“Polislər vətəndaşlarla ünsiyyətdə etik normalara, qanunçuluğa riayət etməlidir” – USUBOV

 

Yanvarın 21-də Əlahiddə Çevik Polis Alayında 2016-cı il ərzində görülmüş işlərin yekunlarına və qarşıda duran vəzifələrə həsr olunmuş əməliyyat müşavirəsi keçirilib.

Daxili İşlər Nazirliyinin (DİN) mətbuat xidmətindən Etikxeber.az-a bildiriblər ki, müşavirəni açan daxili işlər naziri Ramil Usubov Prezident İlham Əliyevin rəhbərliyi ilə quruculuq işlərinin uğurla davam etdiyini, dünyadakı gərgin siyasi və iqtisadi vəziyyətə, yeni münaqişə ocaqlarının yaranmasına baxmayaraq, ölkəmizdə mövcud sabitlik və təhlükəsizlik şəraitinin daha da möhkəmləndiyini, bu proseslərdə yaxından iştirak edən DİN tərəfindən respublikada ictimai asayişin ötən ildə də etibarlı qorunduğunu xatırladıb. Həyata keçirilən kompleks tədbirlərin müsbət nəticələr verdiyini, kriminogen durumun nəzarətdə saxlanıldığını, görülən işlərdə, əldə edilən müsbət nəticələrdə Əlahiddə Çevik Polis Alayının şəxsi heyətinin də böyük əməyi olduğunu diqqətə çatdıran nazir hüquq-mühafizə orqanlarının birgə fəaliyyətinin ölkədə əmin-amanlığın təmin edilməsini və davamlı olmasını şərtləndirən əsas amillərdən biri olduğunu bildirib.

Qeyd edilib ki, əvvəlki illərdə olduğu kimi, 2016-cı ildə də cinayətlərin dinamikasında müsbət təmayüllər qeydə alınıb, cinayətlərin açılması, axtarışda olan şəxslərin tutulması yaxşılaşıb. Mütəşəkkil cinayətkarlığa, insan alverinə və narkotik vasitələrin qanunsuz dövriyyəsinə qarşı mübarizə güclənib, qanunçuluğun möhkəmlənməsi, insan və vətəndaş hüquq və azadlıqlarının qorunması sahəsində müsbət nəticələr əldə edilib.

Ötən ildə görülmüş işlər və əldə olunmuş nəticələr, həmçinin qarşıda duran vəzifələr barədə Əlahiddə Çevik Polis Alayının komandiri, polis general-mayoru Zaur Abdullayev məruzə ilə çıxış edib. O deyib ki, Alayın patrul bölüklərinin xidmət apardığı paytaxtın küçə və prospektlərində hesabat dövründə kriminogen durum bütövlükdə nəzarətdə saxlanılıb, cinayətlərin və digər hüquqpozmaların aşkarlanması və vaxtında qarşısının alınması üçün kompleks tədbirlər müəyyən edilərək həyata keçirilib.

Bakı Şəhər Baş Polis İdarəsi ilə razılaşdırılmış vahid dislokasiya planına uyğun olaraq post və marşrutlarda 28 min 292 nəfər, o cümlədən müxtəlif cinayətlər törətmiş 804, inzibati xətalara yol vermiş 27 min 488 şəxs saxlanılaraq barələrində qanunauyğun tədbirlər görülüb. Hüquqazidd əməllərə yol verdiyinə görə saxlanılanlardan 268-i xuliqanlıq, 211-i oğurluq, 25-i soyğunçuluq, 65-i dələduzluq, 96-sı narkotik vasitələrin qanunsuz dövriyyəsi ilə bağlı, 28-i digər cinayət törədənlər, 111-i isə axtarışda olanlardır. Eyni zamanda, məişət səs-küyünə yol verən 1240, qanunla müəyyən edilməmiş yerlərdə küçə ticarəti ilə məşğul olan 4506, digər inzibati xətalara görə 15 min 217 nəfər müəyyən edilərək aidiyyəti polis orqanlarına təhvil verilib. 2015-ci illə müqayisədə aşkarlanan cinayətlərin və inzibati xətaların sayı 890 fakt və ya 3,2 faiz çox olub.

Vurğulanıb ki, daxili işlər orqanları üzrə təşkil olunan idman yarışlarında qazanılan uğurlar ötən il də davam etdirilib. Sərbəst güləş, estafet qaçışı, silahsız özünümüdafiə, sambo, cüdo üzrə Alayın komandaları müxtəlif turnirlərin qalibi olub. Bununla yanaşı, ayrı-ayrı əməkdaşlar beynəlxalq yarışlarda yüksək nəticələr əldə ediblər. Belə ki, polis serjantı Səbuhi Şükürov karatenin şotokan növü üzrə Avropa çempionatında, polis serjantı Mirağa Quliyev budo üzrə Avrasiya çempionatında, polis serjantı Natiq Eminov juboksinq citsu üzrə dünya kubokunda, polis serjantı Eldəniz Xəlilov hap-ki-do üzrə dünya çempionatında, polis serjantı İbrahim Məmmədov kikboksinq üzrə dünya çempionatında birinci yeri tutublar. İ.Məmmədov, həmçinin kikboksinq idmanının “K-1” versiyası üzrə dünya kəmərinin sahibi olub. İdman yarışlarında qadınlarımız da fərqləniblər. Belə ki, Bakıda keçirilən cüdo üzrə dünya kubokunda polis serjantı Nuriyyə Axundova birinci yerə layiq görülüb.

Qeyd olunub ki, şəxsi heyətin vətənpərvərlik ruhunda tərbiyəsi və mənəvi-psixoloji hazırlığının yüksək səviyyədə saxlanılması istiqamətində tədbirlər davam etdirilib. Gənc əməkdaşların xidmətdə möhkəmlənməsi, praktiki iş vərdişlərinə tam yiyələnməsi üçün lazımi şərait yaradılıb.

Bildirilib ki, DİN rəhbərliyinin Əlahiddə Çevik Polis Alayına göstərdiyi gündəlik diqqət və qayğı, onun inkişafı üçün qəbul edilən qərarlar əməkdaşlar tərəfindən dərin minnətdarlıqla qarşılanır. Ümumən xalqa xidmət funksiyalarının səmərəli yerinə yetirilməsi, insan hüquq və azadlıqlarına ciddi riayət olunması, peşə və döyüş hazırlığı səviyyəsinin durmadan yüksəldilməsi, əməkdaşlara diqqət və qayğı göstərilməsi kimi vəzifələrin bundan sonra da davam etdirilməsinin əhəmiyyəti diqqətə çatdırılıb.

Müşavirəyə yekun vuran daxili işlər naziri şəxsi heyətin ötən hesabat ilindəki fəaliyyətinın yekunlarını müsbət qiymətləndirib, tapşırıq və tövsiyələrini verib, qarşıda duran vəzifələrdən, onların həlli yollarından danışıb.

R. Usubov Alay rəhbərliyindən əməkdaşların xidməti, döyüş və mənəvi-psixoloji hazırlığın yüksəldilməsi işinin ən vacib vəzifələrdən biri olaraq həyata keçirilməsini, xidmətqabağı təlimatlandırmalarda əməkdaşların zahiri görünüşünə, geyim formasını daşıma qaydalarına riayət etmələrinə diqqət yetirilməsini, eyni zamanda, əməkdaşların qanunla müəyyənləşdirilmiş vəzifə, funksiya və hüquqlarını dərindən öyrənilməsini tələb edib.

Kütləvi tədbirlər zamanı təhlükəsizliyin təmin olunmasında Alayın böyük təcrübəsi olduğunu xatırladan nazir cari ildə Bakıda IV İslam Həmrəyliyi Oyunları və Formula-1 Azərbaycan Qran-Prisi kimi beynəlxalq əhəmiyyətli idman yarışlarının keçiriləcəyini, bu və digər kütləvi, mədəni tədbirlər dövründə qarşıya qoyulan vəzifələrin yüksək səviyyədə yerinə yetirilməsinin vacibliyini diqqətə çatdırıb. Bu qurumun xidməti fəaliyyətinin respublikanın bütün ərazisini əhatə etməsi baxımından post-patrul naryadlarının daim ayıq-sayıq olmasının, cinayət və hadisələrin dinamikasının mütəmadi izlənilməsinin, peşəkarlığın artırılması məqsədilə müvafiq təlim-məşqlərin keçirilməsinin zəruriliyi bildirilib.

Qeyd olunub ki, polisin qanunla müəyyən edilmiş vəzifələrindən biri də həyatı və sağlamlığı üçün təhlükəli vəziyyətə düşmüş şəxsə kömək göstərməkdir. Bu məsələdə yaxşı nümunələrin sayının çox olduğuna, insanlara həssas münasibətin və qayğının həmişə minnətdarlıqla qarşılandığına, bunun polisin nüfuzunu daha da yüksəltdiyinə diqqəti çəkən  Usubov vətəndaşlarla ünsiyyətdə etik normalara, qanunçuluğa, insan hüquq və azadlıqlarına ciddi riayət edilməsinin, şəxsi heyətin döyüş hazırlığının artırılmasının, sosial-məişət problemlərinin, əməkdaşların qarşılaşdıqları çətinliklərin həllinə önəm verilməsinin əhəmiyyətindən danışıb. Xidməti vəzifələrin uğurla yerinə yetirilməsi üçün ölkə rəhbərliyi tərəfindən hər cür şəraitin yaradıldığı, şəxsi heyətin hərtərəfli dövlət qayğısı ilə əhatə olunduğu da vurğulanıb.

Daxili işlər naziri əminliklə bildirib ki, Əlahiddə Çevik Polis Alayının əməkdaşları ictimai qaydanın qorunması və ictimai təhlükəsizliyin təmini, cinayətlərin və digər hüquqpozmaların qarşısının alınması üzrə vəzifələri, qarşıya qoyulan bütün tapşırıqları bundan sonra da əzmlə yerinə yetirəcək, göstərilən etimadı sədaqətli xidməti ilə doğruldacaqlar.

Etikxeber.az

Read Previous

Qadınlar arasında Avropa çempionatının təqvimi açıqlandı

Read Next

“Bu, həm də xristian dünyasına, digər dinlərə bir çağırışdır…” – MURADOVA

Leave a Reply

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir