Cinayət, İnzibati Xətalar məcəllələrinə və vətəndaşlıq haqqında qanuna-DƏYİŞİKLİKLƏR QƏBUL OLUNDU

Üçüncü oxunuşda müzakirəyə çıxarılan qanun layihələrinin ictimai müzakirəsi çox geniş şəkildə keçirilib.

Etikxeber.az-ın məlumatına görə, bunu Milli Məclisin (MM) bu gün keçirilən iclasında millət vəkili Kamal Cəfərov “Cinayət Məcəlləsində dəyişiklik edilməsi haqqında” qanun layihəsi barədə (üçüncü oxunuş), “İnzibati Xətalar Məcəlləsində dəyişiklik edilməsi haqqında” qanun layihəsi barədə (üçüncü oxunuş), “Azərbaycan Respublikasının vətəndaşlığı haqqında” Azərbaycan Respublikasının Qanununda dəyişiklik edilməsi barədə (üçüncü oxunuş) qanun layihələrinin müzakirəsi zamanı deyib.

Millət vəkili bildirib ki, qanun layihələrinə edilən təkliflər nəzərə alınıb:

“Layihədə Qüdrət Həsənquliyevin, Adil Əliyevin təklifləri nəzərə alınıb və müvafiq dəyişiklik edilib. Millət vəkillərinin təklifi nəzərə alınaraq İnzibati Xətalar Məcəlləsinin 613-cü maddəsinə “minimal həddə” sözü əlavə edilib. Kölgə iqtisadiyyatı ilə mübarizə çərçivəsində olan hissələrdə müvafiq dəyişikliklər əksini tapıb. Fazil Mustafanın plenar iclasda narkomaniya ilə bağlı təklifinə uyğun olaraq dəyişikliklər edilib. Hər üç qanun layihəsinin qüvvəyə minmə müddəti cari ilin 1 iyun tarixinə dəyişdirilib və müvafiq texniki dəyişikliklər edilib. Hər üç qanun layihəsi vətəndaş cəmiyyəti, hüquq ictimaiyyəti tərəfindən yüksək dəstək alıb”.

Sonra hər 3 qanun layihəsi səsə qoyularaq qəbul edilib.

K. HƏMZƏOĞLU

Etikxeber.az