Bu dəfə Tahir Mirkişilinin “komitəsi” yığışdı-8 MƏSƏLƏNİ MÜZAKİRƏ ETDİ VƏ… – FOTOLAR -YENİLƏNİB

Bu gün – sentyabrın 10-da Milli Məclisin daha bir komitəsinin- İqtisadi siyasət, sənaye və sahibkarlıq komitəsinin parlamentin qarşıdan gələn payız sessiyası ilə bağlı ilk iclası keçiriləcək.

İclasın gündəliyinə 8 məsələ daxil edilib.

Etikxeber.az-ın xəbərinə görə, komitə sədri Tahir Mirkişilinin rəhbərliyi ilə keçiriləcək iclasda 2020-ci il yaz və növbədənkənar sessiyaları ərzində İqtisadi siyasət, sənaye və sahibkarlıq komitəsində görülən işlər barədə hesabat təqdim ediləcək, komitənin 2020-ci il payız sessiyası dövrünə dair işlər planına baxılacaq.

Tədbirdə komitə üzvləri “Müstəqil Dövlətlər birliyinin iştirakçısı olan dövlətlərin əqli mülkiyyət obyektlərinə hüquqların qorunması sahəsində gömrük orqanlarının qarşılıqlı fəaliyyəti haqqında” Sazişin təsdiq olunması barədə Azərbaycan Respublikası qanununun layihəsi haqqında, “Dövlət rüsumu haqqında” dəyişiklik edilməsi barədə (birinci oxunuş), Vergi Məcəlləsində dəyişiklik edilməsi haqqında (birinci oxunuş), Əmək Məcəlləsində, “Sahibkarlıq fəaliyyəti haqqında”, “Dövlət qulluğu haqqında”, “İşsizlikdən sığorta haqqında” və Azərbaycan Respublikasının 2020-ci il dövlət büdcəsi haqqında qanunlarda dəyişiklik edilməsi barədə, Mülki Prosessual Məcəlləsində, Cinayət Məcəlləsində, Miqrasiya Məcəlləsində, İnzibati Xətalar Məcəlləsində, “Yerli (bələdiyyə) vergilər və ödənişlər haqqında” və “Nağdsız hesablaşmalar haqqında” dəyişiklik edilməsi barədə (birinci oxunuş), Vergi Məcəlləsində dəyişiklik edilməsi barədə (birinci oxunuş) qanun layihələrini müzakirə edəcəklər.

Qeyd edək ki, adıçəkilən komitənin üzvləri bunlardır:

Tahir Famil oğlu Mirkişili – Sədr

Əli Əhməd oğlu Məsimli – Sədr müavini

Mahir Tapdıq oğlu Abbaszadə

Elnur Marat oğlu Allahverdiyev 
 
Vüqar İbad oğlu Bayramov 
 
Məzahir Cavid oğlu Əfəndiyev 
 
Vahid Qazməmməd oğlu Əhmədov
 

Aydın Nəsir oğlu Hüseynov

İmamverdi İbiş oğlu İsmayılov
  
Rüfət Atakişi oğlu Quliyev
 
Anar İlyaz oğlu Məmmədov
 
İqbal Nəriman oğlu Məmmədov 
 
Məşhur Şahbaz oğlu Məmmədov 
 
Ziyad Əliabbas oğlu Səmədzadə
 
Ağalar İsrəfil oğlu Vəliyev

09:50

***

Komitə sədri Tahir Mirkişili payız sessiyasının başlaması münasibəti ilə təbriklərini çatdırdı.

Sonra gündəlik haqqında məlumat verdi. Bildirdi ki, iclasda 2020-ci il yaz və növbədənkənar sessiyaları ərzində İqtisadi siyasət, sənaye və sahibkarlıq komitəsində görülən işlər barədə hesabata, komitənin 2020-ci il payız sessiyası dövrünə dair işlər planına baxılacaq:

“Həmçinin altı qanun layihəsi müzakirə olunacaq”.

Vurğuladı ki, COVİD-19 yayılmasına qarşı Azərbaycanda müxtəlif istiqamətlərdə dövlət tərəfindən tədbirlər həyata keçirildi:

“Cənab İlham Əliyevin rəhbərli ilə ölkəmizdə pandemiya ilə mübarizədə uğurlar qazanıldı. Həyata keçirilən tədbirlər nəticəsində iqtisadiyyatda azalma aşağı səviyyədə oldu”.

Komitə sədri dedi ki, bu ilin 7 ayı ərzində ümumdaxili məhsul 2,8 faiz azalsa da, qeyri-neft sektorunda 1,6 faiz artım olub. Bu, digər ölkələrlə müqayisədə çox yaxşı göstəricidir.

Tahir Mirkişili qeyd ki, sentyabrın 9-da Prezidentin fərmanı ilə İqtisadi Şura yaradılıb:

“Şura qarşısında Azərbaycan iqtisadiyyatının yaxın 10 il ərzində 2 dəfəyə qədər artıma nail olunması ilə bağlı tapşırıqlar qoyulub. Qeyri-neft sektorunun inkişafı insan kapitalından istifadəni nəzərdə tutur. İqtisadi Şuranın qarşısına qoyulan məqsədlər Məclisin İqtisadi siyasət, sənaye və sahibkarlıq komitəsinin qarşısında da qanunvericilik baxımından yeni çağırışlar müəyyən edir…”.


Qeyd edildi ki, Maliyyə nazirliyi tərəfindən Azərbaycanın 2021-ci ilin dövlət büdcəsinin ilkin göstəriciləri açıqlanıb. Yaxın vaxtlarda 2021-ci ilin dövlət büdcəsi layihəsi müzakirə üçün Milli Məclisə daxil olacaq. Bildirdi ki, 2021-ci ildə 2,8-3,4 faiz iqtisadi artım proqnozlaşdırılır. Bu büdcə ilk dəfə orta müddətli xərclər əsasında hazırlanıb.

Komitə sədri pandemiya dövründə parlamentdə iclasların səmərəli və keyfiyyətli keçirilməsi sahəsində göstərdiyi diqqət və qayğıya görə Milli Məclisin Sədri Sahibə xanım Qafarovaya komitə adından minnətdarlığını bildirdi. Diqqətə çatdırdı ki, İqtisadi siyasət, sənaye və sahibkarlıq komitəsi 2020-ci ilin yaz və növbədənkənar sessiyaları dövründə öz fəaliyyətini Milli Məclisin qanunvericilik planına uyğun şəkildə həyata keçirib. Ölkədə elan edilmiş karantin rejimi ilə əlaqədar vətəndaşlarla birbaşa ünsiyyət imkanları məhdud olsa da, komitə üzvləri seciçilərlə onlayn qəbullar keçirib.

Qeyd edildi ki, komitədə 26 iclas keçirilib bu iclaslarda 96 məsələ, o cümlədən 94 qanun layihəsi və 1 rəy geniş müzakirə edilib. Bu dövr ərzində Hesablama Palatasının 2019-cu il üzrə fəaliyyəti haqqında hesabat, “2019-cu il dövlət büdcəsinin icrası haqqında” Azərbaycan Respublikası qanununun layihəsi, “2020-ci il dövlət büdcəsi haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikası qanununun layihəsi komitədə geniş müzakirə olunub.

Bildirilib ki, keçirilən iclaslardan 14 video-konfrans formatında onlayn keçirilib. Yaz sessiyada komitəyə 24 vətəndaşın imzası ilə ərizə, şikayət və müraciət daxil olub, onlardan 15 tədbir görülməsi üçün müvafiq təşkilatlara göndərilib, 8 ərizə işə alınıb.

Deputatlar 2020-ci il yaz və növbədənkənar sessiyalarda komitənin fəaliyyətini qənaətbəxş olduğunu nəzərə çatdırıblar.

2020-ci il payız sessiyasında görüləcək işlər barədə məlumat verilərək bildirilib ki, bu müddətdə “Turizm haqqında”, “Lombardlar haqqında” və digər sənədlərə baxılması, dinləmələrin keçirilməsi nəzərdə tutulur. İclasda komitənin iş planı təsdiqləndi.

Sonra Milli Məclisin Dövlət quruculuğu, inzibati və hərbi qanunvericilik şöbəsinin əməkdaşı Əsmər İsmayılova “Müstəqil Dövlətlər birliyinin iştirakçısı olan dövlətlərin əqli mülkiyyət obyektlərinə hüquqların qorunması sahəsində gömrük orqanlarının qarşılıqlı fəaliyyəti haqqında” Sazişin təsdiq olunması barədə Azərbaycan Respublikası qanununun layihəsi haqqında sənədi təqdim etdi. Bildirildi ki, Saziş 2019-ci il 31 may tarixində Aşqabad şəhərində imzalanıb. Sazişdə əqli mülkiyyət obyektləri üzərində hüquqların qorunması sahəsində əməkdaşlığın inkişaf etdirilməsi ilə bağlı məqamlar əks olunub.

​İclasda Tahir Mirkişili “Dövlət rüsumu haqqında” Azərbaycan Respublikasının Qanununda dəyişiklik edilməsi barədə qanun layihəsi birinci oxunuşda təqdim etdi. Qeyd edildi ki, təklif olunan dəyişiklik qanunun 18.65.3-1-ci bəndi yeni redaksiyaya əsasən, yaxın qohumlara (ər-arvad, uşaqlar, valideynlər, övladlığa götürənlər və götürülənlər, babalar, nənələr, nəvələr, doğma və ögey qardaşlar və bacılar) bağışlanması halları istisna olmaqla, fiziki şəxslər tərəfindən minik avtomobillərinin özgəninkiləşdirilməsi haqqında müqavilələr və hərracın nəticələri haqqında protokol əsasında həmin minik avtomobillərinin müvafiq icra hakimiyyəti orqanında dövlət qeydiyyatına alınmasına görə dövlət rüsumunun məbləği müvafiq icra hakimiyyəti orqanı tərəfindən təsdiq edilir.

Bildirildi ki, Vergi Məcəlləsində dəyişiklik edilməsi haqqında (birinci oxunuş) qanun layihəsi Azərbaycan Prezidentinin “Övladlığagötürmə sahəsində idarəetmənin təkmilləşdirilməsi ilə bağlı tədbirlər haqqında” 2018-ci il 10 dekabr tarixli 393 nömrəli Fərmanına uyğun olaraq hazırlanıb. Bu məqsədlə Məcəllənin 102.4.4-cü maddəsi ləğv olunur, 102.3-cü maddəsinə müvafiq düzəliş edilir. Düzəlişə görə daimi qulluq tələb edən sağlamlıq imkanları məhdud uşağa və ya I dərəcə əlilliyi olan şəxsə baxan və onunla birlikdə yaşayan valideynin, arvadın (ərin), himayəçinin və ya qəyyumun gəlirlərinin gəlir vergisindən azad olunan hissəsinin artıraraq 200 manat məbləğində müəyyən edilməsi, həmçinin gəlir vergisi üzrə güzəşt tətbiq olunan kateqoriyaya sağlamlıq imkanları məhdud uşaqları övladlığa götürən şəxslərin də aid edilməsi nəzərdə tutulur.

​Gündəliyin növbəti məsələsini Milli Məclisin İqtisadi və sosial qanunvericilik şöbəsinin müdiri Məhəmməd Bazıqov təqdim edərkən bildirdi ki, “Sosial müdafiə sahəsində idarəetmənin təkmilləşdirilməsi ilə bağlı əlavə tədbirlər haqqında” 30 dekabr 2019-cu il tarixli Fərmana əsasən Əmək və Əhalinin Sosial Müdafiəsi Nazirliyinin tabeliyində publik hüquqi şəxs statuslu dörd qurum – Dövlət Məşğulluq Agentliyi, Dövlət Sosial Müdafiə Fondu, Dövlət Tibbi-Sosial Ekspertiza və Reabilitasiya Agentliyi və Sosial Xidmətlər Agentliyi yaradılıb. Bununla bağlı Əmək Məcəlləsində, “Sahibkarlıq fəaliyyəti haqqında”, “İşsizlikdən sığorta haqqında” və “Azərbaycan Respublikasının 2020-ci il dövlət büdcəsi haqqında” qanunlarda dəyişikliklər nəzərdə tutulub. Bu qanunların bir sıra maddələrində “müvafiq icra hakimiyyəti orqanı” sözlərinin “müvafiq icra hakimiyyəti orqanının müəyyən etdiyi orqan (qurum)” sözləri ilə əvəz olunması təklif olunur. Belə ki, bu sənədlərdə nəzərdə tutulan səlahiyyətləri publik hüquqi şəxs statuslu Dövlət Məşğulluq Agentliyi, Dövlət Sosial Müdafiə Fondu, Dövlət Tibbi-Sosial Ekspertiza və Reabilitasiya Agentliyi və Sosial Xidmətlər Agentliyi həyata keçirəcək.

Həmin qanunlarla bir paketdə daxil olan “Dövlət qulluğu haqqında” qanuna təklif olunan dəyişikliyə əsasən isə “Dövlət orqanı anlayışı” maddəsindən dövlət orqanının Dövlət Sosial Müdafiə və İşsizlikdən sığorta fondlarının büdcəsindən maliyyələşdirilməsi müddəası çıxarılır. Bu dəyişiklik həmin qurumların publik hüquqi şəxsə çevrilməsi və dövlət orqanı statusunu itirməsi ilə bağlıdır.

Sonra Dövlət quruculuğu, inzibati və hərbi qanunvericilik şöbəsinin İnzibati qanunvericilik sektorunun müdiri Kamalə Paşayeva “Mülki Prosessual Məcəlləsində, Cinayət Məcəlləsində, Miqrasiya Məcəlləsində, İnzibati Xətalar Məcəlləsində, “Yerli (bələdiyyə) vergilər və ödənişlər haqqında” və “Nağdsız hesablaşmalar haqqında” (birinci oxunuşda) təqdim etdi. Söylədi ki, həmin qanun layihəsi 2018-ci il 30 noyabr tarixli 1356-VQD nömrəli “Azərbaycan Respublikası Vergi Məcəlləsində dəyişiklik edilməsi haqqında” Azərbaycan Respublikasının qanununa uyğunlaşdırılma məqsədilə hazırlanmışdır. Bu qanuna yeni bir anlayış – “məcburi nişanlanma ilə nişanlanmalı olan mallar” anlayışı daxil edilib.

Sonra bildirildi ki, “Azərbaycan Respublikası Vergi Məcəlləsində dəyişiklik edilməsi haqqında” 30 noyabr 2018-ci il tarixli 1356-VQD nömrəli Qanunu ilə qanunvericiliyə yeni bir anlayış – “məcburi nişanlanma ilə nişanlanmalı olan mallar” anlayışı daxil edilmişdi.

İclasda komitənin sədr müavini Əli Məsimli, deputatlar Vahid Əhmədov Aydın Hüseynov qanunvericiliklə bağlı öz fikirlərini bildirdilər.

Tədbirdə iştirak edən Məşhur Məmmədov, Rüfət Quliyev, Ziyad Səmədzadə, İqbal Məmmədov, Məzahir Əfəndiyev fikir və rəylərini bildirdilər.

Komitə üzvləri gündəlikdəki qanun layihələrini birinci oxunuşda Milli Məclisin plenar iclasına tövsiyə etdilər.

Kamil HƏMZƏOĞLU

Etikxeber.az

Read Previous

Deputat yol(lar)dan-YAZDI

Read Next

Yoluxmada yenidən azalma-142 – DAHA 1 ÖLÜM…

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir