Əli Əhmədov: “Əsas bəyanat ondan ibarət olmalıdır ki, bu problem həllini tapsın…”

Birinci vitse-spiker: “Həmsədrlərin regiona növbəti səfərlərindən heç nə gözləmirəm”
Əli Əhmədovla Ziyafət Əsgərov ATƏT-in Minsk qrupu həmsədrlərinin səfərindən və onların fəaliyyətindən danışdılar
“ATƏT-in Minsk qrupunun həmsədrləri məsuliyyəti üzərindən atırlar. Deyirlər ki, Azərbaycan və Ermənistan öz aralarında razılığa gəlsinlər, biz də bunu dəstəkləyək. Ona görə də Minsk qrupu həmsədrlərinin regiona növbəti səfərlərindən heç nə gözləmirəm”.
Etikxeber.az xəbər verir ki, bunu jurnalistlərə açıqlamasında Milli Məclis (MM) sədrinin birinci müavini Ziyafət Əsgərov bildirib. Vitse-spiker deyib ki, Azərbaycan və Ermənistan öz aralarında razılığa gələ bilsəydilər, ATƏT-in Minsk qrupuna ehtiyac qalmazdı: “Həmsədrlər Ermənistana işğalçı olduğunu, torpaqları azad etməli olduğunu bildirməlidir. Bunu demirlərsə, həmsədrlərdən heç nə gözləmirəm”. Z. Əsgərov qeyd edib ki, ermənilər həmsədrlər regiona səfər edərkən hər zaman atəşkəsi pozublar, təxribatlar törədiblər: “İndi də belə təxribatlar törədirlər və deyirlər ki, Azərbaycan atəşkəs rejimini pozur. Bu, həm bizə, həm də həmsədrlərə bəllidir. Lakin nəyə görə həmsədrlər bu təxribatlara cavab vermirlər?”.

Baş nazirin müavini Əli Əhmədov isə jurnalistlərə açıqlamasında deyib ki,  ATƏT-in Minsk qrupu həmsədrlərinin səfərindən gözləntilər var:

“Onlar ədalətli qərar qəbul edilməsi üçün daha səylə çalışmalı, vəzifələrini yalnız regiona gəlib-getməklə bitmiş hesab etməməlidir”. Ancaq, o, təəssüflə qeyd edib ki, uzun illərdir,  Minsk qrupunun fəaliyyət göstərməsinə baxmayaraq, hələ də Dağlıq Qarabağ münaqişəsinin ədalətli həlli üçün lazımı addımlar atılmayıb:

“Düzdür, müəyyən işlər görürlər, mən bunların işinə tamamilə ədalətsiz demək istəməzdim. Amma məsələnin həll olunması, bizim məcburi köçkünlərin həyatının yaxşılaşdırması üçün əsas işlər görülməyib. Torpaqlarımız işğaldan azad olmayıb, qaçqın və köçkünlər öz yurdlarına qayıtmayıb və s. Bizim onlardan gözlədiyimiz bundan ibarətdir. Bu yaxınlarda bəyanatlar səsləndiriblər. Amma əsas bəyanat ondan ibarət olmalıdır ki, bu problem həllini tapsın. Bu münaqişə həddindən çox uzandı, bunun uzanması da bir yandan insanlara qarşı ədalətsizliyin davam etməsi, digər tərəfdən isə regionda təhlükəsizliyə təhdidin artması deməkdir”.

Etikxeber.az

Read Previous

27 mərtəbəli bina yanır – LONDONDA : ÖLƏN VƏ YARALANANLAR VAR – YENİLƏNİB

Read Next

“Azərbaycan 12-13 il ərzində iqtisadiyyatını 300-350 faiz artırıb” – BAŞ NAZİRİN MÜAVİNİ BELƏ İDDİA EDİR

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir