Həmvətənimiz Dövlət Akademik Mariya Teatrında çıxış edəcək

2017-ci il yanvarın 3-də Sankt-Peterburq Dövlət Akademik Mariya Teatrında “Zoluşka” baleti nümayiş olunacaq.

Etikxeber.az teatrın saytına istinadla xəbər verir ki, “Mariya-2” səhnəsində nümayiş olunacaq səhnə əsərində gənc balet artisti Timur Əsgərov Şahzadə obrazını ifa edəcək.

T.Əsgərov 2008-ci ildə Bakı Xoreoqrafiya Akademiyasını bitirib. O, Azərbaycan Dövlət Akademik Opera və Balet Teatrı, Ukrayna Milli Akademik Opera və Balet Teatrında çalışıb. 2011-ci ildən Mariya Teatrının truppasında fəaliyyət göstərir.

Azərbaycan Respublikası Prezidenti İlham Əliyevin 2014-cü il 1 fevral tarixli Sərəncamı ilə Gənclər üçün Prezident Mükafatına layiq görülüb. 2015-ci ildə Rusiya Böyük Teatrının səhnəsində görkəmli bəstəkar Arif Məlikovun “Məhəbbət əfsanəsi” baletində Fərhadın partiyasını oynayıb.

T.Əsgərov Mariya Teatrı truppası ilə birlikdə Avropa, Amerika və Asiya ölkələrində qastrolda olub.

Etikxeber.az