Fuad Muradovu Ülvi Quliyev əvəzləyəcək – BU GÜN

Bu gün Milli Məclisin (MM) növbəti plenar iclası keçiriləcək.

Parlamentin mətbuat xidmətindən Etikxeber.az-a verilən məlumata görə,  gündəliyə 24 məsələ daxildir.

İclasda əvvəlcə “Azərbaycan Respublikasının 2017-ci il dövlət büdcəsinin icrası haqqında” Qanunu, “Əlilliyi olan şəxslərin hüquqları haqqında” qanun layihəsi üçüncü oxunuşda müzakirə olunacaq.

Sonra Torpaq, İnzibati Xətalar məcəllələrində, Azərbaycan Respublikasının 1994-cü il 8 fevral 782 nömrəli Qanunu ilə təsdiq edilmiş “Azərbaycan Respublikasının Konsul Nizamnaməsi”ndə, “Normativ hüquqi aktlar haqqında” Azərbaycan Respublikasının Konstitusiya Qanununda, “Torpaq icarəsi haqqında”, “Dövlət torpaq kadastrı, torpaqların monitorinqi və yer quruluşu haqqında”, “Notariat haqqında”, “Banklar haqqında”, “Poçt haqqında”, “Qiymətli metallar və qiymətli daşlar haqqında”, “Sığorta fəaliyyəti haqqında”, “Bədən tərbiyəsi və idman haqqında”, “İnvestisiya fondları haqqında”, “Qiymətli kağızlar haqqında”, “Dövlət rüsumu haqqında”, “Lisenziyalar və icazələr haqqında”, “Azərbaycan Prokurorluğunun 100 illiyi (1918-2018)” Azərbaycan Respublikasının yubiley medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında”, “Dövlət qulluğu haqqında”, “Yol hərəkəti haqqında” qanunlarda dəyişikliklər edilməsi barədə qanun layihələri nəzərdən keçiriləcək.

Deputatlar eyni zamanda, MM-in Gənclər və idman komitəsi sədrinin seçilməsi haqqında məsələyə baxacaqlar.

Qeyd edək ki, MM-in Gənclər və idman komitəsinin sədri Fuad Muradov prezidentin təyinatı ilə yeni hökumətdə yer aldığı üçün, bir müddətdir ki, onun parlamentdəki komitə sədri postu boşdur.

Odur ki, onun yerinə müavini Ülvi Quliyev MM-in Gənclər və idman komitəsinin sədri seçiləcək.

İclasda, həmçinin “Ətraf mühitə təsirin qiymətləndirilməsi haqqında” qanun layihəsi ikinci oxunuşda müzakirə ediləcək.

Etikxeber.az