Gənclər siyasəti ilə bağlı qanun əsaslı şəkildə dəyişdiriləcək… – YENİLƏNİB – (2)

“Bədən tərbiyəsi və idman fəaliyyətində yetkinlik yaşına çatmayanların mühafizəsi haqqında” yeni qanun layihəsi hazırlanır

Milli Məclisin (MM) qarşıdan gələn 2018-ci il yaz sessiyası ilə bağlı yanvarın 26-da  parlamentin Gənclər və idman komitəsinin ilk iclası keçirilib.

Etikxeber.az-ın xəbərinə görə, adıçəkilən komitənin sədri Fuad Muradov əvvəlcə  bildirib ki,  hesabat dövründə komitənin iclaslarında  bir neçə məsələ müzakirə olunub və plenar iclaslara tövsiyə edilib.

Onun sözlərinə görə, hesabat dövrü ərzində komitəyə 124 şikayət, ərizə, müraciət daxil olub və onlardan böyük qismi baxılması, həll edilməsi üçün aidiyyatı qurumlara göndərilib.

Komitə sədri eyni zamanda deyib ki, 2018-ci ilin qanunvericilik işləri planına isə  “Gənclər siyasəti haqqında”, o cümlədən, “Bədən tərbiyəsi və idman haqqında”, “İdmanda dopinq vasitələrinin və ya metodlarının istifadəsinə qarşı haqqında” qanunlara dəyişikliklər məsələsi, “Bədən tərbiyəsi və idman fəaliyyətində yetkinlik yaşına çatmayanların mühafizəsi haqqında” yeni qanun layihəsi və sair məsələlər daxildir:

“Biz ilk öncə gənclər siyasəti ilə bağlı qanuna əsaslı dəyişiklikləri nəzərdə tutan qanun layihəsi üzərində işləyib, onu müzakirələrə təqdim edəcəyik. Sonra isə bədən tərbiyəsi ilə bağlı yeni qanun layihəsinin hazırlanmasına başlayacağıq. Bunlar bizim üçün önəmli məsələlərdir…”

***

Dopinq vasitələrinin istifadəsinə qarşı cəza sərtləşdirilir – İDMANDA

“Azərbaycanda idmanda dopinq vasitələrinin istifadəsinə qarşı cəza sərtləşdiriləcək”.

Bunu da iclasda F. Muradov deyib.

Komitə sədri bildirib ki, bununla bağlı “İdmanda dopinq vasitələrinin və ya metodlarının istifadəsinə qarşı mübarizə haqqında” qanuna əlavələr edilməlidir:  “Ümumi təkliflər paketi var. Bura İnzibati və Cinayət məcəllərinə dəyişiklik də daxildir. Bu məsələ Gənclər və idman komitəsinin yaz sessiyasının qanunverici işlər planına daxil edilib”. O, həmçinin deyib ki, Azərbaycanda MM üzvlərinin iştirakı ilə beynəlxalq futbol turniri keçiriləcək və  yarışa bir neçə ölkənin nümayəndələri qatılacaq: “Turnirin fevralın 9-10-11-də keçirilməsi planlaşdırılır”.

 

***

Adil Əliyev: Qazaxıstan parlamentinin Gənclər və idman komitəsinin sədrinin Azərbaycana səfəri gözlənilir

Adıçəkilən komitənin üzvü Adil Əliyev bildirib ki, fevral ayında Qazaxıstan parlamentinin Gənclər və idman komitəsinin sədrinin Azərbaycana səfəri gözlənilir:

“Bildiyiniz kimi, Qazaxıstan parlamentinin sədri fevral ayında Azərbaycana səfər edəcək, Milli Məclisdə bir sıra görüşlər keçirəcək. Bu səfərlə əlaqədar olaraq da mən özüm şəxsən Qazaxıstanın Azərbaycandakı səfirliyi ilə danışıqlar apardım və səfər zamanı Qazaxıstan parlamentinin müvafiq komitəsinin sədrinin də iştirakını arzuladım. Ona görə çox güman ki, qazax həmkarımız da bu səfərə qatılacaq”.

***

Millət vəkili Şahin İsmayılov isə çıxışında  Azərbaycan Xalq Cümhuriyyətinin (AXC) 100 illiyi, yəni, “Cümhuriyyət ili” ilə bağlı Azərbaycan Demokratik Respublikasının (ADR)  ilk paytaxtı Gəncədə xüsusi iclasın keçirilməsi təklifilə çıxış edib:

“Hesab edirəm ki, Gəncədə komitəmizin ADR  rəhbərliyinin ilk vaxtlar fəaliyyət göstərdiyi binada xüsusi iclas keçirməsi məqsədəuyğyun olardı. Bu tədbirə ətraf bölgələrdən olan millət vəkilləri və idman mütəxəssisləri, idmaçnılar da dəvət olunardı. Bu, yerinə düşən bir addım olardı…”

***

Yol qəzalarının qarşısının alınması üçün piyadaların xüsusi işıq qaytarıcı vasitələrdən istifadəsi təklif olunur

Ş. İsmayıolv həmçinin, Azərbaycanda yol qəzalarının qarşısının alınması üçün piyadaların xüsusi işıq qaytarıcı vasitələrdən istifadə etməsini təklif edib. Ş.İsmayılov bildirib ki, ötən il təqribən 700-dən çox insan yol qəzalarında ölüb:

“Bu, olduqca çox böyük rəqəmdir. Bır sıra ölkələrin qanunvericliyində yol qəzalarının qarşısının alınması üçün məcburi şəkildə xüsusi işıq qaytarıcı vasitələrdən istifadə edilir. Bir çox ölkələrdə piyadalar üzərində xüsusi işıq qaytarıcı vasitələr olur və onlar gecə bir növ görünən hala gəlirlər. Bəlkə biz də bunu araşdıraq və bu məsələni qanunvericliyə daxil edək”.

Kamil HƏMZƏOĞLU

Etikxeber.az