Xüsusi karantin rejimi 1 iyundan sonra da uzadılacaq-RƏSMİ – YENİLƏNİB

Müəyyən qərarlar qəbul etmişik, növbəti həftələrdə açıqlanacaq.

Etikxeber.az-ın məlumatına görə, bunu bu gün Nazirlər Kabineti yanında Operativ Qərargahın təşkil etdiyi mətbuat konfransında TƏBİB İdarə Heyətinin sədri Ramin Bayramlı bildirib.

R. Bayramlı deyib ki, xüsusi karantin rejimi 1 iyundan sonra da uzadılacaq:

“Xüsusi karantin rejiminin hansı müddətə uzadılacağı gələcək günlərdə bildiriləcək”.

O, deyib ki, Naxçıvandan Bakıya uçuşlar bərpa edilən zaman müəyyən qaydalar tətbiq olunacaq.

R. Bayramlının dediyinə görə, Naxçıvandan gələnlərə karantin rejiminin tətbiq olunması ilə bağlı hələ ki, bir rəy yoxdur :

“Gələcək günlərdə bu qaydalar açıqlanacaq”.

***

Sonra “Karantin müəssisələri həftəlik 200-500 nəfər qəbul edə bilir. Bu sayı keçsək, müayinə və müalicə prosesində problemlər ola bilər”-deyən R. Bayramlının sözlərinə görə, hazırda karantində olan 1139 nəfərin arasında Rusiyadan və hava nəqliyyatı ilə xarici ölkələrdən gələnlər var.

TƏBİB sədri qeyd edib ki, 31 maydan sonra sərhədlərin açılması gündəmdə deyil: “Sərhədlərin açılması asandır. Amma gələn vətəndaşların necə təcrid olunması, karantin rejiminin necə qorunması da müzakirə olunur”.

Nazirlər Kabinetinin mətbuat xidmətinin rəhbəri İbrahim Məmmədov isə Rusiya-Azərbaycan sərhədində toplaşanların olduğunu bildirib:

“Mayın 19-da 120 nəfər Azərbaycana gətirilib. Amma bu, karantin zonalarının imkanlarından asılıdır. Bununla belə, “Evə gedirəm” portalı üzrə Moskvadan Azərbaycana aviareys gözlənilir. Ona görə də Rusiyadakı vətəndaşlarımızı “Evə gedirəm” portalı üzərindən ölkəyə gəlməyə çağırırıq. Xüsusən Dağıstanda kütləvi toplaşmalar onların sağlamlığı üçün təhlükə törədir. Təsadüfi deyil ki, bundan əvvəl Rusiyadan gələnlər arasında yoluxma 30 faizə yaxın olub”.

İ. Məmmədov qeyd edib ki, beynəlxalq uçuşların bərpası və sərhədlərin açılması ilə bağlı xüsusi plan hazırlanır:

“Bu planda hansı ölkələrlə uçuşların olacağı öz əksini tapacaq. İlk növbədə isə Naxçıvana uçuşlar bərpa olunacaq. Planın hazırlanması prosesinin iyunun 15-dək uzanması gözlənilir. Bu gün axşam isə İstanbuldan 174 nəfərin olduğu təyyarə reysi gələcək və onlar karantin zonasına yerləşdiriləcəklər”.

İ. Məmmədovun həmçinin, bildirdiyinə görə, ilkin mərhələdən fərqli olaraq, hazırda insanların çarter reysləri ilə ölkəyə gətirilməsi ödənişli həyata keçirilir.

İ. Məmmədov deyib ki, dövlətin sonsuza qədər bu prosesi pulsuz həyata keçirməsi mümkün deyil.

Etikxeber.az