Türkiyədə gəmi batdı: ÖLƏNLƏRİN SAYI 6 NƏFƏRƏ ÇATDI – XİN DƏ AÇIQLAMA YAYDI- FOTOLAR – VİDEO – YENİLƏNİB – (4)

Qara dənizdə Türkiyənin Samsun şəhəri yaxınlığında Panama bayrağı altında üzən “Volgabalt 214” gəmisinin qəzaya uğraması nəticəsində gəminin ekipaj üzvlərindən biri Azərbaycan vətəndaşı gəmi kapitanının baş köməkçisi İbrahimov Məmmədəli Surxay oğlu dünyasını dəyişib və onun meyiti sudan çıxarıllıb.

Nəqliyyat, Rabitə və Yüksək Texnologiyalar Nazirliyi yanında Dövlət Dəniz Agentliyinin mətbuat xidmətindən mətbuata verilən  məlumata görə, digər Azərbaycan vətəndaşı, gəmi kapitanı İsmayılov Turbat Kamil oğlunun axtarışları isə davam etdirilir.

Agentlikdən bildirilib ki, bu gün səhər saatlarında Qara dənizdə Türkiyənin Samsun şəhəri yaxınlığında Panama bayrağı altında üzən “Volgabalt 214” gəmisinin qəzaya uğraması barədə Nəqliyyat, Rabitə və Yüksək Texnologiyalar Nazirliyi yanında Dövlət Dəniz Agentliyinin Milli Mərkəzinə məlumat daxil olub. Məlumatda bildirilib ki, ekipaj üzvlərindən iki nəfər Azərbaycan vətəndaşıdır.

***

Azərbaycan vətəndaşlarının taleyi ilə maraqlanmaq məqsədilə Dövlət Dəniz Agentliiyinin Milli Mərkəzi tərəfindən dərhal müvafiq tədbirlər görülüb. Türkiyənin Samsun şəhərinin Dəniz Axtarış Xilasetmə Mərkəzi ilə mövcud sistem vasitəsilə əlaqə yaradılaraq məlum olub ki, gəmidə olan 13 nəfərdən doqquzu sahilə çıxarılıb.

Türkiyənin Samsun bölgəsində azərbaycanlıların da olduğu gəminin qəzaya uğraması nəticəsində ölənlərin sayı altı nəfərə çatıb. Ukraynanın Türkiyədəki səfirliyinin yaydığı məlumata görə, gəmidəki şəxslərdən dördü Ukrayna vətəndaşı olub.

Bu haqda isə Azərbaycan Xarici İşlər Nazirliyinin (XİN) yaydığı açıqlamada qeyd olunur.

Bildirilir ki, hadisə ilə bağlı araşdırma aparılır:

“Azərbaycan Respublikasının Türkiyə Respublikasındakı Səfirliyi Türkiyənin Samsun vilayəti sahillərində batan yük gəmisində iki nəfər azərbaycanlının olması məlumatını təsdiqləyib. Səfirliyin verdiyi məlumata əsasən, qəza nəticəsində bir nəfər azərbaycanlı ölüb, digər həmyerlimizin axtarışı üzrə xilasetmə işləri davam etdirilir”.

***

Türkiyənin Samsun bölgəsində azərbaycanlıların da olduğu gəminin qəzaya uğraması nəticəsində ölənlərin sayı altı nəfərə çatıb. 

Bununla bağlı Samsun valisi Osman Kaymak məlumat verib.

O, qeyd edib ki, hadisə zamanı xilas edilən yeddi nəfərdən dördünün yaxınlıqdakı xəstəxanalarda müalicəsi davam etdirilir.

***

Samsunda batan Panama bayrağı altında üzən gəmi ilə bağlı yeni məlumatlar üzə çıxıb. 

1978-ci ildə inşa edilən 113 metrlik “Volgo Balt 214” adlı gəmi kömür ilə yüklü olub və hadisə zamanı iki yerə bölünüb.

Bundan başqa, gəmidə olan 13 nəfərin şəxsiyyəti məlum olub. Onlardan ikisi azərbaycanlıdır.

Bunlar 1972-ci il təvəllüdlü gəmi kapitanı İsmayılov Turbat və 1978-ci il təvəllüdlü kapitan köməkçisi İbrahimov Məmmədəlidir.

***

Türkiyənin Samsun bölgəsində batan gəmidən yeddi nəfər xilas edilib. 

Onlardan dördü xəstəxanaya yerləşdirilib.

İki nəfərin öldüyü qəzada göyərtədə olan iki nəfərin axtarışları davam edir.

***

Türkiyənin Samsun bölgəsindən 130 kilometr uzaqlıqda Panama bayrağı ilə üzən gəmi batıb. 

Etikxeber.az “CNN Türk”ə istinadən xəbər verir ki, Türkiyə Sahil Mühafizəsi Xidmətinin əməkdaşları helikopterlər vasitəsilə altı nəfəri xilas edib, iki nəfərin isə cəsədini aşkar edib.

Məlumatlara görə, gəmidə doqquzu Ukrayna, ikisi Azərbaycan və ikisi Rusiya vətəndaşı olmaqla, 13 nəfər olub. Onların xilas edilməsi prosesi davam edir.

Hadisənin səbəbləri məlum deyil. Xilasetmə işlərinə bir təyyarə, dörd helikopter, bir gəmi və iki qayıq cəlb edilib.