Əbədiyyətə uğurlanmasının birinci ilində, Anım Günündə-SALYANLI, XƏLƏCLİ ANTİTERROR ŞƏHİDİ, EVİN-AİLƏNİN TƏK VƏ NİŞANLI OĞLU, ALİ TƏHSİLLİ, LEYTENANT DAVUD BAYRAMOVUN MƏZARI ZİYARƏT OLUNDU, ANIM MƏRASİMİ DÜZƏNLƏNDİ… – FOTOLAR – YENİLƏNİB

Salyan rayonunun Antiterror Şəhidlərindən olan-ailənin iki övladından biri, evin tək oğlu, tək bacının tək qardaşı, ali təhsilli, peşəkar hərbçi, Leytenant, nişanlı, “Vətən uğrunda” medallı və 3-cü dərəcəli “Rəşadət” ordenli Davud Şamil oğlu Bayramovun 23 sentyabr 2024-cü il tarixində-səhər saatlarında, Əbədiyyətə uğurlanmasının birinci ilində, Anım Günündə məzarı ziyarət olunub.

Etikxeber.az xəbər verir ki, Xələc kənd qəbiristanlığında uyuyan Şəhidin məzarı üzərinə gül dəstələri düzülüb, ruhuna dualar olunub, “Quran” oxunub.

Rüstəm XƏLİLOV: “Şəhidlərimizi unutmamalı və yaddan çıxarmamalıyıq”

Şəhidin məzarını ziyarət edən Salyan rayon İcra Hakimiyyətinin başçısı Rüstəm Xəlilov öz növbəsində Davud Bayramovun ailəsinə, valideynlərinə başsağlığı verib, onlara Allahdan səbr və dözüm arzulayıb.

İcra başçısı ölkə Prezidenti, Ali Baş Komandan İlham Əliyevin rəhbərliyi ilə Azərbaycan xalqının və Rəşadətli Azərbaycan Ordusunun Qarabağ münaqişəsinə son qoyduğunu, düşmən üzərində tarixi Qələbə və Zəfər əldə etdiyini bildirib.

O, eyni zamanda, Azərbaycan oğullarının, Şəhidlərimizin və Qazilərimizin İgidliyi və Qəhrəmanlığı sayəsində Azərbaycanın ərazi bütövlüyünün tam təmin olunduğunu dilə gətirib.

“Biz Şəhidlərimizi unutmamalıyıq, onları yaddan çıxarmamalıyıq. Hər birimiz onlara borcluyuq. Eyni zamanda, kimlərinsə Şəhid ailələrinin adından sui-istifadəsinə yol verməməliyik”-deyə, R. Xəlilov sözlərinə əlavə edib.

Şəhidin məzarını ziyarətdən sonra Xələc kəndində-ailəsinin yaşadığı evdə Anım mərasimi düzənlənib, adına ehsan süfrəsi açılıb.

Anım mərasimində Şəhidlərin xatirəsi bir dəqiqəlik sükutla yad olunub, ruhuna bir daha dualar edilib.

Davud Bayramov da daxil olmaqla, cəmi Şəhidlərimizlə Fəxr edildiyi, Qürur duyulduğu bildirilib.

Şəhidin məzarını ziyarətdə və Anım mərasimində ailə üzvləri, qohumları, kənd sakinləri, Rüstəm Xəlilov başda olmaqla, Salyan rayon İcra Hakimiyyətinin rəhbər və məsul şəxsləri, din xadimləri və digər şəxslər iştirak ediblər.

Nur içində yatsın!

***

FOTOLAR:

Kamil HƏMZƏOĞLU (HƏMİDOV)

Etikxeber.az