“Sədərək” ticarət mərkəzində – YANĞIN TAM SÖNDÜRÜLÜB – YENİLƏNİB – (3)

Fövqəladə Hallar Nazirliyinin (FHN) “112” qaynar telefon xəttinə, Bakı şəhərinin Qaradağ rayonunda “Sədərək” ticarət mərkəzinə məxsus anbarlardan birində yanğın baş verməsi barədə məlumat daxil olub.

Nazirlikdən Etikxeber.az-a verilən məlumata görə, FHN-nin Dövlət Yanğından Mühafizə Xidmətinin yanğından mühafizə bölmələri və Xüsusi Riskli Xilasetmə Xidmətinin müvafiq xilasetmə qüvvələri çağırış ünvanına cəlb olunub.

Hazırda yanğınsöndürmə işləri davam etdirilir. Əlavə məlumat veriləcək.

***

“Sədərək” Ticarət Mərkəzində yanğın parfümeriya mağazasında başlayıb.

Yanğın daha sonra müxtəlif malların saxlandığı anbara keçib.

Yanğın zamanı bir nəfər xəsarət alıb və təcili xəstəxanaya aparılıb.

Hazırda anbarda yanğının söndürülməsi istiqamətində işlər davam etdirilir.

***

Yanğın zamanı xəsarət alanlar olub.

Səhiyyə Nazirliyindən  verilən məlumata görə, hadisə yerinə 15 təcili yardım briqadası cəlb olunub.

Yanğın zamanı yeddi nəfər FHN əməkdaşı tüstüdən zəhərlənmə şikayəti ilə Respublika Toksokologiya Mərkəzinə yerləşdirilib.

***

“Sədərək” Ticarət Mərkəzindəki yanğın artıq 3 saata yaxındır ki, davam edir. Hazırda yanğın tam məhdudlaşdırılıb, yanma təhlükəsi yoxdur”.

Bunu da jurnalistlərə açıqlamasında Fövqəladə hallar nazirinin müavini general-leytenant Etibar Mirzəyev bildirib.

Nazir müavini müxtəlif parfümeriya malları, sabunlar, dezodorant, doldurucu qaz balonlarının olduğu anbarda 700 kvadratmetrə qədər sahənin yandığını nəzərə çatdırıb: “Bu mallar həddindən çox olduğu üçün anbara daxil olmaq qeyri-mümkündür. Biz traktor vasitəsi ilə anbarın divarlarını uçuraraq içəri daxil olmuşuq. Qısa müddətdə yanğın tam söndürüləcək “.

E. Mirzəyev ikinci çağırışla hadisə yerinə 25-dən çox yanğınsöndürən maşının, 120-dən çox yanğınsöndürənin cəlb olunduğunu nəzərə çatdırıb.

Yanğının səbəblərinə gəlincə, E.Mirzəyev qeyd edib ki, yanğın tam söndürüldükdən sonra araşdırma aparılacaq: “Araşdırmanın nəticəsi barədə məlumat veriləcək. Onu da deyim ki, sahibkarlara mallarının əksəriyyətini çıxarmağa imkan yaratdıq. Yanğın söndürüləndən sonra dəymiş ziyanın həcmi araşdırılacaq və bu barədə müvafiq məlumat veriləcək”.

***

“Sədərək” ticarət mərkəzində baş vermiş yanğın artıq söndürülüb.

Bu barədə FHN-nin saytında məlumat yer alıb.

Məlumata görə, Bakı şəhərinin Qaradağ rayonunda “Sədərək” ticarət mərkəzinin ərazisində anbarlardan birində baş vermiş yanğın FHN-nin Dövlət Yanğından Mühafizə Xidmətinin yanğından mühafizə bölmələri tərəfindən söndürülüb.

Əlavə məlumat veriləcək.

Etikxeber.az