Şəhid və Qazi adını kirləməyin, kirlətməyin! AYIBDIR!!!-KAMİL HƏMZƏOĞLU YAZDI
Nicat Malik oğlu Qarazadə…
Əslən Biləsuvarlı, özü isə Abşeronlu…
Xüsusi Təyinatlı, “Qisas” əməliyyatı Şəhidi…
Vətən sevdalısı və Vətən fədaisi…
Cəmi 20 yaşlı Nur üzlü Şəhidimiz…
***
Əslən Biləsuvar rayonunun İsmətli kəndindən olan Nicat Qarazadə 2002-ci ilin oktyabr ayının 24-də Abşeron rayonunun Ceyranbatan qəsəbəsində, sadə bir ailədə dünyaya gəlib…
Ailənin üç övladından, iki qardaşdan biri və evin böyük oğlu olub…
Tək bacısı hazırda ailəlilidir, bir oğul anasıdır…
Övladına da qardaşının-Nicatın adını qoyub…
Adı ilə böyüsün, dayısının torpağı sanı yaşasın, balaca Nicat!
Nicat 2008-2019-cu illərdə Ceyranbatanda yerləşən 2 saylı orta tam məktəbdə oxuyub…
Orta məktəbi bitirdikdən, 18 yaşını tamamladıqdan sonra həqiqi hərbi xidmətə, Vətənin keşiyinə yollanıb…
Xüsusi Təyinatlı Qüvvələrin Əsgəri olub…
Əsgərliyini bitirər-bitirməz taleyini Ordu, hərb ilə bağlayıb, Xüsusi Təyintlı Qüvvələrdə işləməyə, fəaliyyət göstərməyə başlayıb…
Və Xüsusi Təyinatlı Qüvvələrin Əsgəri kimi, “Qisas” əməliyyatı zamanı, 2022-ci ilin sentyabr ayının 12-dən 13-nə keçən gecə Kəlbəcər istiqamətində qanlı döyüşlərdə qəhrəmancasına Şəhidlik məqamına ucalıb…
Şəhidliyindən cəmi saatlar öncə isə ailəsi, valideynləri ilə danışıb, sanki Şəhid olacağını hiss edibmiş kimi, hər kəsdən halallıq istəyib…
Və nəşi 17 sentyabr tarixində İkinci Şəhidlər Xiyabanında Əbədiyyətə uğurlanıb…
Şəhidliyindən sonra “Vətən uğrunda” medalına və 3-cü dərəcəli “Vətənə xidmətə görə” ordeninə layiq görülüb…
Hazırda adını daşıyan küçə var…
Valideynləri isə oxuduğu məktəbə övladlarının adının verilməsini istəyir…
20 yaşında Şəhadətə ucalan Nicat həm də subay olub…
Ümumiyyətlə, Nicat daxil olmaqla, Qarazadələr ailəsinin beş Şəhidi var…
İkisi Birinci Qarabağ Savaşı Şəhidi, biri İkinci Vətən Müharibəsi Şəhidi (Elşən Müslümov), birisi isə doğmaca bibisi oğlu, 2016-cı il Aprel döyüşlərinin Şəhidi Elmidar Səfərovdur.
***
Bugünlərdə hər zaman Şəhid ailələrinin yanında olan ictimai fəal, həm də Şəhidin yaxın qohumu Arzu Əliyeva və şairə Raziyə Kamilqızı ilə Şəhidimizin ailəsini, ocağını ziyarət etdik…
Şəhidimizin ailəsinə, atası Malik Qarazadəyə Allahdan bir daha səbr və dözüm dilədik…
“Şəhidimizin məkanı cənnətlik, məqamı uca, ruhu şad olsun!”-dedik…
Əziz və müqəddəs ruhu qarşısında ehtiramla baş əydiyimizi bildirdik…
Təxminən bir saata yaxın çəkən ziyarətimiz zamanı Şəhidimizin atası ilə söhbətləşdik, dərdləşdik, ona və Qarazadələr ailəsinə təsəlli verməyə çalışdıq…
Onunla birlikdə Nicatın 20 illik qısa, lakin şərəfli həyat və hərb yoluna nəzər saldıq…
Hər anı İgidliklərlə, Vətənsevərliklə dolu bir ömür…
Şəhid ömrü, Qəhrəman ömrü…
Qürurumuz, Fəxrimizdir!
Dərgahı mübarək olsun!
Nur içində yatsın!
***
FOTOLAR:
Kamil HƏMZƏOĞLU (HƏMİDOV)
Etikxeber.az
