YAP Milli Mətbuat Günü ilə bağlı tədbir keçirdi-BİR QRUP JURNALİST MÜKAFATLANDIRILDI – FOTOLAR – YENİLƏNİB

Bu gün saat 11:00-da hakim Yeni Azərbaycan Partiyasının (YAP) Mərkəzi Qərargahında 22 iyul-Milli Mətbuat Günü ilə bağlı tədbir keçirilib.

Etikxeber.az xəbər verir ki, tədbirdə YAP sədrinin müavini və Mərkəzi Aparatın rəhbəri Tahir Budaqov, hakim partiyadan olan bəzi millət vəkilləri, qəzet redaktorları, media mənsubları iştirak ediblər.

Əvvəlcə YAP ın Mərkəzi Qərargahında mərhum dövlət başçısı Heydər Əliyevin abidəsi ziyarət olunub, önünə gül dəstələri düzülüb.

Abidənin önündə xatirə fotosu çəkdirilib.

Sonra Heydər Əliyevin, torpaqlarımızın müdafiəsi və azad edilməsi uğrunda canlarını qurban veriş şəhidlərimizin əziz xatirəsi bir dəqiqəlik sükutla yad edilib.

Daha sonra T. Budaqov media mənsublarını Milli Mətbuat Günü münasibəti ilə təbrik edib.

O, Azərbaycan mətbuatının keçdiyi yolundan, indiki hakimiyyətin, ölkə Prezidenti İlham Əliyevin mətbuatın inkişafı istiqamətində gördüyü işlərdən danışıb.

Həmçinin, bəzi tədbir iştirakçıları öz ürək sözlərini bölüşüblər.

Tədbirin sonunda bir sıra media mənsubuna hədiyyələr verilib, xatirə fotoları çəkdirilib.

11:55

***

T. Budaqov bildirib ki, Azərbaycan zəngin dövlətçilik tarixinə və ictimai-siyasi ənənələrə malikdir.

Onun sözlərinə görə, çoxəsrlik tariximizin tədqiq olunması, öyrənilməsi və təbliği bütün dövrlərdə qarşıda duran mühüm vəzifələrdən biri olub:

“Bu işin həyata keçirilməsində – belə bir milli vəzifənin yerinə yetirilməsində Azərbaycan mətbuatının özünəməxsus rolu və payı var. Sevindirici haldır ki, bu gün əsasının qoyulmasının 147-ci ilini qeyd etdiyimiz Azərbaycan milli mətbuatı ötən müddət ərzində zəngin və şərəfli inkişaf yolu keçib. Dövrünün görkəmli ziyalısı olan Həsən bəy Zərdabinin 22 iyul 1875-ci ildə nəşr etdirdiyi “Əkinçi” qəzeti həmin dönəmin aktual məsələlərini – insanları düşündürən problemləri, çağın mütərəqqi ideyalarını və fərqli baxışlarını öz səhifələrində geniş əks etdirmişdir. Cəmiyyətin güzgüsünə çevrilən “Əkinçi” xalqın maariflənməsində, milli və bəşəri dəyərlərin təbliğində müstəsna rol oynamaqla yanaşı, günümüzdə də dəyərli və aktual olan mətbuat ənənəsi formalaşdırıb. Təsadüfi deyil ki, Azərbaycan mətbuatı SSRİ dövründə bu ənənələrə söykənərək öz milliliyini qoruyub saxlamış, xalqımızın mənafeyinin, İttifaqın tərkibində olan respublikamızın maraqlarının qorunmasında mühüm rol oynamış, mövcud imkanlar və şərait çərçivəsində ziyalı sözünü cəmiyyətə çatdırmağa müvəffəq olmuş, dəyərli sözün tribunasına çevrilmişdir. Müstəqillik dövründə isə Azərbaycan mətbuatının tarixində yeni dönəm – inkişaf mərhələsi başlanmışdır. Ümummilli liderimiz Heydər Əliyevin bu sahəyə xüsusi diqqət və qayğı göstərməsi nəticəsində Azərbaycan mediası milli maraqların qorunması, cəmiyyətin siyasi-ideoloji hazırlığının gücləndirilməsi, ölkə daxilində və dünyada baş verən proseslərin ictimaiyyətə çatdırılması üçün önəmli işlər görmüşdür. Mətbuat üzərində senzuranın ləğv edilməsi, qanunvericilik bazasının yaradılması, KİV-lərin maddi-texniki bazasının gücləndirilməsi isə medianın imkanlarının genişlənməsini təmin edib”.

YAP Sədrinin müavini – Mərkəzi Aparatın rəhbəri qeyd edib ki, Ulu Öndər Heydər Əliyevin əsasını qoyduğu bu siyasət Prezident İlham Əliyev tərəfindən dövrün çağırışlarına, reallıqlarına uyğun olaraq uğurla davam etdirilir:

“Demokratik inkişaf yolunda əmin addımlarla irəliləyən Azərbaycanda söz azadlığı təmin olunub, jurnalistlərin peşəkarlığının artırılması, sosial müdafiəsinin gücləndirilməsi, mətbuatın maddi-texniki bazasının möhkəmləndirilməsi dövlətin diqqət mərkəzindədir və davamlı olaraq mühüm addımlar atılır. Prezident İlham Əliyevin müvafiq Sərəncamı ilə Azərbaycan Respublikası Medianın İnkişafı Agentliyinin yaradılması, bununla yanaşı, Media haqqında yeni Qanunun qəbul olunması mətbuatımızın inkişafına xidmət edən məqsədyönlü işlərdir”.

T, Budaqov diqqətə çatdırıb ki, Heydər Əliyevin siyasi mirası olan, Ümummilli Liderimizin ideyaları əsasında fəaliyyətini uğurla davam etdirən, Prezident İlham Əliyevin sədrliyi ilə möhtəşəm nailiyyətlər qazanan, Azərbaycanın dayanıqlı inkişafına önəmli töhfələr verən Yeni Azərbaycan Partiyası da media ilə əməkdaşlığa böyük əhəmiyyət verir:

“22 İyul – Milli Mətbuat Günü münasibətilə KİV nümayəndələri ilə görüşümüz ənənə halını alıb və bundan sonra da media ilə sıx təmaslarımız davam edəcək. Heç şübhəsiz, dövlətin yüksək diqqət və qayğısı ilə əhatə olunan Azərbaycan mətbuatı, media nümayəndələri öz üzərinə düşən vəzifələri layiqincə yerinə yetirirlər. Xüsusilə də, 44 günlük Vətən müharibəsi milli mətbuatımızın vətənpərvərliyini, fədakarlığını və peşəkarlığını bütün dünyaya nümayiş etdirdi. Müharibə zamanı əlinə silah alıb döyüşlərdə iştirak edən xeyli sayda jurnalistlərimizin olması isə qürurvericidir. Haqq mübarizəmiz uğurla başa çatsa, tarixi ədalət və ərazi bütövlüyümüz bərpa olunsa da, informasiya müharibəsi davam edir. Azərbaycan mediası postmüharibə dövründə də öz missiyasını uğurla yerinə yetirir və fəaliyyətini yeni çağırışlara uyğun qurur. 22 İyul – Milli Mətbuat Günü münasibətilə media nümayəndələrimizi səmimi-qəlbdən təbrik edir, hər birinizə fəaliyyətinizdə nailiyyətlər, yeni yaradıcılıq uğurları diləyirəm.

Daha sonra tədbirdə YAP Mərkəzi Aparatının İnformasiya texnologiyaları və ictimaiyyətlə əlaqələr şöbəsinin müdiri Nurlan Qələndərov, Azərbaycan Televiziyasının İctimai-siyasi proqramlar redaksiyasının baş redaktorunun müavini Vüsal Mətləb, APA İnformasiya Agentliyinin redaktoru Ramiz Mikayıloğlu və “Yeni Müsavat” qəzetinin əməkdaşı Elşad Paşasoy çıxış edərək Azərbaycan dövlətinin milli mətbuatımıza qayğısından bəhs edib, göstərilən diqqətə görə YAP rəhbərliyinə təşəkkür ediblər.

Sonda KİV nümayəndələrinə mükafatlar təqdim olunub.

Kamil HƏMZƏOĞLU (HƏMİDOV)

Etikxeber.az

Read Previous

Kərbəlayi İsmayılın oğlunun adını daşıyan, “Qəmlo”nun yaxın qohumu olan Şəhid Əsəd Həsənov, özü Şəhid, bir qardaşı Qazi, bir qardaşı Vətən Müharibəsi iştirakçısı olan Elnur Bayramov…VƏ GÖBƏKTALALI 3 ŞƏHİDİMİZ-NƏCMƏDDİN, NURLAN VƏ CAVİDAN… – FOTOLAR

Read Next

Hovuzda qadınları çəkərək sosial şəbəkədə yayan şəxs 20 sutka-HƏBS OLUNDU

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir