DİN-dən xarici ölkə vətəndaşlarına-MÜRACİƏT

Azərbaycan Respublikasının Daxili İşlər Nazirliyi (DİN) xarici ölkə vətəndaşlarına müraciət edib.

DİN-in mətbuat xidmətindən Etikxeber.az-a bildiriblər ki, müraciətdə əcnəbi və ya vətəndaşlığı olmayan şəxslərin ölkəmizə gəldikləri, yaxud Azərbaycanda icarəyə götürdükləri avtomobillərlə yol hərəkəti qaydalarını pozaraq cəriməni ödəmədən ölkədən çıxmaları hallarının qarşısının alınacağı qeyd edilib. Bu məqsədlə respublikanın bütün sərhəd məntəqələrində Baş Dövlət Yol Polisi İdarəsi tərəfindən beş dildə hazırlanmış buklet və plakat formasında xüsusi bildirişlərin paylanılmasına başlanılıb.

Müraciətdə bildirilib ki, Azərbaycan Respublikasının ərazisində yol hərəkəti qayda pozuntularına xüsusi texniki vasitələrin köməyi ilə nəzarət edildiyi üçün inzibati xətaya yol vermiş şəxslərin barəsində iştirakları olmadan elektron qərar çıxarılması, cərimə ödənişləri ilə bağlı qanunvericilikdə nəzərdə tutulmuş güzəşt və dəbbə pulu, habelə Azərbaycan Respublikasının Miqrasiya Məcəlləsinin 17.1.7-ci maddəsinin tələblərinə əsasən, ölkəmizin ərazisində inzibati xəta törətmiş əcnəbilərin və vətəndaşlığı olmayan şəxslərin barələrində inzibati tənbeh tədbirləri icra edilənədək onların 2020-ci il fevralın 13-dən başlayaraq Azərbaycan Respublikasından getmələri müvəqqəti məhdudlaşdırılacaq.

Buklet formalı bildirişlər sərhəd-keçid məntəqələrində nəqliyyat vasitələri ilə ölkəyə daxil olan sürücülərə paylanılır, plakatlar isə həmin məntəqələrdə yaxşı oxuna bilən yerlərdən asılıb.

Həmçinin ilin əvvəlində xarici ölkə vətəndaşlarına tətbiqi nəzərdə tutulan qanunvericiliyin tələbləri barədə məlumat çatdırılması məqsədilə Azərbaycan Respublikasının Xarici İşlər Nazirliyi vasitəsilə səfirliklərə müraciət edilib.

Etikxeber.az