Şahidlə vəkil arasında qalmaqal yarandı

Oktyabrın 31-də  Bakı Ağır Cinayətlər Məhkəməsində hakim Əfqan Hacıyevin sədrliyi ilə Binəqədi rayonunda yaşayış binasında baş verən yanğınla bağlı təqsirləndirilən şəxslərin cinayət işi üzrə məhkəmə prosesi davam etdirilib.

Etikxeber.az-ın APA-ya istinadən xəbərinə görə, prosesdə şahidlər ifadə veriblər.

Belə ki,  şahid Hacıbaba Əkbərov bildirib ki, 2012-2014-cü illərdə Binəqədi rayon İcra Hakimiyyətində böyük məsləhətçi və memar vəzifəsində çalışıb: “Mən vəzifəyə gələndə artıq üzlənmə işlərinə başlanılmışdı. İcra Hakimiyyətinin sərəncamında olan digər məsələlərə nəzarət edirdim. Sadəcə, bu barədə qiymətləndirmə cədvəlinə imza atmışam ki, bunu qəbul edirəm və həmin sənədin nüsxə kimi şöbədə saxlanılmasına nəzarət etmişəm. Mən tikinti işlərinin aparılması ilə bağlı yalnız təklif irəli sürürdüm”.  Şahid qeyd edib ki, yanan binanın üzlənməsi Binəqədi Rayon İcra Hakimiyyətinin sifarişi əsasında olmayıb.

Sonra şahidlə təqsirləndirilən Qəzənfər Novruzovun vəkili arasında sənədin imzalanma məsələsi ilə bağlı mübahisə yaranıb. Şahid qiymətləndirmə cədvəlinin nüsxəsinə saxlanılması üçün imza atdığını desə də, vəkil buna etiraz edib, onu yalan danışmaqda ittiham edib.

Proses zamanı  digər vəkillərlə də şahid arasında yenidən mübahisə düşüb. Buna səbəb şahidin çalışdığı sahə üzrə verilən suallara “bilmirəm” deyə cavab verməsi olub.

Təqsirləndirilən Miryusif Mahmudov isə deyib ki, binanı İcra Hakimiyyətinin deyil, şəxsi vəsaiti hesabına üzləyib: “Ancaq iş başa çatdıqdan sonra çəkilən xərc İcra Hakimiyyəti tərəfindən ödəniləcəkdi”.

Sonra təqsirləndirilən Qəzənfər Novruzov şahidə suallar verib. Q. Novruzovun sözlərinə görə, yaşayış binasına bitişik olan qeyri-yaşayış obyektinin tikintisinə İcra Hakimiyyətinin hazırkı rəhbərliyi tərəfindən icazə verilməyib. Şahid bildirib ki, yanan bina İcra Hakimiyyətinin balansında olmayıb.

Telman Adıgözəlov isə ifadəsində deyib ki, yanan binada briqadir vəzifəsində çalışıb və binanı üzləmək üçün işçiləri dəvət edib. Şahid dövlət ittihamçısının suallarını cavablandırıb. Onun sözlərinə görə, vəzifəsinin icrasına başlayarkən hələ bina üzlənməmişdi.

Sonra şahid vəkillərin suallarını cavablandırıb.

Təqsirləndirilən Qəzənfər Novruzovun vəkili Xanlar Bayramzadə İcra Hakimiyyətində təhvil-təslim məsələsinə baxan T.Tanrıverdivun məhkəmədə dindirilməsi barədə vəsatətlə çıxış edib.

Məhkəmə vəsatəti baxılmamış saxlayıb.

Məhkəmə prosesi noyabrın 1-də davam etdiriləcək.

Qeyd edək ki, ötən il mayın 19-da paytaxtın Binəqədi rayonu ərazisində çoxmərtəbəli yaşayış binasında ağır nəticələrə səbəb olmuş yanğınla bağlı binaların üzlənməsində istifadə olunan “poliuretan” məmulatını istehsal edən “Qlobal Stone” və “Global Constuction” MMC təsisçisi Miryusif Mahmudov, “Qlobal Stone” MMC-nin baş direktoru Uğur Bəşirov, “Global Construction” MMC-nin sədr müavini Ələkbər Əsgərov, 2012-2013-cü illərdə Binəqədi rayon mənzil-kommunal təsərrüfat birliyinin rəisi işləmiş rayon icra hakimiyyətinin təsərrüfat şöbəsinin müdiri Ədalət Rəcəbov, Binəqədi rayonu, 72 saylı mənzil-kommunal istismar sahəsinin rəisi Nizami Orucov və binanın poliuretan materialla üzlənməsi işlərinə nəzarət funksiyalarını həyata keçirməli olan, 2012-2013-cü illərdə Binəqədi rayon İcra Hakimiyyəti başçısının birinci müavini işləmiş Qəzənfər Novruzov, Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə təqsirləndirilən şəxs qismində cəlb edilərək barələrində məhkəmənin qərarları həbs qətimkan tədbiri seçilib. Bundan başqa, cinayət işinə “Dərnəgül Boru” Zavodunun laboratoriya rəhbəri Ağacavad Məmmədov və Səhiyyə Nazirliyi yanında Gigiyena və Epidemiologiya Mərkəzinin baş direktoru Akif Əlibəyov da cəlb edilib. Onlar barəsində həbs-qətimkan tədbiri seçilməyib.

Yanğın nəticəsində 15 nəfər ölüb, 50 nəfər xəsarət alıb.

Etikxeber.az

Read Previous

Deputatlar Palatasının sədri Heydər Əliyevin məzarını və Şəhidlər xiyabanını ziyarət edib

Read Next

Silahlı Qüvvələrin Təlim və Tədris Mərkəzində hərbi hissələrin zabitləri ilə görüş oldu

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir