Bərdəli İkinci Vətən Müharibəsi Şəhidi Mehman Qəmbərovun Cənnətdəki beşinci doğum günüdür, Zaqatalalı “Qisas” əməliyyatı Şəhidi Turan Məhərrəmovun isə 24 yaşı tamam olur-SABAH

Bərdəli İkinci Vətən Müharibəsi Şəhidi Mehman Nəriman oğlu Qəmbərov və Zaqatalalı Turan Tərlan oğlu Məhərrəmovun doğum günüdür.

Sabah-27 may 2025-ci il tarixində Mehman Qəmbərovun 44, Turan Məhərrəmovun 24 yaşı tamam olur.

Mehman Qəmbərovun Cənnətdəki beşinci, Turan Məhərrəmovun isə Cənnətdəki üçüncü doğum günü, mövlududur.

Etikxeber.az xəbər verir ki, 27 may 1981-ci il təvəllüdlü və ailədə üç övlad- iki qardaş, bir bacı olan Mehman Qəmbərovgil əslən Ağdam rayonunun Maqsudlu kəndindəndirlər.

1993-cü ildən, Ağdamın işğalından sonra Bərdəyə, Qarağacı kəndinə pənah gətiriblər.

Köçkün düşən vaxt 5-ci sinifdə oxuyan Mehman Vətən torpaqları, doğma Ağdamı işğalda olduğu üçün hərb sənətini seçməli olub.

Ali təhsilli, peşəkar hərbçi olan Mehman Qəmbərov  polkovnik-leytenant qədər rütbəsinə yüksəlib.

İkinci Vətən Müharibəsinin ilk saniyələrindən döyüşlərə atılıb və döyüşlərin 4-cü günündə, sentyabrın 30-da Füzuli istiqamətində döyüşlərdə Şəhidlik zirvəsinə ucalıb.

Nəşi bir gün sonra, oktyabr ayının 1-də Bərdə Şəhidlər Xiyabanında dəfn olunub…

Şəhidliyindən sonra Ali Baş Komandan tərəfindən medallarla və “Qarabağ” ordeni ilə təltif olunub.

Mehman Qəmbərov həm də ailəli olub.

İki övladı-bir oğlu və bir qızı Vətənə əmanət qalıb.

Bərdədə adını daşıyan küçə var.

***

Turan Məhərrəmov isə 2001-ci ilin 27 may tarixində Zaqatalanın Qımır kəndində dünyaya gəlib.

Ailənin 4 övladından biri, evin tək oğlu, 3 bacının tək qardaşı olub.

2007-2018-ci illərdə orta məktəbdə oxuyub.

Uşaq vaxtlarından idmanla məşğul olub.

2018-ci ildə Milli Qəhrəman Mübariz İbrahimovun xatirəsinə həsr olunmuş açıq kubokda 2-ci yerə layiq görülüb.

2019-cu ildə həqiqi hərbi xidmətə yollanıb, Xüsusi Təyinanlı olub.

Azərbaycan Ordusunun Əsgəri-Xüsusi Təyinatlı kimi İkinci Vətən Müharibəsində iştirak edib.

Cəbrayıldan Şuşayacan uzun və şərəfli döyüş yolu keçib.

Müharibədən sonra 6 medalla təltif olunub.

Əsgərliyini başa vurduqdan sonra yenidən həyatını Ordu, hərb ilə bağlayıb, Azərbaycan Ordusunda Xüsusi Təyinatlı-MAXE kimi fəaliyyət göstərməyə başlayıb.

2022-ci ilin sentyabr ayında-“Qisas” əməliyyatı zamanı isə Kəlbəcər istiqamətində qəhrəmancasına Şəhidlik məqamına ucalıb.

Ayın 13-də Şəhid olan Turanın nəşi iki gün sonra, 15 sentyabr tarixində Qımır kənd qəbiristanlığında Əbədiyyətə uğurlanıb.

Şəhidliyindən sonra, 5 noyabr 2022-ci il tarixində 3-cü dərəcəli “Rəşadət” ordeni və daha bir medalla-“Vətən uğrunda” medalı ilə təltif olunub.

21 yaşında Şəhidlik məqamına ucalan Turan həm də nişanlı idi, öz kəndlərindən olan Sayıb adlı qızla nişanlanmışdı…

Şəhid olmasaydı, 2022-ci ilin oktyabr ayının 9-da toyu olacaqdı…

Məkanları cənnətlik, Cənnətdəki doğum günləri olsun!

Nurlar içində yatsınlar!

Kamil HƏMZƏOĞLU

Etikxeber.az