Akademik Milli Dram Teatrı yeni mövsümü “Qarabağnamə” ilə açdı

Sentyabrın 17-də Azərbaycan Dövlət Akademik Milli Dram Teatrı 144-cü teatr mövsümünü İlyas Əfəndiyevin “Hökmdar və qızı” pyesi əsasında hazırlanmış “Qarabağnamə” tamaşası ilə açıb.

Etikxeber.az xəbər verir ki, teatrın baş rejissoru və direktoru Xalq Artisti Azərpaşa Nemət yeni mövsümün başlanması münasibətilə teatrın kollektivini və tamaşaçıları təbrik edib.

A.Nemət deyib ki, görkəmli dramaturqumuz İlyas Əfəndiyevin əsəri əsasında hazırlanan “Qarabağnamə” tamaşası Azərbaycan tarixinin böyük bir mərhələsini təsvir edir. Aktyorlarımız tamaşada məharətlə çıxış edirlər.

Qeyd olunub ki, bu il teatrsevərləri yeni tamaşalarla, qastrol səfərləri ilə, festivallarla dolu maraqlı bir mövsüm gözləyir. Sonra səhnə əsərində çıxış edən aktyorlar səhnəyə dəvət olunub. Tamaşaçılar aktyorları alqışlarla qarşılayıb.

Tamaşanın quruluşçu rejissoru Xalq Artisti Mərahim Fərzəlibəyov, quruluşçu rəssamı Əməkdar Rəssam İsmayıl Məmmədov, musiqi tərtibatçısı isə Həmid Kazımzadədir. Səhnə əsərində əsas rolları Xalq artistləri Rafiq Əzimov, Firəngiz Mütəllimova, Hacı İsmayılov, Ramiz Məlik, Əməkdar artistlər Kazım Abdullayev, Elxan Quliyev, Əjdər Həmidov, Əli Nurzadə, Aslan Şirin, aktyorlar Şəhla Əliqızı, Rövşən Kərimduxt, Anar Heybətov, Sərdar Rüstəmov və başqaları ifa ediblər.

Tamaşa XVIII əsrdə Qarabağ xanlığının mərkəzi olan Şuşada baş vermiş tarixi hadisələrdən və Qarabağ hökmdarı İbrahim xanın ictimai-siyasi, ailə-məişət həyatından bəhs edir.

Etikxeber.az

Read Previous

Para-taekvondo üzrə milli komanda Avropa çempionatında 9 medal qazanıb

Read Next

Mətbuat Şurası: Mitinqi işıqlandıran jurnalistlərə qarşı hər hansı insident qeydə alınmayıb

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir