əvvəl yaranmasına baxmayaraq şairin, bu axının parlaq simalarından birinə çevrildiyini vurğulayıb. Şairin insanların gündəlik həyatını öz əsərlərində sadə dillə ən gözəl şəkildə ifadə etdiyini bildirib. O, Yeseninin əsərlərinin dəfələrlə Azərbaycan dilinə tərcümə olunduğunu, məqalələrinin Azərbaycanın ədəbi nəşrlərində bugünədək dərc edildiyini xatırladıb. Həmçinin Azərbaycan alimi İsaxan İsaxanlının Yesenin həyat və yaradıcılğına dair doktorluq dissertasiyası üzərində işlədiyini diqqətə çatdırıb.

Akademik bildirib ki, 1925-ci ilin may-iyun aylarında şairin sonuncu işıq üzü görmüş kitabı olan “Persidskiye motivı” onun Bakının Mərdəkan qəsəbəsində yaşadığı vaxt qələmə aldığı şeirlər toplusudur.

İsa Həbibbəylinin sözlərinə görə, rus ədəbiyyatının inkişafında misilsiz xidmətləri olan Yeseninin əsərləri təkcə rus xalqı deyil, dünyanın bütün xalqları tərəfindən sevilir. Onun rus xalqının arzuları və zəkasının parlaq ifadəsi olan əsərləri bir çox dillərə tərcümə olunub.

Tədbirdə Rusiyanın Ryazan vilayətinin Mədəniyyət və Turizm naziri Vitaliy Popov, Konstantinova kəndində yerləşən Yesenin adına Dövlət Qoruq Muzeyinin direktoru Boris İoqanson və digər cıxış edənlər böyük şairin həyat və yaradıcılığına dair fikirlərini bölüşərək bu gün Yeseninin sadə şeirlərinə bəstələnən mahnıların bütün dünyada sevə-sevə dinlənildiyini qeyd ediblər.

Sonra şairin Azərbaycanla bağlı xatirələri səsləndirilib.

Tədbirin ədəbi-bədii hissəsində Yeseninin əsərlərindən nümunələr səsləndirilib, şeirlərinə bəstələnən mahnılar ifa olunub.

rafael-2rafael-3

rafael-4rafael-5

rafael-6rafael-1

Etikxeber.az

Read Previous

Jurnalist təhdid olunduğunu deyir…

Read Next

Düşmən atəşkəs rejimini ümumilikdə 25 dəfə pozub

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir