“Dini etiqad azadlığı haqqında” qanuna dəyişiklik edildi…

…Eyni zamanda, Şəhərsalma və Tikinti Məcəlləsi dəyişdirildi

Milli Məclisin (MM) mayın 16-da keçirilən plenar iclasında Şəhərsalma və Tikinti Məcəlləsində dəyişiklik edilməsi haqqında qanun layihəsi müzakirə edilib. 

Etikxeber.az-ın xəbərinə görə, qanun layihəsi barədə MM-in Hüquq siyasəti və dövlət quruculuğu komitəsinin sədri Əli Hüseynli məlumat verib. Onun sözlərinə görə, Şəhərsalma və Tikinti Məcəlləsinə dəyişikliklə bağlı qanun layihəsi tikinti obyektinin layihələndirilməsi üçün zəruri olan ilkin məlumatların əldə edilməsi, gələcək tikintinin uyğunluğunun əvvəlcədən müəyyənləşdirilməsi üçün ərazinin tikinti planlarının real tətbiqi, texniki şərtlərin verilmə müddətinin azaldılması və “vahid pəncərə” prinsipi ilə tənzimlənməsi, tikinti layihələri üçün tikintiyə icazə alma müddətini azaldılması, ekspertiza tələb olunmayan tikinti layihələri üçün aidiyyəti təşkilatlardan rəylərin alınması prosedurunun sadələşdirilməsini nəzərdə tutulur.

Bu dəyişikliyə əsasən, tikinti layihələrinin həyata keçirildiyi ərazilər üzrə ərazi-tikinti planlarının rolu artırılır. Qanun layihəsinə əsasən, ərazi üzrə ümumi tələbləri nəzərdə tutan bu planlar fərdi qaydada tikinti layihələrinin layihələndirilməsini, şəhərsalma normativlərinin əvvəlcədən nəzərə alınmasını xeyli asanlaşdıracaq. Sənədə əsasən, sifarişçilər tikintidən əvvəl müvafiq icra hakimiyyətinə müraciət edərək tikinti parametrləri barədə ilkin məlumatları əldə edə biləcəklər. mövcud qanunvericiliyə əsasən, təchizat müəssisələri 15 gün ərzində texniki şərtlərlə bağlı sorğuya cavab verməlidir. Təklif edilən dəyişikliyə əsasən, bu müddət azaldılır. Belə ki, təkliflər qəbul edilsə, sifarişçilər bu sorğuları 10 gün ərzində cavablandırılmalıdır. Məcəllədə yeni məlumatlandırma sisteminin də qurulması nəzərdə tutulub. Bu sistem vasitəsilə sifarişçilər elektron qaydada, rahat şəkildə tikintiyə dair tələb olunan məlumatları əldə edə biləcəklər. Göründüyü kimi, bütün bu yeniliklər tikinti layihəsini hazırlanmasının mümkün dərəcədə asanlaşdırılmasına, həmçinin mövcud tikinti və şəhərsalma normativlərinə uyğun aparılmasına yönəlib.

Digər vacib məqam tikintiyə icazəyə müraciət ilə bağlıdır. İlkin məlumatlar əsasında layihə hazırlayan sifarişçi layihə sənədləri ilə müvafiq icra hakimiyyətin orqanına müraciət edir. Tikinti obyektləri ekspertizası tələb olunan və olunmayanlara bölünür. Hazırda hər iki kateqoriya obyekt üzrə tikintiyə icazə alma müddəti 3 ayadək uzanır. Dəyişikliyə görə isə ekspertizası tələb olunan obyektlərə icazə bir ay müddətində, tələb olunmayanlara isə 12 iş günü müddətində veriləcək. Tikintiyə icazə verilərkən hazırda aidiyyəti təşkilatlarla 15 gün ərzində reallaşdırma proseduru mövcuddur. Yeni dəyişikliklərə əsasən, yalnız ekspertizadan keçirilməsi tələb olunan obyektlərə dair 15 iş günü ərzində aidiyyəti təşkilatlarla razılaşdırmalar aparılacaq, ekspertizadan keçirilməsi tələb olunmayan obyektlərə isə bu prosedur cəmi 5 gün təşkil edəcək. Rəyləri alınan təşkilatların Nazirlə Kabineti tərəfindən müəyyən edilir və bu siyahıdan kənar təşkilatla razılaşdırma aparılmasına yol verilməyəcək. Tikintiyə icazə ilə bağlı növbəti vacib məslə tikinti obyektinə texniki şərtlərin alınması ilə bağlıdır. Məcəlləyə edilmiş dəyişikliyə görə, artıq bütün texniki şərtlər müvafiq icra hakimiyyəti orqanı tərəfindən sifarişçinin tikintiyə icazə müraciəti əsasında ASAN sistemi vasitəsilə 10 gün ərzində əldə ediləcək və sifarişçiyə təqdim olunacaq.

Yeni dəyişikliyə əsasən, tikinti obyektinin istismarına icazə verilmə müddəti 30 gündən 20 günə endirilib. Bu müddət ərzində məsələyə baxılır və qərar qəbul edilir.Ekspertizadan keçirilmə tələb olunmayan obyektlərə icazənin alınması prosesi də xeyli sadələşdirilib. Bundan sonra, mülkiyyətində, istifadəsində və ya icarəsində olan torpaq sahəsində təyinatı üzrə insanların yaşaması və toplanması, habelə istehsalat fəaliyyətinin həyata keçirilməsi üçün nəzərdə tutulmayan yerüstü mərtəbələrin sayı ikidən çox olmayan anbar binalarının layihələri də ekspertizadan keçirilməyəcək.

Layihə səsə qoyularaq I oxunuşda qəbul edilib.

Sonra “Dini etiqad azadlığı haqqında” qanuna təklif olunan dəyişikliklər müzakirəyə çıxarılıb.

Layihə barədə İctimai birliklər və dini qurumlar komitəsinin sədri Siyavuş Novruzov məlumat verib. Layihəyə əsasən, Qafqaz Müsəlmanları İdarəsi (QMİ) xaricdə dini təhsil almış Azərbaycan vətəndaşlarını müvafiq icra hakimiyyəti orqanı ilə razılaşdırılmaqla islam dininə aid ayin və mərasimlər aparmasına icazə verə bilər. Bununla QMİ-yə yeni səlahiyyət verilir.

Dəyişiklikdə dini mərkəz tərəfindən dəvət edilmiş din xadimləri istisna olmaqla, əcnəbilər və vətəndaşlığı olmayan şəxslərin dini təbliğat aparmasının qadağan edilməsi nəzərdə tutulub. Bununla indiyə qədər olan tam qadağa məhdudiyyəti yumşaldılır. Bundan başqa, vətəndaşların təhsil almaq üçün xarici ölkələrin dini tədris müəssisələrinə göndərilməsi, dini tədris müəssisələri tələbələrinin və müəllimlərinin, habelə din xadimlərinin və mütəxəssislərinin mübadiləsi müvafiq icra hakimiyyəti orqanı ilə razılaşdırılmaqla dini mərkəz tərəfindən həyata keçirilməsi də layihədə əks olunub.

Adıçəkilən layihə də səsə qoyularaq qəbul edilib.

Etikxeber.az

Read Previous

Qüdrət Həsənquliyev “ölüm hökmü”nün bərpasına “hə”, Siyavuş Novruzov “yox” dedi – YENİLƏNİB

Read Next

“Bələdiyyə üzvlərinin etik davranış qaydaları haqqında” qanun layihəsi ikinci oxunuşdan keçdi

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir