“Dialoqun qurulmasında avropalı tərəfdaşlarımızın dəstəyinə ehtiyac duyuylur” – Rövşən Rzayev

Belçikada səfərdə olan Azərbaycan Respublikası Milli Məclisinin deputatları Rövşən Rzayev və Fuad Muradov oktyabrın 5-də bu ölkənin Flamand regionunun parlamentinin prezidenti Yan Peumans ilə görüşüblər.

Etikxeber.az xəbər verir ki, görüşdə  Dağlıq Qarabağ münaqişəsi ətrafında mövcud vəziyyətlə bağlı ətraflı fikir mübadiləsi aparılıb.

Münaqişənin tarixi haqqında məlumat verən deputat Rövşən Rzayev Ermənistanın Azərbaycan torpaqlarının 20 faizini işğal etdiyini, nəticədə 1 milyondan çox azərbaycanlının qaçqın və məcburi köçkünə çevrildiyini, Dağlıq Qarabağın azərbaycanlı icmasına qarşı Xocalı soyqırımı da daxil olmaqla çoxsaylı müharibə cinayətlərinin törədildiyini diqqətə çatdırıb. O, etnik təmizləmə nəticəsində bu gün həmin icmanın Azərbaycanın müxtəlif bölgələrində yaşadığını və doğma torpaqlarına qayıtmaq imkanına malik olmadığını deyib. Deputat, həmçinin münaqişənin həlli istiqamətində müstəsna əhəmiyyətə malik amil kimi Dağlıq Qarabağın azərbaycanlı və erməni icmaları arasında birbaşa dialoqun qurulmasının vacibliyini önə çəkib, erməni tərəfinin qeyri-konstruktiv mövqeyi səbəbindən bu səylərin indiyədək heç bir nəticə vermədiyini vurğulayıb, bu dialoqun qurulmasında avropalı tərəfdaşlarımızın dəstəyinə ehtiyac duyulduğunu diqqətə çatdırıb.

Deputat Fuad Muradov Azərbaycanın regionda davamlı sülhün qurulmasında maraqlı olduğunu və bunun üçün Ermənistan-Azərbaycan münaqişəsinin həllinin vacibliyini vurğulayıb. O, avropalı parlamentarların Azərbaycanın razılığı olmadan işğal altındakı Dağlıq Qarabağ bölgəsinə səfərlərinin beynəlxalq hüquqla ziddiyyət təşkil etdiyini, münaqişənin həllinə qətiyyən töhfə vermədiyini, əksinə bunun münaqişənin bu vəziyyətdə saxlanılmasında maraqlı qüvvələr tərəfindən sui-istifadə edildiyini söyləyib.

Y.Peumans Flamand regionu parlamentinin bir neçə üzvünün öncədən Azərbaycan tərəfi ilə razılaşmadan Dağlıq Qarabağ bölgəsinə etdikləri səfərlə bağlı Azərbaycanın ciddi narahatlığından xəbərdar olduğunu bildirib. O, bu səfərin heç bir halda Flamand parlamentinin fəaliyyəti ilə əlaqəli olmadığını, həmin deputatların şəxsi təşəbbüsləri əsasında reallaşdırıldığını vurğulayıb, gələcəkdə belə halların qarşısının alınması üçün müvafiq məlumatların həmin deputatlara çatdırılacağını qeyd edib.

Deputatlar Y.Peumansı Azərbaycana səfərə dəvət ediblər.

Etikxeber.az