“İnternet medianın hüquqi statusu müəyyənləşdirilməlidir…” – ƏFLATUN AMAŞOV

Millət vəkili, Azərbaycan Mətbuat Şurasının (AMŞ) sədri Əflatun Amaşov  Milli Məclisin (MM)  payız sessiyasının qanunvericilik planının müzakirəsində çıxış edib.

Etikxeber.az çıxışı olduğu kimi, təqdim edir:

“Hər zamankıtək, bu dəfə də qanunvericilik planımız zənginliyi ilə diqqət çəkir. Müzakirəsi zəruri bilinən layihələrin hər biri vacibdir, günümüzlə səsləşir.

Mən də öz növbəmdə bəzi təkliflər irəli sürmək istərdim. İlk növbədə istərdim ki, Azərbaycanda diffamasiya dekriminallaşsın. Təbii ki, bu, əsasən ayrıca qanunun qəbulu ilə mümkün ola bilər. Diqqətinizə çatdırım ki, belə bir qanun yanlız təhqir və böhtana görə cinayət məsuliyyətinin aradan qaldırılmasını nəzərdə tutmur. Əgər, diffamasiya qanunumuz olacaqsa, biz tamamilə yeni məsuliyyət mühitinə qədəm qoymuş olacağıq. Təbii ki, məsuliyyət artacaq.

Daha bir təklifim internet media ilə bağlıdır. Baxın, bu gün internet media orqanlarının sayı çoxalır. Bu vəziyyətdə onların kütləvi informasiya vasitəsi kimi hüquqi statusu müəyyənləşməlidir. Yəni qanun müəyyən etməlidir ki, qəzet, jurnal, informasiya agentliyi ilə yanaşı, internet media orqanı da kütləvi informasiya vasitəsidir. Bu bizə gələcəkdə imkan verəcək ki, internet media orqanları ilə əlaqədar məsuliyyət kateqoriyalarını dəqiqləşdirək. Üstəlik müəyyən texniki məsələlər var. Tutalım, bir qəzetin KİV sayılması üçün onun tirajı, yayımı və sair məsələlər əsas götürülür. İnternet media ilə bağlı biz hansı parametrləri nəzərə alaq? Hesab edirəm ki, qanun bu sayaq məsələlərə də aydınlıq gətirəcək.

amasov-metbuat-aflatun

Onu da nəzərə alaq ki, bu gün ictimai rəy əsasən internet media orqanları üzərindən formalaşır. Belə olduğu təqdirdə bu KİV-lər nə üçün dövlət dəstəyindən faydalanmamalıdır? Əlbəttə, onların potensialı cəmiyyət üçün maraq kəsb edən məsələlərə yönləndirilməlidir. Hesab edirəm ki, internet medianın hüquqi statusunun müəyyənləşdirilməsi bu sayaq məsələlərə də aydınlıq gətirəcək.

Nəhayət, mən informasiya təhlükəsizliyi ilə bağlı da ayrıca dövlət sənədinin qəbulunu vacib sayıram. Düzdür, Milli Təhlükəsizlik Konsepsiyamızda informasiya təhlükəsizliyinə diqqət yetirilir. Ancaq bu diqqət epizodikdir, mahiyyəti tam açmır. Hesab edirəm ki, informasiya təhlükəsizliyinin özü kifayət qədər geniş anlayışdır. Burada bir çox məqamlara aydınlıq gətirilməlidir. Nəzərə alaq ki, qloballaşan dünyada dövlətlərin milli təhlükəsizliyi dedikdə, daha çox informasiya təhlükəsizliyinin üzərində dayanılır. Təklif edirəm ki, biz də bu amilli ciddi şəkildə nəzərdən keçirək”

Kamil HƏMZƏOĞLU

Etikxeber.az

 

 

 

Read Previous

Millət vəkili təhsil kreditlərindən, tələbə yataqxanalarından – DANIŞDI

Read Next

“Seçki Məcəlləsinə dəyişikliklər edilməlidir…” – SİYAVUŞ NOVRUZOV

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir