Şəhid və Qazi adını kirləməyin, kirlətməyin! AYIBDIR!!!-KAMİL HƏMZƏOĞLU YAZDI
Mingəçevirdə yaşayan bir qrup İkinci Vətən Müharibəsi Şəhidi ailəsi, Mingəçevirli Şəhid anaları tərəfindən Mingəçevir Şəhər İcra Hakimiyyətinin başçısı İlham İsmayılova müraciət ünvanlanıb.
Etikxeber.az-ın xəbərinə görə, müraciətdə deyilir:
“Yazıb Sizə bildirmək istəyirik ki, biz Şəhid ailələri, Şəhid anaları övladlarımızın, İkinci Vətən Müharibəsi Şəhidlərinin adlarının, xatirələrinin əbədiləşdirilməsini istəyirik. Çünki bu, həm Şəhidlərimizin, canlarını çəkinmədən, tərəddüd etmədən Vətən yolunda fəda edən Oğulların, Vətən sevdalılarının Haqqıdır, həm də onları minbir əzab-əziyyətlərlə böyüdən, Vətən üçün yetişdirən Qəhrəman Şəhid ailələrinin, Şəhid valideynlərinin, Şəhid analarının. İstəyirik ki, Şəhidlərimiz undulmasın, yaddan çıxarılmasın, hər an xatırlansınlar, yad edilsinlər. Çünki unutsaq, unudularıq, unutsaq, nə onların ruhu, nə də uğrunda canlarından keçdikləri bu Torpaq, bu Vətən bizləri bağışlayar”.
“Ona görə istəyirik ki, şəhərimizin çoxsaylı avtobus (marşrut) dayanacaqlarında, park və meydanlarında Şəhidlərimizin fotoları, plakatları asılsın, yerləşdirilsin. Xatırlatmaq yerinə düşər ki, bugünlərdə Şəhid ailələrinin Gəncə şəhərindəki Şəhid ailələrini ziyarəti zamanı çox ürəkacan bir mənzərə ilə rastlaşdıq. Haraya getdiksə, hər yerdə Gəncə Şəhidlərinin fotolarına, plakatlarına rast gəldik, xüsusilə də, insanların gur, toplu halında toplaşdıqları avtobus dayanacaqlarında.
Bunun özü də Şəhidlərimizə verilən bir dəyərdir. Bu baxımdan çox istərdik ki, Gəncəmizdə olduğu kimi, Mingəçevirimizdə, dogma şəhərimizdə də Şəhidlərimizin fotoları, plakatları dayanacaqlarda, park və meydanlarda, şəhərin ən gur və ən baxımlı məkanlarında asılsın, yerləşdirilsin. Bu, həm Şəhidlərimizin ruhlarını sevindirmiş olar, həm də biz Şəhid ailələrinə təsəlli, təskinlik olar. İnanırıq və əminik ki, müraciətimiz tərəfinizdən diqqətə alınacaq və öz müsbət həllini tapacaq”-deyə, müraciətdə sonra qeyd olunur.
Etikxeber.az
