Şəhid Əliyev Əfqan Mirzə oğlu-ƏBƏDİYAŞAR QƏHRƏMAN!

Azərbaycan torpağı tarix boyu Vətən sevgisini hər şeydən üstün tutan igid oğullar yetirib.

O oğullar ki, doğulduqları torpağın azadlığı uğrunda canlarından keçərək adlarını xalqın yaddaşına əbədi həkk ediblər.

Belə qəhrəmanlardan biri də Əliyev Əfqan Mirzə oğlu idi.

Əfqan Mirzə oğlu Əliyev 19 aprel 1972-ci ildə Füzuli rayonunun Yuxarı Əbdürrəhmanlı kəndində dünyaya göz açmışdı. Uşaqlıq illəri doğma kəndin saf havası, geniş tarlaları və zəhmətkeş insanları arasında keçmişdi. O, sakit təbiətli, mehriban, böyüyə hörmət edən, kiçiyə qayğı göstərən bir oğlan idi. Kənd camaatı onu tərbiyəsi, dürüstlüyü və səmimiyyəti ilə sevirdi. Məktəb illərində çalışqanlığı, mərdliyi və dostcanlılığı ilə seçilir, hər kəsin rəğbətini qazanırdı. Əfqanın saf qəlbi, təmiz niyyəti və insanlara olan sevgisi onu kəndin sevilən oğullarından birinə çevirmişdi.

Ailəsinə bağlılığı onun ən gözəl xüsusiyyətlərindən idi. Valideynlərinə hörmətlə yanaşar, zəhmətdən çəkinməz, ailəsinin dayağı olmağa çalışardı. Hər kəs onun haqqında yalnız xoş sözlər danışardı. O, sözübütöv, etibarlı və Vətəninə ürəkdən bağlı bir gənc idi.

Vaxtı çatanda hərbi xidmətə yollandı. Xidmətini Rusiyanın Murmansk vilayətində nümunəvi əsgər kimi başa vurdu. Hərbi intizamı, məsuliyyəti və dözümlülüyü ilə seçildi. Bu illər onun xarakterini daha da möhkəmləndirdi və Vətən sevgisini daha da artırdı.

1993-cü ildə hərbi xidmətdən doğma yurda qayıtdı. Lakin həmin günlər Azərbaycanın ən ağır sınaq dövrü idi. Qarabağ uğrunda şiddətli döyüşlər gedirdi. Əfqan cəmi bir həftə ailəsinin yanında qala bildi. Vətənin darda olduğunu görən igid oğul tərəddüd etmədən yenidən silaha sarıldı və cəbhəyə yollandı.

Əsgər kimi döyüşlərə qatılan Əfqan Mirzə oğlu böyük cəsarət və mərdliklə vuruşdu. Onun üçün Vətən hər şeydən üstün idi. Döyüş yoldaşları onu qorxmaz, mərd və etibarlı silahdaş kimi xatırlayırlar.

23 iyul 1993-cü ildə Füzuli rayonunun Cuvarlı kəndi uğrunda gedən ağır döyüşlərdə qəhrəmancasına şəhid oldu. Cəbhəyə yollandıqdan cəmi bir neçə gün sonra Vətən uğrunda canından keçərək şəhidlik zirvəsinə ucaldı. Cəmi iyirmi bir illik ömrü ilə əbədiyyət qazandı.

Əfqan subay idi. Qurmağa macal tapmadığı ailəsini, yaşaya bilmədiyi arzularını Vətən yolunda fəda etdi. Doğma kəndinin sevimli oğullarından biri olan Əfqan bu gün də böyük ehtiramla xatırlanır. Onu tanıyan hər kəs vaxtsız itkisinə heyifsilənir, mərdliyindən və insanlığından danışır.

Bu gün şəhidimizin əziz xatirəsini yaşadanlardan biri də qardaşı Əlinin qızı Aygün xanımdır. O, əmisi haqqında böyük qürur hissi ilə danışır. Əmisinin Vətən uğrunda göstərdiyi qəhrəmanlıq onun üçün əsl vətənpərvərlik məktəbidir. Lakin bu qürurun yanında dərin bir kədər də yaşayır. Çünki əmisi ilə uzun illər birlikdə olmaq, onun qayğıkeşliyini hiss etmək, həyat təcrübəsindən bəhrələnmək ona qismət olmayıb. Əfqanın yarımçıq qalan ömrü ailənin qəlbində sağalmaz bir yara, eyni zamanda sonsuz qürur mənbəyidir. Aygün xanım inanır ki, şəhidlər ölmürlər, onlar xalqın yaddaşında, doğmalarının dualarında və azad Vətənin səmasında əbədi yaşayırlar.

Bu hisslər onun qəlbindən süzülərək misralara çevrilir:

Şəhid Əfqan Mirzəoğlunun xatirəsinə

(Aygün xanımın dilindən)

Əmim, adın dillərdədir,

Yerin qəlbimdə dərdədir.

Qürurum da, həsrətim də,

Sənin müqəddəs yerdədir.

Görmədiyim illər üçün,

Yanır ürək həsrət üçün.

Can verdin sən bu Vətənə,

Baş əyirəm qeyrət üçün.

Ruhun gəzir el-obada,

Adın yaşayır dünyada.

Əmim, səni unutmaram,

Dualarım dodağımda.

Belə qəhrəmanlar ömürlərinin uzunluğu ilə deyil, Vətənə bəxş etdikləri ömürlə tarix yazırlar. Əfqan Mirzə oğlu Əliyev cəmi iyirmi bir illik ömrünü xalqının azadlığına həsr etdi və şəhadəti ilə əbədiyyət qazandı. Onun adı Füzulinin qəhrəman oğulları sırasında daim hörmətlə çəkiləcək, igidliyi gələcək nəsillərə örnək olacaq.

Allah Əfqan Mirzə oğlu Əliyevə və bütün şəhidlərimizə rəhmət etsin!

Ruhları şad, məqamları uca olsun!

Amin!

Raziyə KAMİLQIZI

Etikxeber.az