İƏT xarici işlər nazirlərinin Düşənbə kommunikesi qəbul olundu – FOTO

Aprelin 17-də Tacikistanın paytaxtı Düşənbə şəhərində İqtisadi Əməkdaşlıq Təşkilatının (İƏT) xarici işlər nazirlərinin 23-cü iclası keçirilib. İclasda Azərbaycan Respublikasını xarici işlər nazirinin müavini Mahmud Məmməd-Quliyevin rəhbərlik etdiyi nümayəndə heyəti təmsil edib.

Etikxeber.az-ın XİN-ə istinadən xəbərinə görə, Tacikistana səfər əsnasında nazir müavini Mahmud Məmməd-Quliyev Tacikistanın xarici işlər naziri Sirocaddin Aslov ilə görüşüb. Səmimi dostluq şəraitində keçirilən görüşdə ölkələrimiz arasında ənənəvi tərəfdaşlıq münasibətləri qeyd olunaraq, siyasi, iqtisadi, mədəni və digər sahələrdə əməkdaşlıq müzakirə olunub.

İƏT-in iclasında çıxış edən nazir müavini Mahmud Məmməd-Quliyev İƏT çərçivəsində Azərbaycanın fəal iştirakı və üzv dövlətlər arasında hərtərəfli əməkdaşlığı dəstəklədiyini, praktiki əməkdaşlığın gücləndirilməsinə xidmət edən bir sıra təşəbbüslər irəli sürdüyü, regional nəqliyyat dəhlizləri layihələrini təşviq etdiyini qeyd edərək, ölkəmizdə mövcud olan siyasi, iqtisadi sabitlik və həyata keçirilən islahatlar barədə məlumat verib.

İƏT xarici işlər nazirlərinin 23-cü iclasının nəticəsi olaraq Düşənbə kommunikesi qəbul olunub.

Sənəddə İƏT regionunda həll edilməmiş münaqişələr, xüsusilə Ermənistan-Azərbaycan münaqişəsinin mövcud olmasının iqtisadi inkişaf və regionun potensialının tam şəkildə istifadəsinə, regional və daha geniş əməkdaşlığa ciddi şəkildə maneə olmasına münasibətdə narahatlıq ifadə olunaraq, bu kimi münaqişələrin beynəlxalq hüququn norma və prinsipləri, xüsusilə dövlətlərin ərazi bütövlüyü və suverenliyi əsasında tezliklə həll edilməsi üçün səylərin artırılmasının vacibliyi qeyd olunub.

Sənəddə ölkəmizin iştirak və təşviq etdiyi Bakı-Tbilisi-Qars dəmir yol xətti, Şimal-Cənub nəqliyyat dəhlizi, habelə, Bakı-Ceyhan neft kəməri, genişləndirilmiş Bakı-Ərzurum təbii qaz kəməri, Azərbaycan-İran-Rusiya elektrik ötürmə xətti kimi irimiqyaslı regional nəqliyyat və enerji layihələrinin əhəmiyyəti vurğulanıb.

Etikxeber.az

Kamil HƏMZƏOĞLU

Read Previous

MARKIN KONQRESDƏ MƏHKƏMƏSİ – Prezident seçkilərinin ikincisi – Zahid Oruc yazdı

Read Next

Sona Əliyevanın təşəbbüsü ilə şəhid Dinar Mustafayevin anım tədbiri keçirildi – FOTOLAR

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir