Mingəçevirli Şəhid qardaşlardan Musa Həsənovun Cənnətdəki ikinci ad günü: BU GÜN ONUN 26 YAŞI TAMAM OLDU, MƏZARI ZİYARƏT OLUNDU, MƏRASİM DÜZƏNLƏNDİ…- FOTOLAR – YENİLƏNİB – (4)

Bu gün Mingəçevirin İkinci Vətən Müharibəsi Şəhidlərindən-Şəhid qardaşlardan biri olan Musa Tapdıq oğlu Həsənovun ad günüdür.

Onun 26 yaşı tamam olur və bu, Musa Həsənovun Cənnətdəki ikinci ad günüdür.

Etikxeber.az xəbər verir ki, Musa Həsənov 1995-cı ilin noyabrın 24-də Mingəçevirdə sadə bir ailədə-Nəhayət və Tapdıq Həsənovların ailəsində dünyaya gəlib.

O, ata tərəfdən Ağdamlı, ana tərəfdən Goranboylu olub.

Musa orta məktəbi qurtardıqdan sonra hərbi xidmətə, Əsgərliyə yolanıb.

Əsgərliyini bitirdikdən sonra evinə, ailəsinə dönüb, müxtəlif yerlərdə çalışıb.

İkinci Vətən Müharibəsi başlayan gündən də tək qardaşı Tural Həsənovla döyüşlərdə olub.

Musa müharibənin ilk günlərində Şəhid olsa da, uzun müddət onun nəşini əldə etmək mümkün olmayıb.

Nəşi Şəhidliyindən 35 gün sonra Mingəçevir şəhər Şəhidlər Xiyabanında torpağa tapşırılıb.

Qardaşı Tural Həsənov da İkinci Vətən Müharibəsi zamanı Şəhid olub, onun nəşi 68 gündən sonra ailəsinə təhvil verilib və dekabr ayının 9-da Əbədiyyətə uğurlanıb.

Hər iki qardaş ailəli, iki övlad atası olub.

Şəhidliyindən 6 ay sonra isə qız övladlarından biri – bir yaşlı İnci də xəstəlikdən vəfat edib.

Şəhidliyindən sonra 3 medalla təltif olunub.

***

Cənnətdəki ad günü, mövludu ilə bağlı bu gün səhər saatlarında Mingəçevir Şəhidlər Xiyabanında Musa Həsənovun, həmçinin, qardaşı Tural Həsənovun məzarları ziyarət olunacaq.

Məzarları üzərinə gül dəstələri düzüləcək, ruhlarına dualar oxunacaq.

Ziyarətdə Şəhidin ailə üzvləri, yaxınları, Qazilər, Mingəçevirdən olan Şəhid ailələri iştirak edəcəklər.

Bir saatlıq ziyarətdən sonra mövludu ilə bağlı şəhərin “Qala” restoranında mərasim keçiriləcək.

Mərasimdə Şəhidlərin xatirəsi bir dəqiqəlik sükutla yad ediləcək, Dövlət himni səsləndiriləcək, çıxışlar olunacaq.