Şəhid və Qazi adını kirləməyin, kirlətməyin! AYIBDIR!!!-KAMİL HƏMZƏOĞLU YAZDI
Millət vəkilləri qanunların “dili”ndən şikayətləndilər
NOVRUZ ASLANOV: Biz özümüz bəzən bu qanunları oxuyub başa düşə bilmirik, o qədər qəliz şəkildə yazılır ki, anlamaq olmur…
ELDAR İBRAHİMOV: Mənim də fikrim belədir ki, qanunlar sadə, hamının başa düşə biləcəyi dildə yazılmalıdır. Burada qəlizliyə ehtiyac yoxdur…
Qanunların dili elə olmalıdır ki, onu hamı başa düşə bilsin. Eldar müəllim, siz özünüz də dəfələrlə çıxışınızda qanunların dilinin anlaşılan olmasının vacibliyini dilə gətirmisiniz. Ona görə hesab edirəm ki, artıq bu məsələyə ciddi diqqət yetirilməli, qanunlarımızın dili hamının başa düşdüyü, anladığı tərzdə yazılmalıdır.
Etikxeber.az xəbər verir ki, bunu millət vəkili, bəstəkar Novruz Aslan parlamentin Aqrar siyasət komitəsinin martın 13-də keçirilən iclasında “Fitosanitar nəzarəti haqqında” qanuna dəyişiklikləri nəzərdə tutan qanun layihəsinin birinci oxunuşda müzakirəsi zamanı deyib.
“Biz özümüz bəzən bu qanunları oxuyub başa düşə bilmirik, o qədər qəliz şəkildə yazılır ki, anlamaq olmur. Onda bəs sıravi insanlar necə olsun?”-deyən millət vəkili, ümumiyyətlə, qanun layihəsində “isə” sözünə, mötərizələrə ehtiyac olmadığını bildirib:
“Bunlar axı, nəyə lazımdır? Hesab edirəm ki, bunlar gələcəkdə mütləq nəzərə alınmalı və yığışdırılmalıdır”.
Adıçəkilən komitənin sədri Eldar İbrahimov da millət vəkilinin iradları ilə razılaşdığını bildirib.
“Bu qanunun qəbulundan on ildən çox vaxt keçir. O, 2006-cı ilin 12 may tarixində qəbul edilib və üstündən xeyli vaxt ötür. Hesab edirəm ki, həmin qanuna dəyişiklikləri nəzərdə tutan qanun layihəsinin növbəti mərhələrdə oxunuşlarında və müzakirələrində bu məqamlar nəzərə alına bilər. Hələlik birinci oxunuşdur, növbəti oxunuşlarda bu məsələlərə baxılması və onların nəzərə alınması mümkündür. Mənim də fikrim belədir ki, qanunlar sadə, hamının başa düşə biləcəyi dildə yazılmalıdır. Burada qəlizliyə ehtiyac yoxdur. Qanunlarımızın dil baxımından sadələşdirilməsi lazımdır və mütləqdir”-deyə, komitə sədri sözlərinə əlavə edib.
Kamil HƏMZƏOĞLU
Etikxeber.az
