MM-in yaz sessiyası start götürdü – ZAHİD ORUC İSƏ DEDİ Kİ… – YENİLƏNİB (7)

Fevralın 1-də  Milli Məclisin (MM) yaz sessiyası çərçivəsində ilk plenar iclası öz işinə  başlayıb.

Etikxeber.az-ın məlumatına görə, sessiya dövlət himninin oxunması ilə açılıb.

İlk plenar iclasın gündəliyinə MM-in İntizam və Hesablayıcı komissiyalarının yenidən təşkil edilməsi barədə məsələlər, yaz sessiyasının qanunvericilik işləri planı, “Azərbaycan Respublikası Hökuməti ilə Küveyt Dövləti Hökuməti arasında hava əlaqəsi haqqında” və “Azərbaycan Respublikası ilə Portuqaliya Respublikası arasında iqtisadi əməkdaşlıq haqqında” sazişlərin təsdiq edilməsi, “Azərbaycan Respublikası Silahlı Qüvvələrinin İntizam nizamnaməsi”ndə, “Azərbaycan Respublikası Silahlı Qüvvələrinin Qarnizon və qarovul xidmətləri nizamnaməsi”ndə, “Hərbi xidmət keçmə haqqında Əsasnamə”də, “İnformasiya əldə etmək haqqında”, Cinayət Məcəlləsində, İnzibati Xətalar Məcəlləsində, “Müflisləşmə və iflas haqqında”, “Mühasibat uçotu haqqında”, “Reklam haqqında”, “Qrant haqqında”, “Sosial sığorta haqqında”, “Dövlət rüsumu haqqında”, “Aviasiya haqqında”, Gömrük Məcəlləsində, “Gömrük tarifi haqqında”, “Dövlət rüsumu haqqında”, “Qiymətli kağızlar bazarı haqqında”, “Tarix və mədəniyyət abidələrinin qorunması haqqında”, “Azərbaycan Respublikasının daxili işlər orqanlarında xidmət keçmə haqqında Əsasnamə”də və “Şəxsin cinayət məsuliyyətinə cəlb edilməsi üçün kifayət edən narkotik vasitələrin və psixotrop maddələrin miqdarına, habelə onların külli miqdarına görə siyahıları”nda dəyişiklik edilməsi haqqında qanun layihələri daxil edilib.

***

Sonra MM-in Hesablayıcı və İntizam komissiyalarının yeni tərkibi müəyyənləşdirilib.

Hesablayıcı Komissiyasının yeni tərkibində Fəttah Heydərov, Qüdrət Həsənquliyev, Rafael Hüseynov, Xanhüseyn Kazımlı, Zahid Oruc, Sədaqət Vəliyeva, Mixail Zabelin təmsil olunacaqlar.

İntizam Komissiyasının tərkibi Ağacan Abıyev, Xanlar Fətiyev, Məlahət İbrahimqızı, Mirkazım Kazımov, Səttar Möhbalıyev, Fazil Mustafa və Kamran Nəbizadədən ibarətdir.

Hər iki komissiyanın yeni tərkibi səsə qoyularaq təsdiq edilib.

***

Ötən ilin payız sessiyasında görülən işlər barədə məlumat verən MM-in sədri Oqtay  Əsədov isə bildirib ki, parlament Prezident İlham Əliyevin  həyata keçridiyi siyasəti dəstəkləmək məqəsədi ilə qanunvericilik bazasının təkmilləşdirilməsində yaxından iştirak edib və bir sıra qanunlar qəbul edib.  Spiker  əlavə edib ki, parlamentin yaz sessiyasının gündəliyi müəyyən olunub:
“Yaz sesisyasında eyni zamanda, hökumətin, Ombudsmanın, İnsan alverinə qarşı koordinatorun hesabatı dinləniləcək. Bundan əlavə,  parlamentə bir sıra qanunların da daxil olması gözlənilir”.
***
zahid_oruc_esas
Sessiyada deputatlar arasında ilk çıxış edən millət vəkili Zahid Oruc deyib ki, rəsmi Bakı işğal olunmuş torpaqlara getmək istəyənlərə şərait yaratmalıdır.
Qeyd edək ki, Z. Oruc Azərbaycan sərhədlərini qanunsuz pozaraq  işğal olunmuş torpaqlarla gedən blodger Aleksnadr Lapşinlə bağlı  məsələni qaldırıb.
 Z. Oruc  Lapşinin Belarusda saxlanıldığını dilə gətirərək deyib ki, bu şəxsin Azərbaycana ekstradisiyası  gözlənilir.
“Bundan sonra Azərbaycan  Lapşini mühakimə etmək hüququnu  özündə saxlayır və necə hərəkət edəcəyini özü müəyyənləşdirəcək.
Ancaq mən təklif edirəm ki, xarici vətəndaşalra işğal olunmuş gedənlərə hansısa formada  şərait yaratmalıdır”- deyə, millət vəkili vurğulayıb.
 Onun fikrincə, Azərbaycan işğal olunmuş torpaqlara getmək istəyənlərə viza verməlidir, çünki ermənilər  bundan narazı qalacaq:
“Biz  bu yolu seçməliyik”.
***
vahid-1
“Korrupsiyanın qarşısını almaq istəyiriksə…”– VAHİD ƏHMƏDOV

Millət vəkili Vahid Əhmədov da çıxışında iki qanun layihəsinin qəbul edilməsi təşəbbüsü ilə çıxış edib.

Deputat bildirib ki, 2016- cı ilin sonunda Azərbaycanın inkişaf modeli dəyişdirilərək “Strateji Yol Xəritəsi” təsdiq edildi:

“Bu sənədin həyata keçirilməsi üçün ciddi addımlar atılmalıdır. Bu, çox ağır sənəddir. Biz illərdir ki, iki qanun layihəsinin qəbul edilməsini qaldırırıq. Amma onlar gündəliyə salınmır. Bunlardan biri “ Maliyyə nəzarəti” haqqında qanun layihəsidir. Biz korrupsiyanın qarşısını almaq istəyiriksə, bu qanunu qəbul etməliyik. Maliyyə Nazirliyi bildirib ki, qanun üzərində işlənilir. Amma bu sənəd Milli Məclisə daxil olmur.

Digər qanun isə “ Rəqabət Məcəlləsi” dir. Bu qanunu iki dəfə müzakirə edib qəbul etmişik. Sonradan qanun hara getdi xəbərimiz olmadı. Doğrudan da bu qanun lazım deyilsə bunu xalqa demək lazımdır ki, Azərbaycanda rəqabət olmayacaq. Azərbaycanda monopoliyanı, inhisarçılığı aradan qaldırmaq lazımdır. Mən xahiş edirm ki, bu qanun layihələri gündəliyə salınsın”.

Buna cavabında spiker  bildirib ki, “Rəqabət Məcəlləsi” ni üçüncü oxunuşdan dəyişdirilmək üçün geri çağırdı:

“ Bu da 2008- ci ildə başlanan böhran vəziyyəti ilə bağlıdır. Bu qanunun maddələri dəyişdirilməlidir. Dəyişəndən sonra yəqin ki, göndərəcəklər. “Maliyyə nəzarəti” məsələsi də nəzarətdədir. Hazırda o qanun üzərində işlənilir”.

***

elmira-2

Elmira Axundovadan təklif:– Köməkçilərə dövlət qulluqçusu statusu verilsin

Millət vəkili Elmira Axundova çıxışı zamanı deputat köməkçilərinə dövlət qulluqçusu statusu verilməsini təklif edib.

E. Axundova deyib ki, bu insanların çoxunun mənzili yoxdur. O, sosial ipoteka üçün 3 il dövlət qulluqçusu stajı tələb olunduğunu nəzərə çatdırıb:

“Xahiş edirəm ki, 125 deputat köməkçisinə 5 il fəaliyyətləri ərzində dövlət qulluqçusu statusu verilməsi məsələsi həllini tapsın”.

 

***

siyavush

“Heç olmasa oturduğunuz stula hörmət edin” – SİYAVUŞ NOVRUZOV

Millət vəkili, YAP rəsmisi Siyavuş Novruzov çıxışında daha çox bəzi deputat həmkarlarını sərt tənqid edib.

Millət vəkili qeyd edib ki, mətbuatda bəzi həmkarları deyirlər ki Milli Məclis işləmir:

“İşləmirsənsə niyə buradan əməkhaqqı, mükafat alırsan?! Bizim payız sessiyasında nə qədər qanunlar qəbul olunub. Biz indi neyniyək? Divar hörməliyikmi? Başqası deyir ki, komanda dəyişməlidir. Komandanın sahibi var. Bu cənab prezidentin komdandasıdır. Bu komanda nə qədər işlər görüb. Bunların birinin funksiyasını yerinə yetirə bilərsənmi? İki gün mətbuatda qalmaq üçün belə edirsiniz. Türkiyəyə baxıb coşursunuz. Biz prezident respublikasıyıq. İcra funksiyasını icra qurumları yerinə yetirir. Yetirməyən isə dərhal həbs edilir. Hər bir insan çıxış edəndə oturduğu stula heç olmasa hörmət etsin. Vaxt var idi ki, burada 4 adam bir otaqda otururudu. 8 adama bir telefon düşürdü. Otur işlə. Qanun hazırla və cəmiyyətə təqdim elə. “Biz qabaqcadan demişdik, iki il bundan əvvəl demişdik” deyirsiniz. Nə demişdiniz?! Hamımız burada idik. Hesab edirəm ki bundan sonra belə məsələlərə yol verməyə ehtiyac yoxdur”.

S. Novruzov həmçinin mobil rabitə ilə ciddi problemlər yaşandığını qeyd edib: “Hər axşam xarici nömrələrdən zənglər gəlməyə başlayır. “Ərəb baharı”nda da belə olmuşdu. Bunlar ilkin mesajlar idi”.

Deputat sonda MM sədrinin birinci müavini Ziyafət Əsgərova müraciət edərək bildirib ki, informasiya təhlükəziliyi məsələsinə yenidən baxılsın.

Bundan əlavə deputat siyasi partiyaları hesabat verməyə çağırıb: “Hesabat vermirlər, kifayət qədər cangündənləri, işçiləri var. Təbii ki, onlar hava ilə dolanmırlar”.

***

qudret

İş adamlarının obyektlərini qanunsuz sökənlər cəzalandırılmalıdır– QÜDRƏT HƏSƏNQULİYEV

“Baxırsan ki, bəzən mətbuatda xəbər gedir ki, sahibkarın oteli söküldü, əmlakının dəyəri ödənilmədi…Mülkiyyət məsələsi vacib məsələdir. Sahibkarın əmlakı məhkəmə qərarı olmadan, içindəki əşyalar çıxarılmadan sökülürsə, kim Azərbaycana sərmayə qoya bilər? Azərbaycanda media qurumları var ki, xəbərləri bir neçə dildə yayır”.
Bunu isə çıxışında deputat Qüdrət Həsənquliyev deyib.
“Təbii ki, ölkəmizə sərmayə qoyan əcnəbilərdə ölkəmizlə maraqlananda bu xəbərləri əldə edirlər. Əgər mətbuatda belə xəbərlər yazılırsa, müvafiq dövlət qurumları buna reaksiya verməlidir. Əgər yalandırsa, bununla bağlı izahat verilməlidir. Yox, əgər doğrudursa, bunu edənlər cəzalandırılmaldıır”- deyə, o, bildirib.
O. Əsədov da  deputata sual verib:
“Əmlakı sökülən adamların mətbuatda çıxışı, məhkəməyə müraciət olubmu? Hamısını qəzetlər yazırlar. Sökülən əmlakın pulu verilir”.
***
Millət vəkilləri özəlləşdirmə  prosesində çeklərdən istifadənin bərpasını təklif etdilər…
İclas zamanı yenidən söz alan Z. Oruc özəlləşdirmə prosesi ilə bağlı da təklif verib.
“325 müəssisə özəlləşdirməyə çıxarılmışdı. Bu günlərdə daha 50 müəssisə özəlləşdirməyə təqdim edildi”-deyən deputat vətəndaşlara verilmiş vauçerlərdən də bəhs edib. Bildirib ki, o çeklərin özəlləşdirmə prosesində istifadəsi barədə qərarlar verilməsi müsbət addım olardı.
Q. Həsənquliyev  də  Z. Orucun bu təklifini dəstəkləyərək, çeklərdən özəlləşdirmə prosesində istifadənin zəruriliyini bildirib.
***
Deputat İrəvana varislik hüququ barədə sənəd qəbul edilməsini təklif etdi

Millət vəkili, Tarix İnstitutunun direktoru Yaqub Mahmudov öz növbəsində  deyib ki, İrəvan daxil olmaqla, Azərbaycan Xalq Cümhuriyyəti dövründə ermənilərə verilmiş 9 min kvadrat kilometr torpağın Azərbaycan xalqına qaytarılması barədə məsələ qaldırmalıyıq.

Y. Mahmudov bildirib ki, 9 min kv.km. torpaq ermənilərə müəyyən şərtlərlə verilib: “Bu sənədləri xaricdən Tarix İnstitutuna gətirmişik. Həmin torpaqlarda azərbaycanlıların yaşamasının təmin edilməli, Şaumyanın başçılığı altında soyqırımlara son qoyulmalı, Zəngəzur və Qarabağa qarşı iddialardan əl çəkilməli idi. Ancaq bu şərtlərin hamısı pozuldu. Ona görə də biz bu torpaqlara varislik məsələsini qaldırmalı və Milli Məclisdə bununla bağlı müvafiq addım atmalıyıq. Biz həmin sənədlərin hamısını parlamentə təqdim etməyə hazırıq”.

Y. Mahmudov prezident İlham Əliyevin çıxışlarında da dəfələrlə həmin torpaqların Azərbaycan xalqına qayıdacağını vurğuladığını xatırladıb: “Ona görə də parlament o torpaqlara varisliklə bağlı müvafiq sənəd qəbul etməlidir”.

***

musa-urud

MUSA QULİYEV: “Bu, gələcəkdə problemlərə yol açacaq”. 

“Bu gün Azərbaycanda kənarda maaş, pensiya kartı ilə hər hansı məhsul alınan zaman Azərbaycan bankları tərəfindən elektron ticarət sayılaraq 18 faiz əlavə dəyər vergisi tətbiq edilir. Bu, gələcəkdə problemlərə yol açacaq”.

Bunu çıxışı zamanı millət vəkili Musa Quliyev deyib.

Millət vəkili problemin aradan qaldırılması üçün qanunvericiliyə dəyişiklik təklif edib: “Yaxud Maliyyə Bazarlarına Nəzarət Palatası müvafiq normativ aktlara lazımi dəyişikliklər etməlidir ki, insanlar bu problemlə rastlaşmasınlar”.

M. Quliyev deyib ki, artıq ikinci və üçüncü qrup əlillər əmək qabiliyyətli sayılır: “Ancaq bu insanlarla tam sağlam insanların işə götürülməsi məsələsinə yanaşma eyni olmayacaq. Ona görə də əlillər üçün iş kvotası məsələsinə yenidən baxmalıyıq”.

***

amasov

Əflatun Amaşov: “İnternet medianın hüquqi statusu müəyyənləşdirilməlidir”

Millət vəkili, Mətbuat Şurasının sədri Əflatun Amaşov isə internet medianın problemlərindən danışıb:

“Kimsə domen və hostinq alaraq, internetdə nə istəyir, yazır. Bunlarla əlaqədar məhkəmə müstəvisində addım atmaq çətindir. Gərək, söz azadlığı çərçivəsini aşmasınlar. Ona görə də internet medianın hüquqi statusunu müəyyənləşdirmək lazımdır. Digər tərəfdən, onlayn mediaya dövlət tərəfindən maliyyə yardımının ayrılması yaxşı olar”.

Etikxeber.az

 

 

 

 

Read Previous

Azərbaycan–Almaniya oyununun biletləri satışa çıxarıldı

Read Next

“Əlilləri işə götürməyən şirkətlərə qarşı cəza tədbirləri sərtləşdirilsin”- PAŞAYEVA

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir