“…Məlumatları gizlətmək fikrində deyilik” – Şahmar Mövsümov

“Azərbaycan 2003-cü ildən Mədən Sənayesində Şəffaflıq Təşəbbüsünə (MSŞT) qoşulub. Bu müddət ərzində biz hasilatla bağlı bütün məlumatları ictimaiyyətə açıqlamışıq. Bu müddət ərzində Mədən Sənayesində Şəffaflıq Təşəbbüsü çərçivəsində 20-dən çox hesabat dərc etmişik”.

Etikxeber.az xəbər verir ki, bunu Azərbaycan Dövlət Neft Fondunun (ARDNF) icraçı direktoru Şahmar Mövsümov bu gün keçirdiyi mətbuat konfransında deyib.

O, Azərbaycanın MSŞT-dən çıxmasının səbəblərini açıqlayıb:

“Biz 2013-cü ildən Mədən Sənayesində Şəffaflıq Təşəbbüsü tərəfindən Azərbaycana qarşı ikili standartların və qərəzli mövqenin sərgiləndiyini gördük. Mən dəfələrlə demişdim ki, bu münasibət davam edərsə, Azərbaycan Mədən Sənayesində Şəffaflıq Təşəbbüsündən çıxacaq. Bəzi “ekspertlər” deyirdi ki, Azərbaycanın Mədən Sənayesində Şəffaflıq Təşəbbüsündən çıxması Azərbaycanın kredit cəlb etməsinə problem yaradacaq. Qeyd edim ki, Azərbaycanın əsas layihəsinin maliyyələşməsində heç bir problem yoxdur. Bütün maliyyə mənbələrindən, o cümlədən özəl təşkilatlardan Cənub Qaz Dəhlizi layihəsinin maliyyələşdirilməsi üçün 2 milyard dollar vəsait cəlb edilib.

Dünya Bankı, Asiya İnkişaf Bankı, Asiya İnfrastruktur İnkişafı Bankı tərəfindən maliyyələşmə ehtiyacları təmin edilib. Başqa sözlə, bu amilin Azərbaycanın kredit reytinqinə təsiri olmayıb. Növbəti iddia o idi ki, Azərbaycan bu təşkilatdan ona görə çıxır ki, məlumatları gizlətmək istəyir.

Bu iddialar da əsassızdır. Çünki, bu ilin aprelin 5-də prezident İlham Əliyev hasilat sənayesində şəffaflığın və hesabatlılığın artırılması ilə bağlı əlavə tədbirlər haqqında fərman imzalayıb. Fərmana əsasən, Azərbaycanda Hasilat Sənayesində Şəffaflıq üzrə Komissiya yaradılıb. Artıq komissiyanın ilk iclası keçirilib. Biz Mədən Sənayesində Şəffaflıq Təşəbbüsündən çıxmaqla hasilatla bağlı məlumatları gizlətmək fikrində deyilik. Əvvəlki dövrdən də əhatəli hesabat dərc olunacaq. Biz bu prosesə müstəqil auditor da cəlb edəcəyik”.

Ş. Mövsümov əlavə edib ki, ikili standartlar sərgilənməsi dayandırılarsa, Azərbaycan təşkilata qoşulmaq məsələsinə baxa bilər.

S. Mövsümov həmçinin deyib ki, Azərbaycan Dövlət Neft Fondu (ARDNF) makroiqtisadi sabitliyin təmin olunması üçün Mərkəzi Banka (AMB) 2 mlrd. 279 mln. manat transfert edib.

Onun sözlərinə görə, bu il ARDNF-dən AMB-yə 7,5 mlrd. manatın transfert edilməsi nəzərdə tutulub:

“Bizim hesablamalarımız və proqnozlarımız onu göstərir ki, bu transfert tam həcmdə icra olunmayacaq”.

Etikxeber.az

Read Previous

Azərbaycan hərbi məhsul ixracı sahəsində yeni addım atan ölkələrdəndir – DEPUTAT

Read Next

Uçqun oldu, yol bağlandı – Şahdağ Milli Parkında

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir