“Azərbaycan 100 mahnıda” – AYGÜN SƏMƏDZADƏDƏN MÖHTƏŞƏM TƏQDİMAT – FOTOLAR

Jalə ƏLİYEVA: “Azərbaycan 100 mahnıda” kitabı Azərbaycan Xalq Cümhuriyyətinin 100 illiyinə böyük töhfədir

Aygün SƏMƏDZADƏ: Bu, bizim Azərbaycan Xalq Cümhuriyyətinin 100 illiyinə bir töhfəmizdir

Sentyabrın 27-də Azərbaycan Milli İncəsənət Muzeyində “Azərbaycan 100 mahnıda” kitabının təqdimatı keçirilib.

Etikxeber.az xəbər verir ki, XI Üzeyir Hacıbəyli Beynəlxalq Musiqi Festivalı çərçivəsində təqdim olunan layihənin rəhbəri və ideya müəllifi, bəstəkar-musiqişünas, sənətşünaslıq üzrə fəlsəfə doktoru, Xalq artisti Aygün Səmədzadədir.

Mədəniyyət Nazirliyi və Nəfəs Sənət Mərkəzinin təşəbbüsü ilə keçirilən tədbirdə Milli Məclisin (MM) deputatları, tanınmış elm və mədəniyyət xadimləri iştirak ediblər.

Tədbirdə çıxış edən MM-in Mədəniyyət komitəsinin sədr müavini, professor  Jalə Əliyeva “Azərbaycan 100 mahnıda” kitabını Azərbaycan Xalq Cümhuriyyətinin 100 illiyinə böyük töhfə kimi dəyərləndirib.

Aygün Səmədzadənin bənzərsiz yaradıcılığından söz açan J. Əliyeva deyib ki, o, əldə etdiyi bu sənət şöhrətini böyük zəhmət və əzmkarlıq bahasına qazanıb.

Mərhum dövlət başçısı Heydər Əliyevin Azərbaycan mədəniyyətinin inkişafında yeni bir dövrün əsasını qoyduğunu söyləyən deputat qeyd edib ki, sabiq prezidentin  siyasi kursu bu gün  ölkə prezidenti  İlham Əliyev tərəfindən uğurla həyata keçirilir.

Bildirib ki, Azərbaycan mədəniyyətinin hamisi kimi tanınan Heydər Əliyev Fondu və Fondun prezidenti Mehriban xanım Əliyeva bu gün mədəniyyətimizin dünyada tanınmasına böyük töhfələr verməkdədir:

aygun-kitab

aygün-kitab

aygun-kitab-1

“Ölkə başçısının müvafiq sərəncamları ilə Azərbaycan Xalq Cümhuriyyətinin 100 illiyinin keçirilməsi və ötən ilin “Azərbaycan Xalq Cümhuriyyəti İli” elan edilməsi neçə-neçə belə layihələrin reallaşmasına təkan verib. Bu istiqamətdə görülən işlərin davamı olaraq məhz bu gün belə bir uğurlu layihənin təqdimatına toplaşmışıq”.

Kitabın çapını əlamətdar hadisə kimi dəyərləndirən Azərbaycan Milli Konservatoriyasının elmi işlər üzrə prorektoru Lalə Hüseynova deyib ki, A. Səmədzadə istedadlı bəstəkar olmaqla yanaşı, həm də gözəl musiqişünasdır. Məhz bu səbəbdən də kitaba Azərbaycan haqqında çox dəyərli əsərlər toplanıb. 35 bəstənin yer aldığı kitabda Aygün Səmədzadə əsl musiqişünas alim kimi peşəkarlarla yanaşı, gənc və həvəskar bəstəkarların da əsərlərinə yer ayırıb.

Tədbirdə AMEA-nın müxbir üzvi Rəna Məmmədova, Xalq artistləri Sərdar Fərəcov, Faiq Sücəddinov və Azərbaycan Yazıçılar Birliyinin katibi İlqar Fəhmi çıxış edərək A. Səmədzadə yaradıcılığından və onun milli bəstəkarlıq məktəbimizin inkişafındakı rolundan söz açıblar.

Bildirilib ki, kitabda Azərbaycan bəstəkarlarının 100 il ərzində bəstələdiyi 100 mahnı toplanıb. Toplu dahi Üzeyir Hacıbəylinin Əhməd Cavadın sözlərinə dövlət himni ilə açılır və 100 il ərzində yazılan, tanınan və sevilən mahnılardan bir çoxunu əhatə edir. Burada Qara Qarayev, Asəf Zeynallı, Fikrət Əmirov, Tofiq Quliyev, Cahangir Cahangirov, Rauf Hacıyev, Vasif Adıgözəlov, Emin Sabitoğlu, Elza İbrahimova, Ramiz Mirişli, Ələkbər Tağıyev, Səid Rüstəmov, Süleyman Ələsgərov, Oqtay Rəcəbov, Müslüm Maqomayev, Aygün Səmədzadə, Cavanşir Quliyev kimi bəstəkarların mahnıları öz əksini tapır.

Qeyd edilib ki, bu kitab musiqi məktəblərinin şagirdləri və tələbələri üçün çox böyük əyani vəsait olacaq.

Natiqlər belə bir layihənin reallaşmasını A. Səmədzadənin Azərbaycana olan sevgisinin bariz nümunəsi kimi dəyərləndiriblər.

Bütün iştirakçılara minnətdarlığını bildirən layihənin rəhbəri A. Səmədzadə belə bir kitabın XI Üzeyir Hacıbəyli Beynəlxalq Musiqi Festivalı çərçivəsində təqdim olunmasından qürur duyduğunu bildirib. Kitabın ərsəyə gəlməsinə 3 ilə qədər bir vaxt sərf olunduğunu söyləyən müəllif bildirib ki, bu layihə davamlı olacaq. Layihənin reallaşmasında əməyi olanları xüsusilə qeyd edən A.Səmədzadə deyib ki, bu kitabı vərəqləyən hər bir kəs nə vaxtsa unutduğu mahnını burda görəcək, yaxud da hansısa mahnını görməyəndə təəssüflənəcək. Bu ilk nəşrdir və yaxın gələcəkdə daha təkmilləşmiş nəşrləri musiqisevərlərə təqdim edəcəyik:

“Bu, bizim Azərbaycan Xalq Cümhuriyyətinin 100 illiyinə bir töhfəmizdir. Başqa xalqlara nisbətdə bizim bəstəkarlarımız Vətən mövzusuna daha çox müraciət ediblər. Bu da ölkəmizə, məmləkətimizə sonsuz sevgimizdən irəli gəlir. Düşünürəm ki, bu mövzuda yazılmış bütün əsərləri bir kitaba yerləşdirmək mümkünsüzdür. İstərdik ki, bu nəşr musiqi məktəblərində tədris vəsaiti kimi istifadə edilsin”.

Tədbir musiqili proqramla davam edib.

Kamil HƏMZƏOĞLU

Etikxeber.az

Read Previous

“Məhsəti”nin premyerası – FOTO

Read Next

Məmmədyarov Qrup 77-nin iclasında iştirak etdi

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir