“Kimsə dövləti aldatmaq istəsə, qara paltarlı oğlan onun yanında dayanacaq”-AYDIN MİRZƏZADƏ – SPİKER İSƏ DEPUTAT KÖMƏKÇİLƏRİNİN İŞƏ GÖTÜRÜLMƏSİNDƏ GECİKMƏLƏR MƏSƏLƏSİNƏ AYDINLIQ GƏTİRDİ… – YENİLƏNİB

Biz istərdik ki, siz də tibbi maskadan istifadə edəsiniz.

Etikxeber.az xəbər verir ki, bunu bu gün Milli Məclisin (MM) “Azərbaycan Respublikası Milli Məclisi deputatının statusu haqqında”, “Azərbaycan Respublikası Milli Məclisinin Daxili Nizamnaməsi”ndə dəyişiklik edilməsi haqqında, “Azərbaycan Respublikası Milli Məclisinin komitələri haqqında” qanuna dəyişiklik edilməsi ilə bağlı qanun layihələrinin müzakirəsi zamanı millət vəkili Aydın Mirzəzadə deyib.

Millət vəkili bildirib ki, xarici ölkələrdə parlamentin iclaslarında spiker və müavinlər də maskadan istifadə edir.

A. Mirzəzadə mətbuatda deputatların gündəlikdən kənara çıxmasına qadağa qoyulması barədə xəbərlər dərc olunduğunu da deyib:

“Bu, yalandırsa, MM-in mətbuat xidmətinin rəhbəri buna münasibət bildirməlidir, deyilsə, bu, doğru yanaşma deyil. Deputat uzun müddət gözləməlidir ki, hansısa məsələ gündəliyə daxil edilsin, o zaman danışsın?”

***

“Kimsə dövləti aldatmaq istəsə, qara paltarlı oğlan mütləq onun yanında dayanacaq”.

Bunu da müzakirələr zamanı A. Mirzəzadə deyib.

Millət vəkili bildirib ki, Operativ Qərargah torpaq sahəsi olan işsiz insanlara 190 manatın verilməməsi ilə bağlı məsələyə yenidən baxmalıdır:

“Kiminsə kənddə pay torpağını becərib-becərmədiyini öyrənmək elə çətin deyil. Kimsə dövləti aldatmaq istəsə, qara paltarlı oğlan mütləq onun yanında dayanacaq”.

Millət vəkili, Xalq şairi Sabir Rüstəmxanlı isə artıq deputat köməkçilərinin işə götürülməli olduğunu bildirib:

“Rayondakı köməkçimə bir söz deyə bilmirəm. Çünki rəsmi olaraq işdə deyil. Biz artıq camaatla işimizi necə qurmalı olduğumuzu müəyyənləşdirməliyik. Bizə seçicilərimizlə görüşmək imkanı da yaradılmalıdır. Deputatların rayonlara getməsi üçün rəsmi icazə olmalıdır”.

Spiker Sahibə Qafarova bildirib ki, hələ bir çox deputatın sənədləri hazır deyil:

“Çox təəssüf ki, bəzi deputatların köməkçiləri Bakı qeydiyyatında olsa da, guya hansısa rayonda deputat köməkçisi kimi fəaliyyət göstərmək istəyir. Yəni bir çox sənəd qaydasında deyil. Yəni yeganə problem sənədlərin qaydasında olmamasıdır. Biz fərdi olaraq, heç bir deputatın köməkçisini qeydiyyata ala bilmərik. Deputatlar da məsələnin həllində iştirak etsinlər”.

Kamil HƏMZƏOĞLU

Etikxeber.az