Parlamentdə anti-Rusiya müzakirələri

Milli Məclisin (MM) noyabrın  29-da keçirilən növbəti plenar iclasında cari məsələlərin müzakirəsi zamanı son vaxtlar Ermənistanla hərbi müttəfiqliyini daha da dərinləşdirən Rusiya ilə münasibətlərə yenidən baxmaq tələb olunub. Qeyd edək ki, cıxışlarda anti-Rusiya əhval-ruhiyyəsi daha çox üstünlük təşkil edib.
“Hər dəfə də deyiblər ki, bilməmişik, xəbərimiz olmayıb, üzr istəyirik…”

Millət vəkili Qənirə Paşayeva çıxışında yenidən xarici sənət, iş adamlarının, siyasətçilərin, diplomatların Dağlıq Qarabağa qanunsuz səfərlərindən danışıb.Millət vəkili qeyd edib ki, həmin adamların böyük əksəriyyəti ora gedib tədbirlərdə iştirak edib sonra Bakıya gələrək tədbirlərə qatılıblar: “Hər dəfə də deyiblər ki, bilməmişik, xəbərimiz olmayıb, üzr istəyirik və.s. Bir çoxlarının da adları sonradan “qara siyahı”dan çıxarılır. Bu günlərdə də Fransa parlamentinin “Fransa-Qarabağ” dostluq qrupunun üzvləri qondarma DQR-ə qanunsuz səfər etdilər. Hesab edirəm ki, bunlar qəti yolverilməzdir və bu cür hallara qarşı daha sərt tədbirlər görülməlidir”.

 
Azərbaycan-Rusiya münasibətlərinə yenidən baxılmalıdır”
 
Deputat Qüdrət Həsənquliyev çıxışı zamanı bildirib ki, son günlər Rusiyanın Ermənistana “İsgəndər” raket kompleksləri verməsi, prezident Sarkisyanın Moskvaya dəvət olunması və oradan Azərbaycanı hədələməsi artıq Bakının ciddi mövqe ortaya qoymasını tələb edir. Deputat deyib ki, Sarkisyan aprel döyüşlərində  gizlənmək üçün özünə siçan dəliyi axtarırdı: “Amma Moskvada siçan dəliyi tapandan sonra bizə meydan oxumağa başlayıb. Arxasında Rusiyanın ona verdiyi “İsgəndər” raketini hiss edib, belə “cəsarətlə” çıxış etməyə başlayıb. Azərbaycan Rusiya ilə münasibətlərin yaxşılaşdırılmasının tərəfdarıdır və mən də dəfələrlə bəyan etmişəm ki, Rusiya ilə münasibətlərimizi inkişaf etdirməliyik. Amma o da bəllidir ki, Qarabağ münaqişəsinin həllində Rusiya vasitəçi olduğu kimi, işğalçı ölkənin də arxasında dayanan elə Rusiyadır. Rusiya-Ermənistan münasibətlərinin bu səviyyəsi Rusiya-Azərbaycan münasibətlərinə uyğun gəlmir. Rusiya-Azərbaycan münasibətlərinin strateji tərəfdaşlıq səviyyəsində olduğu bəyan edilsə də, reallıq bunun əksini sübut edir. Artıq buna göz yummaq olmaz. Rusiyaya açıq müraciət edərək münasibətlərə aydınlıq gətirməliyik. Əgər Rusiya Azərbaycanla münasibətlərini həqiqətən strateji tərəfdaşlıq səviyyəsində qurmaq istəyirsə, o zaman Qarabağ münaqişəsində obyektiv və bitərəf mövqe nümayiş etdirməlidir. Belə olmayacaqsa, Azərbaycan-Rusiya münasibətlərinə yenidən baxılmalıdır. Rusiya Azərbaycana qarşı münasibətini dəyişməzsə, o zaman Azərbaycan İsrail, Pakistan və digər ölkələrlə daha çox yaxınlıq etməlidir”.
 
Əgər Rusiya iki ölkə arasında imzalanan sazişə əməl etməzsə, o zaman bu sazişdən imtina edilməlidir”

Millət vəkili Asim Mollazadə çıxışında qeyd edib ki, Bakı İrəvanla deyil, Moskava ilə danışıqlara başlamalıdır: “Ermənistan Rusiyanın bir əyaləti olduğundan biz Qarabağ münaqişəsinin həlli ilə bağlı Rusiya ilə danışıqlar aparmalıyıq. Müstəqil olmadığından da Ermənistan danışıqlar prosesində imitasiya edir. Yaranmış vəziyyəti nəzərə alaraq Azərbaycan Ermənistanla münaqişənin həlli ilə bağlı aparılan danışıqlardan imtina edərək, ermənlərin həqiqi ağası olan Rusiya ilə Qarabağ münaqişəsinin həlli ilə bağlı danışıqlara başlamalıdır”. Xocalı faciəsinin günahkarlarının əksəriyyətinin Rusiyada gizləndiyini deyən millət vəkili təklif edib ki, Azərbaycan Rusiyaya müraciət edərək Xocalı soyqrımını törədən 366-cı alayın hərbçilərinin və orada gizlənən ermənilərin Azərbayacana təhvilinə nail olmalıdır: Çünki Azərbaycanla Rusiya arasında cinayətkarların ekstradisiyası haqqında saziş var. Biz bu sazişdən istifadə etməklə Rusiyadan bu cinayətkarların Azərbaycana təhvil verilməsinə və onlar üzərində xarici hakimlərin iştirakı ilə məhkəmənin təşkil olunmasına nail olmalıyıq. Biz xarici hakim və vəkillərin iştirakı ilə belə bir məhkəməni təşkil etməklə, Xocalı soyqrımının beynəlxalq hüquqi müstəvidə tanınmasına nail ola bilərik. Əgər Rusiya iki ölkə arasında imzalanan sazişə əməl etməzsə, o zaman bu sazişdən imtina edilməlidir”.

Deputat Rasim Musabəyov öz növbəsində  Rusiyaya qarşı sərt çıxışlara etiraz edib, əksinə, bu ölkə ilə daha yaxın, dost münasibətdə olmaqla, problemin həllinə üstünlük verilməsinin vacibliyini vurğulayıb.

” Azərbaycan hökuməti Qarabağ ermənilərinə müraciət etməlidir”

Digər millət vəkili  Zahid Oruc deyib ki, Azərbaycan hökuməti Qarabağ ermənilərinə müraciət etməlidir. Z.Oruc bildirib ki, doğrudur, bu müraciətin də perspektivli olması inandırıcı deyil: “Amma biz öz borcumuzdan çıxmalıyıq. Biz Dağlıq Qarabağ ermənilərinə deməliyik ki, sizi Qarabağda girov saxlayan Ermənistan hakimiyyətidir. Əgər silahı yerə qoyub təslim olsanız, sizi Azərbaycan vətəndaşlığı gözləyir. Azərbaycan dövlətini, Konstitusiyasını, ərazi bütövlüyünü qəbul edən, silahı yerə qoyan erməniləri daha yaxşı perspektiv gözləyir. Amma Xocalı faciəsini və xalqımıza qarşı digər cinayətləri törətmiş ermənilər bağışlanılmayacaq”.

 

“Avropalı deputatların bizim regionla bağlı çox ciddi narahatlıqları var”

 

“Bu yaxınlarda Azərbaycan nümayəndə heyəti Strasburqda səfərdə oldu. Biz orada müxtəlif iki tərəfli görüşlər keçirdik. Birmənalı olaraq demək istəyirəm ki, Avropada nümayəndə heyətimizin görüşdüyü hər bir deputat yenidən AVRONEST PA-dakı fəaliyyətimizi bərpa etməyimizi yüksək qiymətləndirdi”.

Bunu isə AVRONEST Parlament Assambleyasının Azərbaycan nümayəndə heyətinin rəhbəri, MM-in Gənclər və idman komitəsinin sədri Fuad Muradov deyib. Deputat bildirib ki, AVRONETS-də bir sıra deputatlar və vəzifəli şəxslərlə görüşlər keçirilib: “Biz eyni zamanda Avropa deputatları ilə, qurumun 8 siyasi qrupundan 6-sının rəhbər şəxsləri ilə o cümlədən, AVRONEST-in xarici əlaqələr komitəsinin sədri, Avropam parlamentinin vitse-spikerləri ilə görüşdük. Birmənalı olaraq orada vəziyyət belədir ki, avropalı deputatların bizim regionla bağlı çox ciddi narahatlıqları var. Narahatlıq odur ki, artıq Ermənistanın mövqeyi bəllidir. Hətta AVRONEST-in büro iclasında da erməni nümayəndə heyəti bu dəfə də iclası pozmağa cəhd etdi. Avropalı deputatlar erməni deputatlara sərt mövqe göstərdilər ki, “nəyə görə siz həmişə iclasları pozmağa çalışırsınız?. Siz bilinməyən bir mövqeyi həyata keçirirsiniz”. Artıq mən bir çox Avropa parlamentinin deputatları ilə danışanda açıq dedilər ki, biz birmənalı şəkildə kimin işğalçı və kimin işğaldan əziyyət çəkən olduğunu bilirik. Avropa Parlamentinin Dağlıq Qarabağla bağlı qətnaməsi də var. Biz çalışacağıq ki, gələcəkdə bu qətnamənin həyata keçirilməsində real mexanizm olsun. Əsas problemimiz odur ki, Avropa parlamentində bu gün bu mexanizmlər mövcud deyil. Artıq bütün məsələlər ortadadır. Ermənistanın dilənçi mövqeyinin olmasını Avropa deputatları artıq bilirlər. Onların müxtəlif ittifaqlara qoşulmaqda əsas məqsədləri odur ki, sosial və iqtisadi problemlərini həll etsinlər”.

F. Muradov söyləyib ki, bu gün erməni lobbisinin təsirində olan avropalı deputatlar da var: “Təbii ki, Avropa Parlamentində bir qrup deputatlar var ki, onlar həm erməni lobbisinin təsirindədir və bir qrup da var ki, onlar ümumiyyətlə Azərbaycanı belə tanımır. Bizim bu görüşlərdə əsas məqsədimiz o idi ki, Avropalı deputatlara sübut edək ki, Azərbaycan öz müstəqil siyasətini hər zaman həyata keçirəcək, Azərbaycanın milli maraqlarının həyata keçirilməsində kim bizimlə əməkdaşlıq etmək istəyirsə biz də onlarla əməkdaşlıq edəcəyik. Avropa parlamentində çox açıq şəkildə bildirdik ki, siz Azərbaycanla bağlı qətnamələri qəbul edəndə təcili hərəkət edəndə bu həlı o demək deuil ki, Azərbaycanda hansısa təcili məsələ və yaxud vəziyyət var. Yəni, bu o demək deyil ki, Azərbaycanla bağlı təcili qətnamə qəbul edilməlidir. Yaxşı olar ki, gələcəkdə belə bir məsələlər onların həm AVRONEST-də və həm də Avropa parlamentində Azərbaycanla bağlı qətnamə qəbul edilən zaman bizimlə məsləhətləşsinlər”.

Etikxeber.az

Read Previous

Fazil Mustafa: “MİR” telekanalının Azərbaycanda yayımlanmasına nə ehtiyac var?”

Read Next

Qüdrət Həsənquliyev: “Bu məsələni inhisara almaq nə qədər düzgündür?”

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir