Novruz Məmmədov baş nazir vəzifəsinə təsdiqləndi – YENİLƏNİB -(1)

Bu gün Milli Məclisin Azərbaycanın yeni baş nazirinin təsdiqlənməsi ilə bağlı xüsusi iclası başlayıb. 

Etikxeber.az xəbər verir ki, iclası açan spiker Oqtay Əsədov qeyd edib ki, deputatlar aprelin 11-də ölkədə baş verən hadisənin hələ də sevincini  yaşayırlar:

“Demokratik və ədalətli seçkilərdə İlham Əliyevin yenidən prezident seçilməsi xalqın ona verdiyi önəmin böyük nəticəsidir. Onu təbrik edək və işində uğurlar arzulayaq”.

Bu məsələ deputatlar tərəfindən  alqışlarla qarşılanıb.

Spiker qeyd edib ki, prezident öz inauqurasiya mərasimini Milli Məclisdə keçirdi:

“Bu da onun Milli Məclisiə etimadının nəticəsidir”.

Daha sonra spiker deyib ki, deputatlar adından prezidentə təbrik məktubu göndərəcəklər.

Sonra spiker dövlət başçısının Milli Məclisə göndərdiyi məktubun mətnini oxyuub.

Mətndə bildirilir ki, Novruz Məmmədovun baş nazir vəzifəsi postuna təqdimatına Milli Məclisdə baxılsın.

***

Təqdimatdan sonra deputatlar Novruz Məmmədovla bağlı fikirlərini bildiriblər. 

Deputat Səməd Seyidov qeyd edib ki, N. Məmmədov müasir dövrün tələblərinə cavab verən müasir bir insandır:

“Dünyanın müasir diillərində ünsiyyət qurmaq və əlaqələr yaratmaq qabiliyyətinə malikdir. O, bir ziyalıdır, yüksək əxlaqa malik sədaqətli insandır. O, digər məmurlar üçün də örnəkdir”.

Deputat Siyavuş Novruzov əvvəlcə Artur Rasizadəyə öz fəaliyyətinə görə təşəkkürünü bildirib:

“ O,Azərbaycan dövlətinə daim sədaqətli olub və uzun illər dövlət büdcəsinin təqdimatını Milli Məclisdə edib. Novruz Məmmədov isə 22 ildən artıqdır ki, Prezident Administrasiyasında çalışır. Vəzifə pillələrinə addım-addım qalxıb. Biz bu gün bilirik ki, bizi xaricdən gələn təhdidlər əhatə edir. Azərbaycan əleyhinə , prezident və dövlət əleyhinə müxtəlif yazılar yazılır. Novruz müəllim də az-az adamlarındandır ki, qarayaxma kampaniyalarının əleyhinə çıxıb və həmişə ona cavab verib”.

***

Daha sonra deputatlar Novruz Məmmədovun baş nazir postuna namizədliyini təsdiq ediblər.

Səsvermədə 113 nəfər Novruz Məmmədovun lehinə səs verib.

Kamil HƏMZƏOĞLU

Etikxeber.az