Goranboylu, Qızılhacılılı Antiterror Şəhidi Eşlad Süleymanovun məzarı, ocağı, ailəsi ziyarət olundu-ANASI VƏFA SÜLEYMANOVAYA “VƏTƏN NAMİNƏ” TƏŞKİLATININ “ŞƏHİD ANASI” MEDALYONU TƏQDİM EDİLDİ… – FOTOLAR – YENİLƏNİB

Daha bir Şəhid anasına “Şəhid anası” medalı (medalyonu) təqdim edilib.

Etikxeber.az xəbər verir ki, Goranboy rayonunun Qızılhacılı qəsəbəsinin Antiterror Şəhidlərindən olan Elşad Məhəmməd oğlu Süleymanovun anası Vəfa Nazar qızı Süleymanovaya “Şəhid anası” medalı və vəsiqəsi təqdim olunub.

Qubalı İkinci Vətən Müharibəsi Şəhidi Miqdad Abduləlimovun anası Tünzalə Abduləlimovanın rəhbəri olduğu “Vətən Naminə” Şəhid ailələrinə Dəstək İctimai Birliyinin təsis etdiyi “Şəhid anası” medalı (medalyonu) və vəsiqəsi bu gün, 3 avqust 2024-cü il tarixində Şəhid Elşad Süleymanovun anası, 1966-cı il təvəllüdlü Vəfa Süleymanovaya təqdim edilib.

“Şəhid anası” medalı və vəsiqəsini Vəfa Süleymanovaya jurnalist Kamil Həmzəoğlu təqdim edib.

Şəhidin anası da öz növbəsində “Vətən Naminə” təşkilatına və təşkilatın rəhbəri Tünzalə Abduləlimovaya minnətdarlıq bildirilib.

Eyni zamanda, Şəhidin məzarı, ocağı-valideynləri və iki övladı, həyat yoldaşı Şəhla Süleymanova ziyarət olunub.

Onlara bir daha Allahdan səbr və dözüm arzulanıb, Elşad Süleymanov da daxil olmaqla, cəmi Şəhidlərimizlə Fəxr edildiyi, Qürur duyulduğu vurğulanıb.

Sonda xatirə fotoları çəkdirilib.

Qeyd edək ki, Elşad Süleymanov 9 yanvar 1994-cü il tarixində Goranboy rayonunun Qızılhacılı qəsəbəsində sadə bir ailədə dünyaya gəlib.

Ailənin üç övladından biri, evin tək oğlu, iki bacının tək qardaşı olub.

Bacıları hazırda ailəli, hər ikisi də üç övlad anasıdır.

Elşad 2000-2011-ci illərdə Qızılhacılı qəsəbə 1 saylı tam orta məktəbində oxuyub.

Orta məktəbi bitirdikdən bir müddət sonra həqiqi hərbi xidmətə yollanıb və Əsgərliyini başa vurduqdan sonra yenidən evinə-ailəsinə dönüb.

2015-ci ilin avqustunda Qızılhacılılı, evin-ailənin tək qızı Şəhla Süleymanova ilə ailə həyatı qurub.

İki övladı dünyaya gəlib.

Məftun adlı oğlu, Mələk adlı qızı var.

2017-ci ildən isə həyatını Ordu, hərb ilə bağlayıb.

Azərbaycan Ordusunda MAXE kimi fəaliyyət göstərib.

İkinci Vətən Müharibəsində iştirak edib, “Vətən müharibəsi iştirakçısı” medalı ilə təltif olunub

Azərbaycan Silahlı Qüvvələri tərəfindən Qarabağ iqtisadi rayonunda keçirilən lokal xarakterli antiterror tədbirləri zamanı, 2023-cü ilin sentyabrın 19-da isə qəhrəmancasına Şəhidlik məqamına ucalıb.

Ancaq nəşi 10 gündən sonra-29 sentyabr 2023-cü il tarixində Qızılhacılı qəsəbə (Balakürd) qəbiristanlığındakı Şəhidlər Xiyabanında Əbədiyyətə uğurlanıb.

Şəhidliyindən sonra “Vətən uğurunda” medalı və 3-cü dərəcəli “Vətənə xidmətə görə” ordeni ilə təltif olunub.

O, həm də İkinci Vətən Müharibəsi Şəhidi Elman Mehman oğlu Həsənovun sinif yoldaşı olub.

Məkanı cənnətlik olsun!

Nur içində yatsın!

20:42

***

FOTOLAR:

Kamil HƏMZƏOĞLU (HƏMİDOV)

Etikxeber.az