“Biz də istəyirik ki, ancaq qanunlara istinad olunsun” – ELDAR İBRAHİMOV

Torpaq Məcəlləsinə və   “Torpaq icarəsi haqqında” dəyişiklik olunur

Azərbaycanda dövlət mülkiyyətində olan kənd təsərrüfatı təyinatlı torpaqların icarəyə verilməsinin xüsusiyyətləri müəyyənləşib.

Etikxeber.az xəbər verir ki,  bununla bağlı “Torpaq icarəsi haqqında” qanuna dəyişiklik təklif olunub.

Parlamentin Aqrar siyasət komitəsinin mayın 10-da keçirilən iclasında müzakirəyə çıxarılan sənədə əsasən, qanuna 10-1 maddəsinin əlavə olunması təklif edilir.

Təklifə əsasən,  dövlət mülkiyyətində olan bu torpaqları icarəyə götürmək istəyən şəxs müvafiq icra hakimiyyətinin müəyyən etdiyi orqana ərizə ilə müraciət edəcək. Ərizədə torpaq sahəsindən istifadənin məqsədi və müddəti göstəriləcək.

Həmin orqan təqdim olunan ərizəyə və ona əlavə olunan sənədlərə 10 gün müddətində baxmalıdır.

İmtina üçün əsaslar olmadıqda icarə müqaviləsini bağlamağa razılıq almaq üçün 2 gün müddətində müvafiq icra hakimiyyətinin müəyyən etdiyi orqana göndərəcək.

Bu orqan da 15 gün ərzində torpağın icarəyə verilməsinə razılıq verəcək.

Qeyd edək ki,adıçəkilən dəyişiklik Torpaq Məcəlləsində də nəzərdə tutulur.

Adıçəkilən komitənin sədri Eldar İbrahimov da öz növbəsində hər iki sənədin ölkə Prezidentinin imzası ilə parlamentə daxil olduğunu və onların mühüm əhəmiyyət kəsb etdiyini bildirib.

“Eyni zamanda, bu dəyişikliklər müvafiq, yəni, yerli icra hakimiyyəti işçilərinin də canını müəyyən məsələlərdən, problemlərdən qurtaracaq. Onlar dərhal deyəcəklər, baxın, filan  qanunun filan maddəsində belə göstərilib, biz heç nə edə bilmərik. Elə bizim də məqsədimiz odur ki, hər bir işdə qanunlara istinad olsunsun. Olunsun ki, əlavə söz-söhbətlərə də ehtiyac qalmasın“-deyə, E. İbrahimov sonra sözlərinə əlavə edib.

Müzakirələrdən sonra hər iki layihə parlamentin növbəti  plenar iclasına tövsiyə olunub.

Kamil HƏMZƏOĞLU

Etikxeber.az