Gənclər Fondu 2019-2020-ci tədris ilində gənclərin xaricdə magistr pilləsi üzrə təhsilini maliyyələşdirəcək

Çalışacağıq ki, xaricdə təhsilin maliyyələşdirilməsi ilə bağlı aprel ayının sonunda elan verək. 2019-2020-ci tədris ilində gənclərin xaricdə magistr pilləsi üzrə təhsilini  Gənclər Fondu maliyyələşdirəcək.

Etikxeber.az xəbər verir ki, bunu  parlamentin Gənclər və idman komitəsinin bu gün keçirilən iclasında Gənclər Fondunun 2018-ci ildəki fəaliyyəti haqqında hesabatının müzakirəsi zamanı fondun icraçı direktoru Fərid Cəfərov deyib.

O, qeyd edib ki, ilk il olduğu üçün bir qədər az tələbənin maliyyələşdirilməsini nəzərdə tutmuşuq. Yəqin ki, universitet və ixtisasların da siyahısı geniş olmayacaq.

İclasda gənclərin suallarını cavablandıran F.Cəfərov valideynlərin adi bir məsələyə görə övladlarına təzyiq etdiklərini qeyd edib.

“Bura universitetə daxil olmamaq da aiddir. Hətta, bu, intihar səviyyəsinə qədər gətirib çıxarır. Gənclərin İnkişaf və Karyera Mərkəzinin yaradılmasının əsas təkanverici amillərindən biri o olub ki, gənclərə universitetə daha yaxşı hazırlaşmaq üçün dəstək verilsin”-deyə, F. Cəfərov sözlərinə əlavə edib.

F. Cəfərov  Gənclər Fondunun həyata keçirdiyi layihələrin müsbət qarşılandığını vurğulayıb.

Kamil HƏMZƏOĞLU

Etikxeber.az