Beş medallı, ailənin tək və subay oğlu, iki bacının tək qardaşı-ŞAMAXILI İKİNCİ VƏTƏN MÜHARİBƏSİ ŞƏHİDİ RZA MƏMMƏDOVUN CƏNNƏTDƏKİ DÖRDÜNCÜ DOĞUM GÜNÜDÜR, BU GÜN 23 YAŞI TAMAM OLUR… – FOTOLAR – YENİLƏNİB – (1)

Şamaxı rayonunun İkinci Vətən Müharibəsi Şəhidlərindən olan Rza Əsgər (Xanbaba) oğlunun doğum günüdür.

Kimliyində noyabr ayının 23-ü yazılan Rza Məmmədovun bu gün 23 yaşı tamam olur.

Bu, həm də Şəhidin Cənnətdəki dördüncü doğum günü, mövlududur.

Etikxeber.az xəbər verir ki, Cənnətdəki dördüncü doğum günü ilə bağlı bu gün-23 noyabr 2024-cü il tarixində, səhər saatlarında Rza Məmmədovun Göylər kənd qəbiristanlığındakı məzarı ziyarət olunub.

Məzarı üzərinə gül dəstələri düzülüb, ruhuna dualar olunub, “Quran” oxunub.

Qısa çıxışlar olunub.

Çıxışlarda Şəhidin keçdiyi 19 illik qısa, lakin şərəfli ömür və döyüş yolundan bəhs edilib.

Məktəblilər tərəfindən Vətənə, Şəhidlərə həsr olunmuş şeirlər səsləndirilib.

Daha sonra Rza Məmmədovun ailəsinin yaşadığı evdə Cənnətdəki dördüncü doğum günü ilə bağlı mərasim təşkil olunub, adına ehsan süfrəsi açılıb.

Mərasimdə Şəhidin ailə üzvləri, yaxınları, Şamaxılı, Bakılı Şəhid ailələri, din xadimləri və digər şəxslər iştirak ediblər.

Mərasimdə Şəhidin və cəmi Şəhidlərin ruhlarına bir daha dualar oxunub.

Eyni zamanda, Rza Məmmədovun ailə üzvlərinə Allahdan səbr və dözüm arzulanıb, Şəhidin 23 yaşı, Cənnətdəki dördüncü doğum günü təbrik edilib.

Bu yerdə qeyd edək ki, Rza Məmmədov 2001-ci ilin iyul ayının 23-də (kimliyində noyabrın 23-ü yazılıb) Şamaxı rayonunun Göylər kəndində sadə bir ailədə dünyaya gəlib.

Ailənin 3 övladından biri, evin tək oğlu, 2 bacının tək qardaşı idi.

Atası Birinci Qarabağ Savaşının iştirakçılarından olub.

Orta məktəbi bitirdikdən bir müddət sonra hərbi xidmətə yollanıb və İkinci Vətən Müharibəsi zamanı Azərbaycan Ordusunun Əsgəri kimi iştirak edib.

Və cəmi 9 ayın Əsgəri olan Rza İkinci Vətən Müharibəsinin elə ilk günündə, sentyabrın 27-də Füzuli istiqamətində döyüşlərdə qəhrəmancasına Şəhid olub.

Nəşi bir gün sonra, 28 sentyabr 2020-ci il tarixində doğulub boya-başa çatdığı Göylər kənd qəbiristanlığında dəfn olunub.

Şəhidliyindən sonra “Vətən uğrunda”, “Hərbi xidmətlərə görə”, “Füzulinin azad olunmasına görə”, “Cəbrayılın azad olunmasına görə” və “Qubadlının azad olunmasına görə” medalları ilə təltif olunub.

Rza eyni zamanda, Göylərin (Dağ Göylərin) 6 İkinci Vətən Müharibəsi Şəhidindən biridir.

O, həm də subay olub.

Məkanı cənnətlik, Cənnətdəki dördüncü doğum günü, 23 yaşı mübarək olsun!

Nur içində yatsın!

13:33

***

FOTOLAR:

***

Kamil HƏMZƏOĞLU (HƏMİDOV)

Etikxeber.az