Siyavuş Novruzov: “Heydər Əliyevin digərləri ilə müqayisə edilməsi düzgün deyil” – YENİLƏNİB

Millət vəkili Qüdrət Həsənquliyev Heydər Əliyev, Məhəmməd Əmin Rəsulzadə və Əbülfəz Elçibəyin adını daşıyan üç universitetin yaradılması təklifi ilə çıxış etdi

Etikxeber.az xəbər verir ki, Milli Məclisin (MM) mayın 30-da keçirilən plenar iclasında millət vəkili Qüdrət Həsənquliyev deyib ki, gələn il Heydər Əliyevin anadan olmasının 95, Məhəmməd Əmin Rəsulzadənin anadan olmasının 135, Əbülfəz Elçibəyin anadan olmasının isə 80 illiyi qeyd olunacaq:

“Azərbaycanda universitetlərin sayı digər ölkələrlə müqayisədə 2,5 dəfə azdır. Eyni zamanda, ölkəmiz tələbə və alimlərin sayına görə də digər ölkələrdən geri qalır. Ona görə də hesab edirəm ki, təhsilin keyfiyyətini yüksəltməklə yanaşı, yeni universitetlər yaradılmalıdır. Təklif edirəm ki, hər üç şəxsiyyətin adı ilə bağlı yeni universitetlər açılsın. Bununla, həm də onların ruhu şad olar.Vaxtilə Heydər Əliyev Əbülfəz Elçibəyə ehtiramını bildirmək üçün onun dəfn mərasimində iştirak etdi, Elçibəy də ölkənin ən ağır günlərində Heydər Əliyevi Naxçıvandan Bakıya dəvət etməklə, ona olan tarixi münasibətini göstərdi. Odur ki, bu təklif reallaşdırılarsa, yaxşı olar”.

Millət vəkili Siyavuş Novruzov isə Heydər Əliyevi digər şəxslərlə müqayisə etməyin düzgün olmadığını deyib:

“Adların əbədiləşdirilməsinə gəldikdə, buna fərqli yanaşmaq lazımdır. Yeni Azərbaycan Partiyası xidməti olan hər kəsin xidmətini yüksək qiymətləndirir və onların adının əbədiləşdirilməsinin tərəfdarıdır. Lakin həmkarım Qüdrət Həsənquliyevin dediyindən fərqli olaraq, Ulu Öndərin digərləri ilə müqayisə edilməsi düzgün deyil. Çünki Ulu Öndəri Azərbaycan xalqı hakimiyyətə qaytarıb. Xaosun, separatizmin tüğyan etdiyi, ölkənin müstəqilliyi təhlükə altında olduğu zamanda Ulu Öndər hakimiyyətə gələrək Azərbaycanı xilas etdi. Ulu öndər hakimiyyətə gəlməklə, tək Azərbaycanı deyil, eyni zamanda o vaxt hakimiyyətdə, bu gün isə müxalifətdə olanları da xilas etmiş oldu. Sürət Hüseynovun “Azadlıq” meydanında dar ağacları quracağı və o ağaclardan kimlərin asılacağı barədə dedikləri hamıya bəllidir. Odur ki, Ümummilli Lider müxalifətdə olanları da xilas etdi. Buna görə də Ulu öndərin adı əbədiləşdirilməli, onun adına məktəb, universitet olmalıdır”.

Etikxeber.az

Read Previous

Dövlət büdcəsi dəyişdirildi, xərclər artırıldı – YENİLƏNİB (1)

Read Next

“Narkotiklərdən əldə edilən çirkli pullar Ermənistan tərəfindən silahlanmaya yönəldilir” – DEPUTAT

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir