Şəhid və Qazi adını kirləməyin, kirlətməyin! AYIBDIR!!!-KAMİL HƏMZƏOĞLU YAZDI
Bu gün, 12 mart tarixində daha bir İkinci Vətən Müharibəsi Şəhidinin, Nur üzlü Vətən sevdalısının anası ilə tanış oldum…
Daha bir Qələbə və Zəfər Şəhidimizin-Sumqayıtlı İkinci Vətən Müharibəsi Şəhidi Əbil Qadir oğlu Cəbizadənin anası İradə xanımla bir araya gəldim…
Sumqayıtlı İkinci Vətən Müharibəsi Şəhidləri-ailənin tək övladları-Rüfət Mustafayevlə Abdulla Əhmədovun Cənnətdəki üçüncü doğum günü mərasimində Şəhidimiz Əbil Cəbizadənin anası ilə söhbətləşdim, dərdləşdim…
Ona, ailəsinə Allahdan səbr və dözüm arzuladım, “Şəhidimizin məkanı cənnətlik, ruhu şad olsun!”-dedim…
Şəhidimizin ruhu qarşısında ehtiramla baş əydiyimi bildirdim…
Bir ömür boyu Rüfət, Rüfətlərə, cəmi Şəhidlərimizə borclu olduğumu, borclu olduğumuzu dilə gətirdim…
Əslən Göyçay rayonundan olan Şəhidimiz-Əbil Cəbizadə 1993-cü ilin fevral ayının 26-da, Xocalı soyqrımının birinci ildömündə dünyaya gəlib…
Orta məktəbi bitirdikdən sonra Azərbaycan Dövlət İqtisad Universitetinə (UNEC) daxil olub və ali təhsilini başa vurduqdan sonra, 2015-ci ildə həqiqi hərbi xidmətə yollanıb…
Əsgərlikdə olarkən Aprel döyüşlərində iştirak edib…
Əsgərliyini başa vurduqdan sonra evinə, ailəsinə dönüb…
İşləyib, çalışıb…
İkinci Vətən Müharibəsindən 6 gün öncə isə hərbi səfərbərliyə cəlb olunub və sentyabrın 27-dən, müharibənin ilk günündən də döyüşlərə qatılıb…
Füzuli və Cəbrayıl istiqamətlərində döyüşüb və şərəfli döyüş yolu 18 gün çəkib…
Və oktyabrın 14-də Füzuli istiqamətində döyüşlərdə qəhrəmancasına Şəhidlik məqamına ucalıb…
Nəşi isə bir gün sonra, oktyabrın 15-də Sumqayıt şəhər Şəhidlər Xiyabanında Əbədiyyətə uğurlanıb…
Şəhidliyindən sonra 3 medalla-“Vətən uğrunda”, “Füzulinin azad olunmasına görə” və “Cəbrayılın azad olunmasına görə” medalları ilə təltif edilib…
27 yaşına çatsa da, 27 yaşında Şəhid olsa da, Şəhidimiz subay olub…
İradə xanımın dediklərindən:
“Evlənməkdən söz düşəndə həmişə gülə-gülə deyirdi ki, atam gec evlənib, mən də gec evlənəcəyəm, 30 yaşımda ailə həyatı quracağam…Amma ailə həyatı qurmaq balama nəsib olmadı…30 yaşını məzarı başında qeyd etdik balamın (gözləri dolur)…”
Məqamı Uca, dərgahı mübarək olsun, Şəhidimizin!
Nur içində yatsın!
Allah ailəsinə, valideynlərinə bir daha səbr versin!
Kamil HƏMZƏOĞLU (HƏMİDOV)
Etikxeber.az
