“Sürücüm yoxdur, katibəm deyil, köməkçimdir…” – “MÜSAVAT” BAŞQANINDAN İTTİHAMLARA CAVAB

Az məlumatdan qlobal nəticələr çıxaran bir dostumuz Müsavata qarşı indi də belə ittiham irəli sürüb:

“Müsavat partiyasında, sərbəst məclis üzvlüyünə (SMÜ), ali nəzarət orqanı olan MNTK-ya görün kimlər seçilib.

Arif Hacılının sürücüsü Kərimxan Zeynalov (MNTK)

Arif Hacılının qardaşı oğlu Ayxan Hacıbəyli (MNTK)

Arif Hacılının katibəsi Ziyarət Səfərova (SMÜ)

Arif Hacılının qardaşı Mustafa Hacıbəyli (SMÜ)

Cavabım:

Mənim sürücüm yoxdur. Avtomobilimi özüm idarə edirəm.

Kərimxan Zeynalov Xalq Təsərrüfatı Universitetinin iqtisadiyyat fakültəsini bitirib.

Uzun müddət Respublika Aqraq-Sənaye Nazirliyində (Birliyində) yüksək vəzifələrdə çalışıb.

Doğulduğu Zəngilan rayonunun, o regionun ən nüfuzlu adamlarından biridir. 20 ildir Müsavat Partiyasının üzvüdür.

Biz onunla qonşuyuq. Qərargaha birlikdə gəlib-gedirik. Bəzən o, bəzən mən sükan arxsında otururuq.

Ziyarət Səfərova katibə deyil. Müsavat Partiyası başqanının köməkçididir. 27 ildir Müsavat Partiyasının üzvüdür. Əvvəllər də Məclis üzvü idi.

Mustafa Hacıbəyli 27 ildir Müsavat Partiyasının üzvüdür. Partiyanın Zaqatala təşkilatının qurucularından biridir. 20 ildən ki, Müsavat Məcludinin üzvüdür. Bütün bu dövr ərzində fasiləsiz olaraq Müsavat Partiyasının mənafeləri naminə vuruşan, bu yolda hər çür mərhumiyyətlərə dözən, dəfələrlə həbs olunan az saylı müsavatçılardan biridir.

Mən onun siyasi karyerası yolunda maneəyəm. İsa Qəmbər hələ 2006-cı ildə demişdi ki, Mustafa Arif Hacılının qardaşı olmasa, çoxdan onu Müsavat Başqanının müavini təyin edərdim.

Ayxan Hacıbəyli 18 yaşından Müsavat üzvüdür. Yüksək təhsilli, Azərbaycan vətənsevəri olan bir gənsdir. Gənclər təşkilatının üzvüdür. Gənc yaşına baxmayaraq, dəfələrlə həbs olunub. Xaricdə təhsil alıb, amma xaricdə qalmadı. Orada da Ukraynanın ərazi bütövlüyü uğrunda mübarizə aparanların yanında idi. Təhsilini bitirib mübarizəsini davam etmək üçün Azərbaycana qayıtdı. Partiyanın təbliğat və informasiya işinində fəal iştirak edir. Son quultaydakı mandat və digər sənədlərin dizaynı ona məxsusdur.

Qardaşımın digər oğlu, Tural Hacıbəyli də 18 yaşından Müsavat üzvüdür. Müsavat və Azərbaycana xidmət edən gənclərdəndir. Dəfələrlə meydanlarda həbs olunub. Avropa İnsan Haqları Məhıəməsində qalib gəlib. Namizədliyini irəli sürsə şübhəsiz seçilərdi. Onlar təvazökar adamlardı. Siz onları tanımasanız da Müsavat üzvləri onları yaxşı tanıyır.

Hələ bir qardaşım da var. Vaqif Hacibəyli Azərbaycanda yeni dövr müstəqil mətbuatının yaradıcılarından biridir.

Dəfələrlə həbs olunub. O da daim Müsavatın müttəfiqi olub, 27 ildir ki, bizə fasiləsiz dəstək verənlərdəndir.

Hələ qızım və oğlum da 18 yaşlarından Müsavat üzvləridir.

Heç yerə namizədliklərini irəli sürməyib, heç bir iddia qoymadan Müsavat və Azərbaycan üçün çalışanların sırasında övladlarım da var.

Bir dəfə mən, qardaşlarım Vaqif və Mustafa, eyni vaxtda üçümüz də həbsdə olanda jurnalistlər Zaqatalaya gedib anamdan buna münasibət soruşmuşdular.

“Mən övladlarımın xalq naminə özlərini fəda etməyə hazır olduqlarına görə fəxr edirəm”– demişdi.

Kimlərsə yaxınlarının, doğmalarının hakimiyyətin təzyiqi ilə onlardan imtina etməsi ilə fəxr edə bilər.

Mən isə yaxınlarımın, doğmalarımın bütün mərhumiyyətlərə, həbslərə baxmayaraq mənimlə birlikdə Azərbaycan davası aparmalarına görə fəxr edirəm.

Arif HACILI,

Müsavat Partiyasının başqanı

Etikxeber.az

Read Previous

“Yeni “media orqanları” sifarişçilərin əlində çomağa çevrildi…” – RƏŞAD MƏCİD YAZDI

Read Next

Deputat “Traxtor”dan uzaqlaşdırılan futbolçuya görə – ƏRDOĞANA MÜRACƏT ETDİ

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir