Şəhid və Qazi adını kirləməyin, kirlətməyin! AYIBDIR!!!-KAMİL HƏMZƏOĞLU YAZDI
Elçin Bayram oğlu Alıyev…
Əslən Qubadlılı, özü isə Bakı-Abşeron doğumlu…
Ali-hərbi təhsilli, peşəkar hərbçi…
Aprel döyüşləri və İkinci Vətən Müharibəsinin iştirakçısı…
Sözün əsl mənasında İgid, Qəhrəman, Vətən sevdalısı Azərbaycan övladı…
Vətən fədaisi, Nur üzlü İkinci Vətən Müharibəsi Şəhidi…
***
Əslən Qubadlı rayonundan olan Elçin Alıyev 1975-ci ilin 16 iyul tarixində Abşeron rayonunun Saray qəsəbəsində dünyaya gəlib…
Ana tərəfdən Şuşalı, ata tərəfdən Qubadlılı olan Elçingil sonra ata yurdlarına-Qubadlıya köçüblər…
Əvvəlcə Qubadlıda orta məktəbə gedən Elçin sonra təhsilini Mahruzlu kənd orta məktəbində davam etdirib…
Orta məktəbi bitirdikdən sonra isə ali hərbi təhsilə yiyələnib…
1993-1997-ci illərdə Bakı Ali Birləşmiş Komandanlıq Məktəbində oxuyub…
Ali təhsil illəri də daxil olmaqla, 25 ilə yaxın Azərbaycan Ordusunda peşəkar hərbçi kimi fəaliyyət göstərib, Mayor rütbəsinə yüksəlib…
2017-ci ildə Ordudan təxris olunub…
2016-cı ilin Aprel döyüşlərinin iştirakçılarından olub…
İstefada olsa da, bir peşəkar hərbçi, bir Vətən sevdalısı kimi könüllü şəkildə İkinci Vətən Müharibəsinə qatılıb, Vətəninin müdafiəsinə atılıb…
Oktyabrın 1-dən tarixi Zəfərimizə, Qələbimizə kimi uzun və şərəfli döyüş yolu keçib…
Döyüşüb, vuruşub, qəhrəmanlıqlar nümayiş etdirib…
Ailəsi, yaxınları ilə axırıncı dəfə noyabrın 3-ü və 4-də danışıb…
Sonra onunla əlaqə saxlamaq mümkün olmayıb…
Və tarixi Qələbəmizə sayılı dəqiqələr qalmış Şuşa şəhərində qəhrəmancasına Şəhidlik məqamına ucalıb…
Nəşi noyabrın 12-də İkinci Fəxri Xiyabanda-İkinci Şəhidlər Xiyabanında Əbədiyyətə uğurlanıb…
İstər Şəhidliyindən öncə, istərsə də Şəhidliyindən sonra xeyli sayda medallarla və 3-cü dərəcəli “Rəşadət” ordeni ilə təltif olunub…
Onu da qeyd edək ki, Elçingil ailədə üç övlad, üç qardaş olublar…
Kiçik-sonbeşik qardaşı Abbasəli Alıyev də Azərbaycan Ordusunun peşəkar hərbçilərindən, Aprel döyüşlərinin iştirakçılarından olub…
Hazırda iki övlad atasıdır…
Elçinin ortancıl qardaşı, üç övlad atası Emin Alıyev isə qardaşının Şəhidliyinə dözməyərək, ondan cəmi 5 gün sonra, 44 yaşının tamanına cəmi 2 gün qalmış, 17 noyabr tarixində dünyasını dəyişib…
Alıyevlər ailəsi cəmi beş günün içində iki ağır itki, iki faciə yaşayıblar…
Elçin də ailəli olub, üç oğlan övladı ailəsinə, Vətəninə əmanət qalıb…
***
Bu gün-11 may 2024-cü il tarixində bir qrup vətənpərvər ziyalı ilə birlikdə Şəhidimizin anası-Stansiya Sumqayıt adlanan ərazidə yaşayan Adilə ananı, Adilə Alıyevanı ziyarət etdik…
Şəhidimizin anası ilə bir araya gəldik…
Ona və Şəhidimizin əzizlərinə Allahdan səbr dilədik…
“Hər iki övladınızın ruhu şad, məkanı cənnətlik olsun!”-dedik…
Həm Şəhidimizin, həm də qardaş itkisinə dözməyərək dünyasını dəyişən Emin Alıyevin ruhu qarşısında baş əydiyimizi, bir ömür boyu Şəhidimizə, Şəhidlərimizə borclu olduğumuzu dilə gətirdik…
Cəmi beş günün içində iki oğlunu, iki övladını itirmiş Dərdli, Yaralı, həm də Dik duruşlu Adilə ana ilə dərdləşdik, söhbətləşdik…
Ona az da olsa, təsəlli verməyə, acısını xəfiflətməyə, yüngülləşdirməyə çalışdıq…
Gerçəkdən də…iki oğul, iki övlad itkisi çox ağır, çox çətin, çox dözülməzdir…
Allah kimsəyə yaşatmasın!
Allah bir daha və bir daha səbr və dözümünü versin, Adilə Ananın!
Bir daha balalarının ruhları və Onun qarşısında baş əyirik!
Allah bir daha və bir daha səbr və dözümünü versin!
Balaları Nurlar içində yatsın!
***
FOTOLAR:
Kamil HƏMZƏOĞLU (HƏMİDOV)
Etikxeber.az
