Şəhid və Qazi adını kirləməyin, kirlətməyin! AYIBDIR!!!-KAMİL HƏMZƏOĞLU YAZDI
Bərdə rayonunun İkinci Vətən Müharibəsi Şəhidlərindən olan Pərvin Vüqar oğlu Əlizadənin Anım Günüdür.
Pərvin Əlizadənin bu gün Əbədiyyətə uğurlanmasından üç il keçir.
Anım Günü ilə bağlı bu gün səhər saatlarında Şəhidin məzarı ziyarət olunacaq, məzarı üzərinə gül dəstələri düzüləcək, ruhuna dualar oxunacaq.
Şəhidin məzarını ziyarətdən sonra ailəsinin yaşadığı evdə Anım mərasimi düzənlənəcək, adına ehsan veriləcək.
Etikxeber.az-ın xəbərinə görə, əslən Laçınlı olan Pərvin Əlizadə 1993-cü ilin sentyabr ayının 11-də Bərdə rayonunun Qazaxlar kəndində, sadə bir ailədə dünyaya gəlib.
Ailənin 3 oğlan övladından biri, evin böyük oğlu olub.
Atası Birinci Qarabağ Savaşı döyüşlərində iştirak edib.
Orta məktəbi bitirdikdən sonra Azərbaycan Dövlət Bədən Tərbiyəsi və İdman Akademiyasını bitirib.
İdmançı, bir çox yarışların qalibi olub.
Həyatını Ordu, hərb ilə bağlayıb.
Azərbaycan Ordusunun peşəkar hərbçisi olub, Leytenant hərbi rütbəsini daşıyıb.
İkinci Vətən Müharibəsinin ilk günündən də döyüşlərdə olub.
Tərtər-Ağdərə, Suqovuşan istiqamətlərində döyüşlərdə iştirak edib və oktyabr ayının 20-də isə “Tülkü dərəsi” deyilən yerdə-ağır döyüşlərdən birində qəhrəmancasına Şəhidlik məqamına ucalıb.
Nəşi bir gün sonra, oktyabrın 21-də Qazaxlar kənd qəbiristanlığında Əbədiyyətə uğurlanıb.
Şəhidliyindən sonra 3 medal və 1 ordenlə təltif olunub.
Bərdə şəhərinin özündə Şəhidin adını daşıyan küçə var.
O, həm də nişanlı olub.
Məkanı cənnətlik olsun!
Nur içində yatsın!
Kamil HƏMZƏOĞLU (HƏMİDOV)
Etikxeber.az
