“Etimadı doğruldan, fəal deputatların namizədlikləri yenidən veriləcək” – DEPUTAT

Aydın MİRZƏZADƏ: Cəmi dörd il bundan əvvəl seçilmiş 20-yə qədər yeni deputatın böyük əksəriyyəti aktivdir

Etikxeber.az-ın müxbirinin suallarını millət vəkili Aydın Mirzəzadə cavablandırır:

– Aydın müəllim, qarşıdan 6 çağırış Milli Məclis (MM) seçkiləri gəlir. Necə hesab edirsiniz,  hakim Yeni Azərbaycan Partiyası (YAP) qarşıdan gələn seçkilərlə bağlı namizədlər seçimində ciddi dəyişikliklər, korrektələr edə bilərmi, xüsusilə də, parlamentdə təmsil olunan deputatları ilə əlaqədar?

“Daha çox yer əldə etmək əzmindəyik”

– Bu gün o məsələ müzakirə edilmir. Zamanı gələndə YAP parlamentə öz namizədlərini təqdim edəcək. Hər bir siyasi partiya kimi YAP da parlamentdə daha çox yer əldə etmək əzmindədir və etimadı doğruldan, fəal deputatların namizədlikləri yenidən veriləcək, gənclər olacaq, özünü təsdiqləmiş ictimai fəallar irəli sürüləcək. Yəni, bununla bağlı məsələlər gələn il parlament seçkisi ərəfəsində həyata keçiriləcək.

“İnternet müxalifətinin cavabını Azərbaycan ictimaiyyəti özü verir”

– Bəzən belə fikirlər də səslənir,  mətbuatda da bu yöndə məlumatlar yer alır ki, YAP rəhbərliyi, İcra Katibliyi tez-tez parlamentdəki təmsilçilərinə ciddi iradlarını, tənqidlərini bildirir, xüsusilə, onları sosial şəbəkələrdə passivlikdə qınayır. Qeyd edək ki, bu məlumatlar da əksər hallarda təkziblənmir. Bu baxımdan, YAP rəhbərliyi, İcra Katibliyi ilə partiyanın parlamentdəki korpusu arasında münasibətlər qaydasındadırmı, yoxsa?

– Birincisi, YAP rəhbərliyinin bir hissəsi indi də parlamentdədir, bir hissəsi də vaxtilə parlamentdə olub. Yəni, o deyilənlərin heç bir əsası yoxdur. Seçilən deputatlar, parlamentdə olan deputatlar fəaldırlar. Həm parlamentin iclaslarında, həm mətbuatda öz mövqelərini ortaya qoyurlar. Bu gün ölkənin daxili və xarici siyasətini dəstəkləyirlər. Cənab prezidentin apardığı siyasətin təbliğ edilməsində böyük rol oynayırlar. Hər hansı bir iraddan, hər hansı bir xüsusi tapşırıqdan söhbət gedə bilməz.

Sosial şəbəkədə müxalifətə cavab verməyə gəldikdə isə adından da görünür ki, müxalifət bu gün sosial şəbəkədə var. Cəmiyyətdə, ictimaiyyətdə, kollektivdə, insanlar arasında müxalifətin güclü sosial bazası yoxdur. Və bir nəfərin adına onlarla saxta profillər yaradaraq, bir görüntü yaratmağa, bir kütləvilik yaratmağa çalışırlar. Onların hamısının cavabını da xalq özü verir və mən bir siyasətçi kimi onların da siyasətinə baxıram, izləyirəm, onların hansı məsələləri qaldırdıqlarına baxıram və onlara sərt cavablar da verirəm.

Bu gün o internret müxalifətinin cavabını Azərbaycan ictimaiyyəti özü verir. Çünki insanlar yaxşı başa düşürlər ki, onların çağırışları, onların siyasəti Azərbaycana, konkret olaraq hər bir vətəndaşa yaxşı heç nə vermir.

“YAP vaxtaşırı özünün namizədlərini yeniləyir…”

aydinnn

meclis-oqtay-1

– Qarşıdan gələn parlament seçkilərində sürprizlər, “İstanbul, İmamoğlu ssenarisi”nə bənzər ssenarilər yaşana, tamam fərqli siyasilər və siyasi qüvvələr meydana çıxa bilərmi?

– Belə bir məsələ gözlənilmir. Birincisi, iqtidar işləyir, fəaliyyət göstərir. Cənab prezidentin həm daxili, həm xarici siyasətinin uğurları göz qarşısındadır. İnsanlar yeridilən kursa, insanlar köklü siyasətə səs verirlər. Eyni zamanda, insanlar səs verəndə ilk növbədə cənab prezidentin siyasətinə münasibətinə görə namizədə səs verirlər və verəcəklər. Bu, birinci məqam. İkincisi, hakim Yeni Azərbaycan Partiyası vaxtaşırı özünün namizədlərini yeniləyir, həmçinin,  veteranlara, xidməti olanlara həmişə yüksək hörmətini, ehtiramını bildirir.

 Amma zaman-zaman yeni gənclər gəlir,  artıq özünü  təsdiqləyən, partiyaya bağlı olduğunu, gedən proseslərə sağlam, demokratik münasibət göstərən insanlar ortaya çıxır. Onların potensialından da maksimum istifadə edilir və fikir versəniz görərsiniz ki, hər seçkidə YAP həm tanınan  insanların namizədliyini irəli sürür, eyni zamanda, yeni simalar ortaya çıxarır ki, onlar da parlamentdə özlərini təsdiqlədirlər.

Məsələn, cəmi dörd il bundan əvvəl seçilmiş 20-yə qədər yeni deputatın böyük əksəriyyəti aktivdir. Özlərini bu və ya digər sahənin mütəxəssisi kimi, dövlətin qarşısında duran məsələlərin həllinə çox konstruktiv təklif verən bir siyasətçi kimi tanıda biliblər. Bu, sevindiricidir. Bu, insanı sevindirir. Deməli, öz dövlətinə, özünün tarixinə, xalqın taleyinə bağlı olan yeni bir nəsil yetişir və müstəqilliyimizin də ən böyük qazancı budur.

Kamil HƏMZƏOĞLU

Etikxeber.az

Read Previous

“Qalatasaray” daha iki futbolçunun transferini reallaşdırdı

Read Next

“Cəmiyyətə süni gündəm təqdim etməyə çalışırlar ki…” – HİKMƏT BABAOĞLU

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir