“Qarabaq ermənilərdən tezliklə azad olunacaq…Zəfər yürüşünə az qalıb…”-EKS-DEPUTAT YAZIR

Bu gün Azərbaycan Ordusu mətanətlə, vüqarla Ermənistanın başlatdığı hərbi təxribatlara amansızcasına cavab verir, əsgərindən tutmuş generalına qədər hər kəs ön cəbhədədir.

Döyüş zamanı müdafiənin ön xəttində olan Azərbaycan Ordusunun general-mayoru Polad Həşimovun qəhrəmancasına şəhid olması generallarla əsgərlərin bir çərgədə, ön sırada düşmənə qarşı vuruşduğunu bir daha təsdiq edir.

General tabeliyində olan hərbçilərdən özünü fərqləndirmir, döyüş tapşırığını yerinə yetirmək üçün əsgərlərlə çiyin-çiyinə vuruşur, öz canını fəda edir. Ermənistan ordusunun generalları isə sıravi əsgərlərin arxasında gizlənərək öz canlarını qorumaqla məşğuldurlar, onların zabitləri döyüş meydanından qaçırlar.

Ermənistan öz təxribatlarının sərt qarşılığını alandan sonra ənənəvi xislətini göstərir, xarici havadarlarından kömək diləyir, Azərbaycanın hərbi həmlələrini dayandırması üçün göz yaşları tökür. Ermənistanın Rusiyadakı səfirinin Lavrova, Zaxarovaya yalvarışları işğalçı ölkənin qorxaq və çirkin simasını göstərir. Eyni zamanda, Ermənistanın güvəndiyi təşkilatın- Kollektiv Təhlükəsizlik Müqaviləsi Təşkilatının (KTMT) təcili iclasının keçirilməsi üçün hay-həşirləri də boşa çıxır, müttəfiqləri də onu dəstəkləmir.

Ermənistan beynəlxalq birliyə, xarici dövlətlərə yalvarır ki, Azərbaycanı dayandırsınlar. Ancaq anlamır ki, Azərbaycanın torpaqlarını işğalda saxlayır və illərdir ki, xəbərdarlıqlara məhəl qoymur. Azərbaycam heç vaxt ərazisinin 20 faizinin itirilməsi ilə barışmayacaq. 10 milyonluq Azərbaycan xalqı 2,5 milyonluq Ermənistandan hər bir sahədə qat-qat güclüdür, milli vətənpərvərlik və döyüşkənlik əzmi müqayisəolunmaz dərəcədə yüksəkdir. Azərbaycan illərdir ki, beynəlxalq təşkilatlardan münaqişənin sülh yolu ilə həllini tələb edir, süni danışıqların nəticə vermədiyini anladır və artıq xaqlın və dövlərin səbrinin tükəndiyini, öz ərazilərini işğaldan azad etmək məcburiyyətində qaldığını bəyan edir.

Bunu bütün dünya dövlətləri birdəfəlik anlamalıdır. Ali Baş Komandan İlham Əliyev Təhlükəsizlik Şurasının iclasında bunu çox açıq və konkret şəkildə beynəlxalq ictimaiyyətin diqqətinə çatdırdı, beynəlxalq təşkilatları, ATƏT-in Minsk qrupunu, erməni terrorizminin arxasında dayanan güclərə xəbərdarlıq etdi, bütün məsuliyyətin Ermənistanın hərbi-siyasi rəhbərliyinin daşıdığını anlatdı. Ermənilərin hiyləgərliklə və xəbisliklə hərbi təxribatlar törətməsinin yaxşı nəticələnməyəcəyini bəyan etdi:

“Bütün məsuliyyət Ermənistanın rəhbərliyi üzərinə düşür. Bu siyasət Ermənistan üçün böyük təhlükə mənbəyidir”.

Bu gün BMT öz qəbul etdiyi qətnamələrə əməl olunmadığını görür, Avropa İttifaqı, Avropa Parlamenti, Avropa Şurası, digər beynəlxalq təşkilatlar Ermənistanın təcavüzkarlığı ilə bağlı qəbul etdikləri sənədlərə məhəl qoyulmadığının şahididirlər, ATƏT-in Minsk qrupu sülh danışıqlarının heç bir nəticə vermədiyini çox yaxşı anlayır. Belə bir vəziyyətdə Azərbaycanın öz torpaqlarını azad etməsi üçün genişmiqyaslı hərbi əməliyyatlara başlamasını da artıq yaxşı dərk etməlidirlər. Dünya dövlətləri ədalətin kimin tərəfində olmasını da yaxşı görür. Bir çox ölkələr Azərbaycanın haqq səsinə səs verir, Ermənistanı qınayırlar. Azərbaycana qardaşlıq borcunu əsirgəməyən Türkiyənin isə bu dar günlərdə bizimlə birgə olması hər birimizi qürurlandırdı, düşmənin canına vəlvələ saldı.

Türkiyə Prezidenti Rəcəb Tayyib Ərdoğanın Ermənistanın əndazəni aşan hərəkətini qəti şəkildə pisləyərək məqsədli bir təxribatın yeni bir münaqişə mənbəyi yaratmaq niyyəti güddüyünü və Ermənistanın bu addımı ilə peşman olacağını xəbərdar etməsi Türk birliyinin gücünü dünyaya nümayiş etdirir. Qardaş ölkənin xarici işlər naziri Mövlud Cavuşoğlu və və müdafiə naziri Hulisi Akar da bütün imkanları ilə Azərbaycanın yanındayıq olmaqda davam edəcəyini bildirməsi qardaşlığın möhtəşəmliyini daha da möhkəmləndirir.Ermənistan artıq çıxılmaz vəziyyətdədir, bütün cəhdləri iflasa uğrayır. Prezident, Ali Baş Komandan İlham Əliyevin Təhlükəsizlik Şurasının iclasında bəyan etdiyi kimi Ermənistanın hər dəfə təxribatlarının qarşısı qətiyyətlə alınır və erməni terrorçularına daha ağır adekvat cavab veriləcək.

“Hərbçilərimizin, şəhidlərimizin qanı yerdə qalmayıb və qalmayacaq. Biz bütün imkanlardan istifadə edib özümüzü qoruyacağıq və düşmənə yenidən onun öz yerini göstərəcəyik”.

Ali Baş Komandanın bu qətiyyəti və Onun sarsılmaz iradəsi Azərbaycan xalqının milli-vətənpərvərlik ruhunu artırır, düşmənə qarşı mübarizlik rəşadətini gücləndirir, bu şərəfli mübarizədə Prezidentin ətrafında sıx birləməyə səfərbər edir. Azərbaycanın Birinci Vitse-prezidenti Mehriban Əliyeveanın sosial mediada çıxışı da xalqımızın milli-hərbi mübarizlik gücünə güc qatır. Mehriban xanımın “Düşmənə layiqli cavab verildi və bu, hər zaman belə olacaqdır! Biz daha da güclü olmalıyıq və olacağıq, daha sıx birləşəcəyik” fikri milli birliyin möhtəşəmliyini möhkəmləndirir.

Onun şəhid analarına və atalarına dərin kədər və hörmətini ifadə etməsi Bir Ananın qəlbinin sızıntısıdır, igid və cəsur Azərbaycan oğullarına dərin məhəbbətin ifadəsidir. Mehriban xanım Əliyeva xalqımızın bu çətin gün günlərdə daha sıx birləşməsindən qürur duyaraq Qarabağa gedən zəfər yolunun bizim haqq işimiz olduğunu bildirir:

“Azərbaycan xalqı işğalla heç vaxt barışmayacaq! Bizim torpağımız, Vətən uğrunda mübarizəmiz müqəddəsdir! Bizim işimiz haqq işidir və Allah bizimlədir!”

Bu gün hamı doğma Vətən Azərbaycanın ərazi bütövlüyünün bərpası üçün əlindən gələni etməyə çalışır…

…Azərbaycan xalqının bu gün yumruq kimi birləşərək Mübariz ruhda qətiyyətlə düşmənə qarşı daha amansız olduğu və Vətən, Dövlət üçün hər kəs canını fəda etməyə hazır olduğu vaxtlarda belə yaramaz hərəkətlər yolverilməz və bağışlanmazdır.

Bu gün hamı Ali Baş Komandan İlham Əliyevin ətrafında sıx birləşib, Onun əmrini gözləyir. Hər kəs bu gün daha məsuliyyətlə, diqqətlə və mətanətlə, səbrlə dövlətin qərarlarına əməl etməli, ağıl və məntiqlə milli birlik nümayiş etdirməlidir.

Əmin olmaq lazımdır ki, Qarabaq ermənilərdən tezliklə azad olunacaq. Zəfər yürüşünə az qalıb.

Vaqif ABDULLAYEV,

Eks deputat

Etikxeber.az