Səttar Mehbalıyev bəzi deputatlar və məmurlardan şikayətləndi – YENİLƏNİB (2)

Milli Məclisdə (MM) ölkədə qeyri-qanuni əlillik status daşıyanlar və bəzi əlillərin sosial müavinət baxımından incidilməsi ilə bağlı Əmək və Əhalinin Sosial Müdafiəsi Nazirliyinə müraciət olunub.

Etikxeber.az  məlumat verir ki, MM-in Sosial siyasət komitəsinin növbəti  iclasında çıxış edən millət vəkili Yaqub Mahmudov bildirib ki, ölkədə həddən artıq Qarabağ müharibəsi əlili və digər qruplardan olan əlil statusu daşıyan şəxslər var.

Deputat iddia edib ki, bir çox şəxsə bu status qeyri-qanuni verilib və bunun qarşısı alınmalıdır: “Belə çıxır ki, ölkənin yarısı ya əlildir və ya da Qarabağ müharibəsində yaralanıb. Nazir Səlim Müslümova müraciət edirəm ki, bunun qarşısı alınsın. Bu, həm büdcə məsrəfidir, həm də həqiqi əlillərimizlə müqayisədə düzgün münasibət deyil”.

Bundan başqa, Y. Mahmudov bildirib ki, bəzi həqiqi əlillərin sosial dəstək baxımından incidilməsi faktları var və bu cür halların qarşısı alınmalıdır.

***

Deputat Aytən Mustafayeva da əlillərlə bağlı narahatlıq olduğunu və bu məsələyə ciddi yanaşılmasının vacibliyini bildirib:

“Əlillərin müavinətləri artırılmalıdır. Bundan başqa, əlilliyin təsdiqlənməsi hər il aparılmamalıdır. Əlillərə 50 manat müavinət verilir. Bu 50 manat nəyə bəs edir? Onlar da Azərbaycan vətəndaşlarıdır. Təhsil almaq və digər bu kimi hüquqları var. Rayonlarımızda lal və karlar üçün məktəb yoxdur. Mənə Astaradan ailə müraciət edib. Bu ailənin bütün üzvləri lal və kardır. Amma orada oxumağa məktəb yoxdur. Lal və ya kardır deyə işləyə bilməzmi? Ələ baxmasınlar deyə, onlara iş yeri verməliyik. Rusiya Dumasında əlil deputatlar da var. Milli Məclisin binasında heç imkan yoxdur ki, əlil içəri girə bilsin. Birinci özümüzdən başlamalıyıq”.

***

Deputatlara cavab olaraq əmək və əhalinin sosial müdafiəsi naziri Səlim Müslümov etiraf edib ki, əksər qurumlarda bu cür şərait yoxdur:

“Özümü tərifləmirəm, mən özüm nazir gələnə qədər heç Əmək və Əhalinin Sosial Müdafiəsi Nazirliyinin özündə də əlillərin girişi və çıxışı üçün şərait yox idi. Dərhal göstəriş verdim və bu artıq həll olundu. Bütün orqanlara, təşkilatlara da məktub göndərmişik ki, binaların giriş-çıxışında əlillər üçün xüsusi şərait yaradılsın. Bununla bağlı qanunvericiliyə dəyişiklik də hazırlanıb və hazırda baxılması üçün Prezident Administrasiyasına təqdim olunub”.

***

Azərbaycan Həmkarlar İttifaqının sədri, deputat Səttar Mehbalıyev  isə bəzi deputatların və məmurların ondan həddən artıq istirahət mərkəzlərinə göndəriş vərəqəsi tələb etməsindən şikayətlənib.

S. Mehbalıyev bildirib ki, bəzi deputatlar ondan hətta ildə 4-5 dəfə vəsiqə istəyir.

O, qeyd edib ki, bunlar arasında digər dövlət qurumlarında olan bəzi məmurlar da var:

“Mən onlara izah edə bilmirəm ki, hər adama ildə bir dəfə düşür. Bundan da səmərəli istifadə etmək lazımdır. Amma təəssüf ki, hər il dalbadal məndən bunu tələb edirlər”.

Kamil HƏMZƏOĞLU

Etikxeber.az

 

Read Previous

Prezident YAP-ın 25 illik yublieyində – YENİLƏNİB (1) – FOTO

Read Next

“Qadınların yaş həddinin 78, kişilərin isə yaş həddinin 73 olacağı gözlənilir” – NAZİR – FOTO – YENİLƏNİB (1)

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir